YLE Colloquia Latina

Valerius Heraldus omnibus sodalibus salutem plurimam dicit!

Invito vos, amici, benigne visitare paginam nostram interretialem ad http://www.russiancollegeofheraldry.org
Quis possit iuvare me Latine reddere hac paginam?
Ita nos Deus amet!
Valete omnes!
Valerius Heraldus
Russia

Mercurius Valerio heraldo s. d.

Difficile est, quod petis, amice. Tuam enim paginam inspiciens magnam vim textuum inveni, quos textus Latine reddere maximae molis est. Ceterum quaenam tibi opinio est de insignibus Hungariae sub nomine meo positis? Vale. Transaquinci, d. VI. Kal. Dec.

M. Favonius Mercurio Hungarico Valerioque Heraldo sal.
Collegii Heraldici Russiae pagina interretialis, Valeri, sumptuosissimae opulentiae quidem est opus, quo inspecto nemo erit quin maxima afficiatur voluptate. Gratulor. Sed quod ad paginam in Germanicum conversam attinet, qua de causa prooemium („Re-established in 1991 etc.“) non est redditum Germanice?
Ita est, mi Mercuri: De opere gravi sane et ingenti videmur rogari. Carere quoque nos puto vocabulis Latinis, quae rebus heraldicis imponenda sunt. Quid faciamus, Valeri?
Valete.
VI Kal. Dec.

Valerius Heraldus Mercurio Hungarico salutem dicit!

Gratias tibi ago, amice.
Sed Deum Omnipotentem sperabo ut propositum meum consecutus ero.

Hungariae insignia bonissima sunt sub nomine tuo positis.
Macte!

Valete omnes

Valerius Heraldicus
----------------------
Vi vince malum!

Marcus Mercurio suo s.
Equidem, quod ad clarissimum insigne Hungaricum pertinet, hanc inspicere soleo paginam interretialem:
http://mitglied.lycos.de/chsiemer/wappen/heraldik.htm
Qua in pagina (indicis scilicet auxilio) variae scuti Hungarici figurae apparent atque explicantur. Cum vir sis rerum gestarum peritissimus, mi Mercuri, oro te nobis exponas, qua de causa Slovaciae et Hungariae insignia inter se similia esse videantur.
Vale.
VI K. Dec.

Valerius Heraldus Marco Favonio salutem plurimam dicit!

Tibi atque gratias ago, amice.

Difficile mihi Latine scribere est, quia autodidactus sum.
Da mihi veniam. Auxillium petavi.

Valete omnes!

Valerius Heraldus
--------------------
Virtute, non sanguine!

Mercurius Marco s. d.

Quod ad insignia Slovacica attinet, eius origo mihi haud liquet. Suspicor illa ab insignibus nostris oriri, quod et commentarius illius paginae, cuius titulum dedisti, clare affirmat: "1848 - inquit - kam erstmals ein Wappen für die slowakischen Gebiete auf und leitete sich vom Ungarischen Wappen ab", quod si Latine reddas, ita sonat: "anno 1848 facta sunt primum insignia pro regione a Slovacis habitata, quae ab insignibus Hungaricis originem cepit." Quod utrum verum sit, an non, haud discusserim; certum est cruce illa duplice, quae in duobus scutis communis est, iam Belam III. regem Hungariae clarissimum (regn. 1172-1198) in suis sigillis ac nummis usum esse. Quamobrem sane ridiculum est, quod Slovaci quidam nacionalismo insani asserunt, scilicet quod figura illa, id est crux ut nominatur duplex a Hungaris de insignibus Slovacis "sublata" fuisset: reges enim nostri iam in saeculo XII. - cum Slovaci adhuc sub ditione Hungarica essent - illo symbolo usi erant. Vale. Transaquinci, s. IV. Kal. Dec.

Valerius Heraldus Mercurio Hungarico et Marco Favonio salutem plurimam dicit.

Intellego Latinam linguam, sed scribere profluente oratione non scio. Diploma nostrorum Latina lingua videri potest duplice exemplo hic adiuncto. Quid cogitatis de hoc?

DIPLOMA PRIMUM
Omnibus et singulis praesentes has Litteras inspecturis notum sit, quod Collegium Heraldicum Russiae in Matricula sua Armorum imposuit Insignia Gentilicia quorum gestator est
HONESTISSIMUS EQUES DOMINUS COMES SILVERIO SIGNORACCI
Scilicet: Scutum diametro dentato in aream Argenteam ac Caeruleam divisum, cum tribus clavis Passionis Nigris in summo scuti ad modum fasciae ordinatis. Super scutum ac super galeam coronae comitis positae sunt. Lemnisci sunt Caerulei, substratu cum Argenteo. Acroterium cassidis angelus precans Albatus est. Sub scutum horum trium Ordinum insignia, nempe: Constantini, Sacri Sepulcri Hierosolymitani, ac Sanctorum Mauricii et Lazari, ab infulis suabus suspensi sunt. Clipeum tenentes duo leones erecti Aurei, lingua et falculis Rubris. Et illud Insignium sententia haec est: In Domino Confido.
Datum Mosquae, X Octobris, anno Domini MCMXCI.

DIPLOMA SECUNDUM
Meriti et animi Vestra erga scientias genealogiae necnon heraldicae propensio ac devotio, quae per Vos
MAJESTISSIMUS AC NOBILISSIMUS DOMINUS MAGNUS PRINCEPS RUSSICUS VLADIMIRUS CYRILLI FILIUS
per multos annos summa cum sapientia ac peritia diligibantur, exhortant
COLLEGIUM HERALDICUM RUSSIAE
doctissimae personae Vestrae in distinctionis significatione pro illis meritis adscribere
SOCIIS SUIS HONORARIIS,
cujusque rei in testimonio hoc Diploma ad Vos conceditur.
Datum Mosquae, dies XXVII Novembris, anno post Christum natum MCMXCI.
FINIS

Valete omnes, amici.

Valerius Heraldus

Mercurius Valerio Marcoque s. d.

Valerii, diplomata tua Marcus Favonius iam correxit (parvo meo auxilio), quas correctiones brevi, ut spero, tibi demonstrabit. Ceterum quaenam tibi opinio de rebus novis in Ucraina?

Mi Marce,

Causis similitudinis inter insignia Hungarica Slovacicaque magis perpensis pro certo tibi affirmare ausim haec ab illis orta esse. Quod non tam crux illa duplex testatur - quod symbolum satis notum vulgatumque haberi potest -, quam colles istae tres in infima parte scuti utriusque positae. Quas haud fortuito in insignibus Slovacicis saeculo XIX. (!) pinctis apparuisse, sed de Hungaricis armis multo veterioribus transsumptas esse haud quisque negaverit. Quid plura? Haec et Slovaci concedunt, exceptis eis, qui odio Hungarorum iam prorsus dementes facti sunt. Vale. Transaquinci, prid. Kal. Dec.

Marcus Mercurio Valerioque sal.
Gratias tibi ago maximas, mi Mercuri, pro explicatis insignibus Hungaricis. Quamvis, qua ratione insignia Hungarica et Slovacica inter se cohaereant, optime nunc cognoverim, tamen, quid trimontium illud sive tres illi colles virides Hungarici sive caerulei Slovacici sibi velint, prorsus nescio. ---
Diplomata tua heraldica, Valeri, verborum quidem maiestate atque sublimitate placent, sed paullulum a nobis, id est a me Mercurioque, retractantur. Equidem, cum artis heraldicae non satis sim peritus, imprimis de sermone Latino mihi cogitandum esse censeo. Opere ad finem deducto ad te scribemus.
Valete, amici.
K. Dec.

M. Favonius Valerio Heraldo sal.

Ecce diplomata tua a me Mercurioque Hungarico „viribus unitis“ paullulum retractata.
***
DIPLOMA I
Quicumque has litteras inspecturus est, is cognitum habeat in Collegii Heraldici Russiae matriculam armorum relata esse insignia gentilicia
HONESTISSIMI EQUITIS DOMINI COMITIS SILVERIO SIGNORACCI.
Insignium figura:
Scutum diametro dentato in aream argenteam ac caeruleam divisum, idque tribus additis clavis Passionis nigris in summo scuto instar fasciae ordinatis; supra vero scutum cassidemque coronae comitis sunt positae, lemniscis caeruleis cum substratu argenteo; acroterium denique cassidis est angelus albatus habitu viri precantis.
Infra scutum insignia trium Ordinum, scilicet Constantini, Sacri Sepulcri Hierosolymitani Sanctorumque Mauritii et Lazari ex infulis suis suspensi videntur; scuti denique telamones sunt duo leones aurei erecti et lingua falculisque rubris armati.
Insignium sententia: In Domino confido.
Datum Mosquae, die X mensis Octobris anno Domini MCMXCI.

DIPLOMA II
Merita vestra et ardentissima studia, quae vos,
MAGNIFICENTISSIME AC NOBILISSIME DOMINE MAXIME PRINCEPS RUSSICE VLADIMIRE, CYRILLI FILI,
scientiae rerum genealogicarum necnon heraldicarum multos per annos summaque cum sapientia ac peritia impendebatis,
COLLEGIUM HERALDICUM RUSSIAE exhortantur,
ut doctissimam vestram personam ob merita illa honoris causa
ad SOCIORUM HONORARIORUM numerum adscribat.
Cui rei testimonio hoc diploma vobis affertur.
Datum Mosquae, die XXVII mensis Novembris anno post Christum natum MCMXCI.
***
Rem, quae magnae nobis voluptati erat, et tibi usui fore speramus.
Vale.
Pridie Nonas Decembres, die sane nebuloso.

Valerius Heraldus Mercurio Hungarico et Marco Favonio salutem plurimam dicit.

Gratias vobis ago, amici, pro auxillio in correctione diplomatis.

Mihi dolorem magnum afferunt res adversae in Ucraina nunc quum maxime, quia eo loco vixi per XXV annos, ac quia filia mea Anna (agens XXII annum) eo loco hodie vivit.
Ita nos Deus amet!

Non loquor bene Latine et non possum dire opinionem meam in hac lingua. Si serio interest tua, mi Mercuri, quod opinor de rebus novis in Ucraina, possum scribere historiam meam anglice, ut tu potes adiuvare Latine in translatione et sermonibus publicatis operam dare.

Ideo, quaeso: da mihi, si velis, mi Mercuri, inscriptionem cursualem tuam electronicam. Mea inscriptio electronica in pagina nostra interretiali est ad http://www.russiancollegeofheraldry.org

Valete, amici.

Valerius Heraldus
Russia