YLE Colloquia Latina

Salvete omnes!

Speramus vos non solum auditores Nuntiorum Finnicorum esse sed etiam lectores assiduos Ephemeridis:
http://ephemeris.alcuinus.net
Praeconium agimus Nuntiis Latinis Helsinkiensibus in variis paginis Ephemeridis (et hoc fecimus ab initio, id est a mense Junio 2004), et dolemus Ephemeridem nunquam apparuisse in indice vinculorum paginae vestrae principalis. Ergo speramus, Erice optime, Te laborem nostrum satis dignum existimare ut tandem addatur indici nexorum a vobis vulgatorum.
Annum 2006 faustissimum exoptamus redactoribus auditoribusque Nuntiorum Latinorum!
Valete.

Ericus Palmén Albino s.d.p.
Heri, cum nuntium tuum supra positum perlegissem, moderatores areae nostrae electronice adii rogans, ut nexus EPHEMERIDIS in Hispania editae sub nexibus Conventus undecimi ALF et Kalevalae Canorae, quos in imo dextro angulo primae paginae Nuntiorum Latinorum invenies, quam primum collocaretur; hodieque id factum est. Posthac igitur hac area utentibus aditus in paginas Ephemeridis patet facillimus.
Suppudet confiteri me hactenus exsistentiae eius omnino ignarum fuisse. Nunc vero scito me visis quibusdam paginis eius sine dubio assidue eam esse lecturum idemque etiam ceteris Latinistis, quos cognovi, suasurum; magni enim aestimo non modo rationem, qua in ea variae res actuales hodierni mundi referuntur, sed etiam id, quod quam plurimi novi ibi nexus reperiuntur Latinitatis studiosis utilissimi.
Etiam ego tibi annum 2006 faustissimum et felicissimum exopto. Cura, ut valeas!

Herimannus Erico Albinoque sal. d.

Erico, redactoribus Nuntiorum Latinorum omnium nostrum proximo, gratias plurimas ago, ut cum ceteris Ephemeridos auctor, quod tam prompte egerit; haud pari celeritate ego apud Colloquia Latina de eadem re communicavi, quamvis ad hoc me Albinus iam diu hortatus essem. Qui mihi hoc ignoscat!
Valete etiamque Ephemerida visitate!

Novocomi, a. d. VII Kalendas Februarias

Albinus Erico optimo ceterisque spd.

Gratias ingentes tibi, optime Erice, ago propter miram tuam diligentiam laudesque tuas.
Non voluerim patientia tua abuti, sed puto utile te certiorem facere de quodam problema in pagina vestra: Fluxus enim RSS Nuntiorum Finnicorum jam per fere 15 dies vacuus remanet. Fons omnino exarescit! Bonum sit technicos vestros certiores facere, qui fortasse id nondum animadverterunt.
Gratias iterum iterumque.
Vale et valete.

..

Albinus Norico ceterisque lectoribus spd.

GREX LATINE LOQUENTIUM est elenchus electronicus (mailing list) antiquissimus et bene notus in orbiculo Latinitatis vivae. Nihil autem habet commune cum Ephemeride.
Si te adscripseris, nil mirum si epistulas nunc accipias a ceteris participibus. Si tibi molestum sit, et si mandatum SIGNOFF GREX fallit, suadeo ut privatim scribas Herimanno Gottschewski, moderator gregis (nomen inscriptionemque ejus invenies inter epistulas a te acceptas), ut nomen tuum ipse amoveat.

Vale et valete.