YLE Colloquia Latina

Utinam et hoc delectemini aenigmate, amici spectatissimi!


Sum dea cara tibi, crescens odiosa volucris,
Atque iterum crescens ars tibi suavis ero.


Quae dea? quae volucris? quae ars?

Phlebas Soterem Marcumque omnesque sodales salutat

Id est, Soter: Adamus et Eva. Excerpta mittere volebam; quaesivi et quaero sed non invenio librum de Jocis Monachorum ex quo quaestionem traxi...

Marce, lego et relego enigmate tuum et valde aenigmaticus stat. Tantus curiosus sum ut heri somniassem Ursam Minorem solutionem fuisset... Sed, ubi illuxit, ut solet, perfecta explicatio ex mente aufugit.

Hodie librum de diis et heroibus poeticis percurri sed solum inveni: " Currum Veneris trahebant columbae, cygni, aut passeres ". Solutio longe abest.

Valete

Kal Nov. ex urbe Mediolani, frigida propter ventos septentrionales Europam nostram percurrentes, media nocte, hieme incipiente

Marcus Phlebae s.d.p.

Nescio quidem, amice mi optime, quae Musa te adiuvare possit..., sed te scire suspicor, quod animal volucre odio nobis esse soleat et qua arte animi nostri permulceantur...

Bene vale.

Die Commemorationis omnium fidelium defunctorum.

Phlebas Marco Salutem

Musa Musca Musica

Vale

Marcus Phlebae s.d.p.

Macte virtute, amice!

Ecce fabella muscaria, qua paullulum delectatum te iri spero:

Apud Suetonium de imperatore Domitiano hoc scriptum legimus (cap. 3):

Inter initia principatus cotidie secretum sibi horarum sumere solebat nec quicquam amplius quam muscas captare ac stilo praeacuto configere, ut cuidam interroganti, essetne quis intus cum Caesare, non absurde responsum sit a Vibio Crispo: ne muscam quidem.

Vale.

Tempus videtur esse, amici carissimi, ut novum proponatur aenigma.

Exstat fabula de Senecae morte Theodisce scripta, idque anno MCMLXXVII.
Prodeunt in scaenam Seneca philosophus et Nicodromus dispensator.
Seneca: „Princeps ad mortem me compellit. Sed priusquam veneno me exanimem, duos amicos ad cenam invitare velim. Oro te quae opus sunt quam diligentissime praepares!“
Nicodromus: „Noli quaeso oblivisci, domine, et tertium convivam apud te cenaturum esse!“
Seneca: „Quemnam...?“
Nicodromus: „...“*)
Seneca: „Cuius convivae nolo frui commercio.“
Nicodromos: „Quid, si te invito intrarit?“
Seneca: „Exibo."
***************
*) Nicodromus: „...“] Quaero, quid a Nicodromo responsum esse putetis,
(si vultis: quis fabulam scripserit).

Iulia Marco amico suo s.p.d.
Quod ad operis titulum attinet, confiteor me omnino nescire neque habere, unde inquisitionis initium ponam; verbum autem abs te quasitum credo esse mortem.
Vale!

mortem] Ita est, mea amica sagacissima! Fabula composita est a poeta Germano, qui mortem obiit a. MMIII. Cuius sePulcHrum reperies Berolini in coemeterio Francogallico.

Marce mi amice, video quam indocta sim! Nomen, quod tuo auxilio nisa assidue gugulando inveni, scilicet Petri cuiusdam Hacks, omnino mihi ignotum est, quamquam haud minimi momenti esse videtur.
Fac valeas!

Iterum optime investigatum, amica mea. Quod ad Petrum Hacks attinet, operae pretium est legere, quid hoc anno Id. Martiis in FAZ Dietmar Dath scripserit (cf. interrete FAZ).

Iulia Marco ceterisque sodalibus omnibus s.p.d.

"At, domini, universitas studiorum non est institutio balnearia!!!"

Quis dixit, et quo in argumento?
Valete.

Marcus Iuliae amicae suae artibus ingenuis eruditissimae s.d.p.
Anno MCMXV Emmy Noether, mulier artium mathematicarum peritissima, cum in academia Gottingensi facultatem publice docendi sibi comparatura in magnam difficultatem incurreret, a Davide Hilbert, mathematicorum professore, adiuta est; qui enim academiam balnearum, in quibus viri a feminis segregati lavari solerent, similem esse negavit neque tamen collegis persuasit, ut mulierem in professorum numerum asciscerent. Bello autem mundano primo confecto Emmy Noether id quod petiverat assecuta est. Equidem vestigia eius te persecuturam esse puto. Etiam atque etiam vale. VIII K. Apr. Crefeldiae.

Macte sagacitate, mi amice! Video te non solum erum philologicarum, sed etiam mathematicarum non imperitum esse!
Gottingae servatur epistula, Quam Albertus Einstein Felici Klein de eo argumento scripsit, ut Emmy Noether adiuvaret. Quam epistulam in expositionibus iam aliquotiens vidi. Noether ipsa summa fuit algebraica, et ad physicam pertinens theorema invenit, quod dicit symmetrias artissime cum conservationis legibus connexas esse, ita ut ex omni symmetria lesx conservationis oriatur et vice versa. Ita e translationis symmetria oritur conservatio impulsi, e rotationis symmetria autem conservationi momenti rotatorii, e "translatione temporali" (id est, si aloi tempore idem facias experimentum, idem eventurum esse) vero conservatio energiae.
Nunc curiosa sum, quid propositurus sis tu!
Vale, valete!
Stutgardiae, a.d. IV. Kal. Apr.

Marcus amicis sal.

Quotiescumque partem aversam nummi cuiusdam Italici considero, ante oculos tres mihi obversantur viri celeberrimi, qui ratione quadam proposita optime de artis doctrina meriti sunt. Quorum unus saec. vixit a. Chr. n. quinto, primo alter, tertius p. Chr. n. quinto decimo.

1) Qui nummus (euro)?
2) Qui viri?
3) Quae ratio?

Valete. III Id. Quinct. Ex Quirini Campo.

Iulia Marco optimo amico sal.
Bene fecisti, quod aenigma iterum nobis proposuisti, Marce illustrissime!
videamus, quid faciant sodales, imprimis Itali, quibus facilius esse oportet quam nobis Germanis.
Optime vale!