YLE Colloquia Latina

Mercurius Tiberi s. d.

Videamus ergo litteram, immo, ut spero, litteras E! Vale. Transaquinci, Kal. Febr.

Tiberis Mercurio suo sal.
Equidem incautus iam eram responsurus litteram a te indicatam huic titulo deesse. pro pudor! nam sui quemque tituli litteras memoria tenere oportet..
immo E inest. ecce:

_ E _ _ _ _ / _ _ / _ _ _ _ _ //

Marcus Tiberi suo s.
Hem, rem perdifficilem excogitasse videris, mi Tiberis, et omnis nobis cura defigenda est in solvendo hoc aenigmate... Ah , E tandem admisso etiam A titulo inesse suspicor. Qua littera aperta magnam tibi laudem parabis. Vale. IV. Non. Feb. Crefeldiæ.

Tiberis Marco suo p.s.d.
recte suspicatus es,mi Marce, ltteram A huic titulo inesse.
ecce novissimus status:

_ E _ _ _ _ / _ _ / _ _ _ _ A //

ceterum haec verba aptissima mihi esse videntur, quae et naturam poetae quaesiti et modum eius scribendi describant ...
vale.
IV.Non.Feb.
Aquis Aequimontanis

Mercurius Tiberi s. d.

Nunc ut litteras I detegas velim. Transaquinci, d. IV. Non. Febr.

Tiberis Mercurio sal.
I inscriptioni inest - ingeniose indagasti

_ E _ _ _ _ / I _ / _ _ _ _ A //

noli oblivisci verba haec esse auctoris Latini !

vale.
IV.Non.Feb.
Aquis Aequimontanis

Marcus Tiberi suo
Pergamus ergo... Cum et A et E et I oculis nostris benigne obtuleris, non alienum videtur abs te petere, ut etiam U detegas. Quod di bene vertant...

Tiberis Marco suo sal.
periculum est, ne littera U detecta solutionem iam proditura sit..
bis enim apparet - ecce:

_ E _ _ U _ / I _ / U _ _ _ A //

vale.

Iulia Tiberi sal.
Maxime fallerer, si N titulo deesset...
Vale.

Tiberis Iuliae p.s.d.
Minime falleris, Iulia ! o me miseram Sphingem, quae denuo vinci videar !
ecce status novissimus:

_ E N _ U _ / I N / U _ _ _ A //

vale.
IV.Non.Feb.

Marcus Tiberi suo s.
Nisi fallor, libelli titulus videtur esse „Lentus in umbra“ (cf. Verg. buc. 1, 4). Quod opusculum composuit Andityas Soares de Moura. Et libellum et auctorem mihi ignotum esse confiteor. Vale. IV Non. Feb. Ad Cornicum Campum.

Tiberis Marco suo sal.
erras, mi amice, non in titulo quidem, sed in auctore, ut quem celeberrimum esse atque auctorem saeculi nostri appellaverim. nam ille Soares de Moura ignobilior mihi esse videtur, quam ut celeberrimus poeta appellari possit.
quid ergo? auctoremne patefaciam? an ceteris aliquantulum spatii concedamus ad deliberandum?
ne nimis difficilis sit vobis indagatio, pauca prodam: hoc in libello praeter ceteras reperitur praeclara illa et maesta fabella de "somniatore e terra nona discedente"...
valete.
IV.Non.Feb.

Marcus Tiberi suo sal.
Equidem hasta nunc abiecta aenigma a ceteris solutum iri spero; nam maesta illa quoque fabella prorsus ignota mihi est. Quod valde doleo… Vale. III Non. Feb.

Tiberis Marco suo ceterisque aenigmatistis sal.
Noli signa relinquere, mi Marce ! immo spem quandam reliquam esse credas aenigmatis solvendi, licet minima sit.
ceterum miror, quod titulo cognito tam difficile videtur esse auctorem conquirere.
sed volo me esse clementem. respicite,quaeso, titulos quosdam aliarum fabellarum sive nuntiorum, qui nostro libello continentur, e.g.:"adnotationes ad (Adalbertum) Stifter", "de subitanea poetae aporia", "de convertendo: imagines,fragmenta,nomina quaedam"...
num plura dicam ?
cogitate - et valete!
III.Non.Feb.
Aquis Aequimontanis, nivibus cadentibus

Marcus Tiberi s.d.p.
Ευρηκα, idque non modo abs te benigne adiutus, sed etiam officii muneribus paulisper exemptus... Aenigma proposuisti, mi Tiberis, cum difficillimum, tum etiam excellentissimum! Quid ergo? Libelli titulus est „Langsam im Schatten. Gesammelte Verzettelungen“, quas digressiones collectaneas Petrus Handke, clarissimus auctor Austriacus, scripsit a. 1980-1992. Cuius notus mihi est liber, qui inscribitur „Die linksh