Spartacus omnibus sodalibus sal.
Si paululum prodire in Vulcani themate mihi licet, volo vos certiorem facere de re relata quam nuperrime inveni, ex libro octavo "Etymologiarum" ab Isidorio Hispaliensi (ca 560 - 636 anno Domini), in capite undecimo " de diis gentium" nuncupato.
<<
(1) Quos pagani deos asserunt, homines olim fuisse produuntur, et pro uniuscuiusque vita vel meritis coli apud suos post mortem coeperunt, ut apud Aegyptum Isis apud Cretam Iovis, apud Mauros Iuba, apud Latinos Faunus, apud Romanos Quirinos. (2) Eodem quoque modo apud Athenas Minerva, apud Samum Iuno, apud Paphos Venus, apud Lemnos Vulcanus, apud Naxos LIber, apud Delos Apollo. In quorum etiam laudibus accesserunt et poetae, et compositis carminibus in caelum eos sustulerunt. (3) Nam quorundam et inventiones artium cultu peperisse dicuntur, ut Aesculapio medicina, Vulcano fabrica. Ab actibus autem vocantur, ut Mercurius, quod mercibus praeest; Liber a libertate.
>>
Et alibi:
<<
(39) Vulcanum volunt ignem < praedicare>; et dictus Vulcanus quasi volans candor, vel quasi volicanus, quod per aerem volat. Ignis enim e nubibus nascitur. (40) Unde etiam Homerus dicit eum praecipitatum de aere in terras, quod omne fulmen de aere cadit. Idcirco autem Vulcanus de femore Iunonis fingitur natus, quod fulmina de imo aere nascantur. (41) Claudius autem dicitur Vulcanus, quia per naturam numquam rectus < est|> ignis, sed quasi claudus eiusmodi speciem motumque habet. Ideo in fabrorum fornace eundem Vulcanum auctorem dicunt, quia sine igne nullum metalli genus fundi extendique potest.
>>
Et aliquid iterum de Vulcano alibi inventum:
<<
(78 ) Ideo autem Venerem Vulcani dicunt uxorem, quia Venerium officium nonisi calore consistit, unde est ( Virg. Georg. 3, 97): Frigidus in Venerem senior.
>>
Veniam petens, obsecro vos!, putatisne scientiam etymologicam illius viri Isidorii aliquanto necopinatam? Ista quae dixit de "volicano" (39) et de Claudio (41) mihi absurda videntur. Praeterea, quid inscitius est quam
"caloris" Veneris causa - hercle! - Vulcanus eam in matrimonio iunxisse?
Hinc Spartacus cum erubescens in ipsa ignorantia tum timens ne dedecori propter suam inscientiam vobis fuerit, finem facit.
Valete!