Versus carissimi

Colloquia de litteris Latinis

Moderators: Moderator, Redactio Interretialis

Versus carissimi

Emitteby Area Latina on Mart 02 Mart, 2004 16.12

Versus carissimi
--------------------------------------------------------------------------------
Nuntium misit: Simplicius | 06.11.2003 - 00:57 | |
--------------------------------------------------------------------------------
Qui versus auctorum Romanorum vobis carissimi?


RE: Versus carissimi
--------------------------------------------------------------------------------
Nuntium misit: Herimannus | 06.11.2003 - 01:33 | 1 | |
--------------------------------------------------------------------------------
Herimannus legentibus s. p. d.


Commemorandus mihi omnium versuum primus, quem puer legi et amavi:



Tityre tu patulae recubans sub tegmine fagi...



RE: Versus carissimi
--------------------------------------------------------------------------------
Nuntium misit: Mercurius Hungaricus ® | 06.11.2003 - 10:56 | 2 | |
--------------------------------------------------------------------------------
Mercurius omnibus, praecipue autem Simplicio s. d.


Meo consilio tam celeriter accepto gregem hanc colloquialem a te creatam esse maximo cum gaudio video. Vivat, crescat, floreat!



Plurimi equidem sunt, qui versus mente mihi reposti solationem ac gaudium semper praebuerint, quorum autem nunc unum elegerim, quem quondam gravissimis sollicitationibus ac Iliade malorum obrutus, cum culpa mea quamvis minima haud multum abesset, quin maximum mihi damnum efficeret, saepe dictitavi:



Integer vitae scelerisque purus... (Hor. Carm. I. XXII. 1.)



Valete. Ex Pann. Inf. die VIII. Id. Nov.





RE: Versus carissimi
--------------------------------------------------------------------------------
Nuntium misit: Marcus Favonius ® | 06.11.2003 - 15:36 | 3 | |
--------------------------------------------------------------------------------
M. Favonius omnibus Latinorum versuum amatoribus sal.

Equidem auctore Simplicio tribus maxime versibus delectari me confiteor, idque propter mirabilem eorum sonitum. Quorum unum "dure videtur struxisse Pacuvius", ut Quintilianus ait (inst. orat. 1, 68): "Nerei repandirostrum incurvicervicum pecus". Alter Ennii versus est, cuius verba clare sonantia sunt haec: "At tuba terribili sonitu taratantara dixit" (ann.frg.). Tertium apud Vergilium scriptum legimus: "quadrupedante putrem sonitu quatit ungula campum" (Aen. 8, 596). Haec hactenus.

Quod autem ad bene beateque vivendum attinet, clarissimum illud Horatii in pectus nobis demittendum esse censeo: "Aequam memento rebus in arduis servare mentem, non secus in bonis ab insolenti temperatam laetitia..." (c. 2, 3, 1-4). Valete quam optime.


RE: Versus carissimi
--------------------------------------------------------------------------------
Nuntium misit: Iulia | 06.11.2003 - 21:11 | 4 | |
--------------------------------------------------------------------------------
Iulia omnibus s.d.


Diligo eam allitterationem, quam inveni in tabula figurarum rhetoricarum; qua de causa auctor huius versus mihi ignotus est: "O Tite tute, Tati, tibi tanta, tyranne, tulisti".

Ceterum mehercule perdifficile censeo unum e tot pulcherrimis eligere versibus! Saepius vero magis contentum memini quam versus singulos, et si iterum carmen quoddam lego versus video delectorque iterum.

Est Ovidii versus qui venit mihi in mentem cum visitavi scholam meam antiquam Bertholdi Brecht Vitam Galilei theatro spectendi causa: "Veniunt spectatum, veniunt spectentur ut ipsae". Ego quoque veni spectatum, veni ut videam magistros, quod cum non sit idem, haud longe tamen abest versu illo.

Valde etiam diligo Tibulli illos versus "Quis fuit horrendos primus qui protulit enses? / Quam fere et vere ferreus ille fuit! / Tum caedes hominum, tum proelia nata, / tum brevior dirae mortis aperta via est." Quos versus primos Latina lingua legi, cum ne scivi quidem quod qualisque sit cum versus tum distichon elegicum (elegikón?) in ea lingua. Magister mihi legit hos versus at impressio mea fuit miros eos sonare...

Bene valete!



RE: Versus carissimi
--------------------------------------------------------------------------------
Nuntium misit: Marcus Favonius ® | 06.11.2003 - 23:31 | 5 | |
--------------------------------------------------------------------------------
„O Tite ...“: Ennius, annales, frg. 109 (Vahlen, ed. 3a) ;-)


RE: Versus carissimi
--------------------------------------------------------------------------------
Nuntium misit: Hialmarus | 06.11.2003 - 23:51 | 6 | |
--------------------------------------------------------------------------------
Inter pulcherrimos:

Postera nocturnos aurora removerat ignes...

-- in Aeneide, alicubi


RE: Versus carissimi
--------------------------------------------------------------------------------
Nuntium misit: Erkki Palmen | 07.11.2003 - 16:43 | 7 | |
--------------------------------------------------------------------------------
Salve, Hialmare!

Versus a te commemoratus 'Postera nocturnos aurora removerat ignes' non in Aeneide, sed apud Ovidium reperitur (Metam.4,81), in fabula celeberrima de amore inter Pyramum et Thisben orto, quorum figurae quodam modo etiam in tragoedia Shakespeariana 'Romeo et Julia' vivunt. Vale! E.P.


RE: Versus carissimi
--------------------------------------------------------------------------------
Nuntium misit: Hialmarus | 08.11.2003 - 13:55 | 8 | |
--------------------------------------------------------------------------------
Gratias magnas tibi, Erkki! Vale!


audio download
--------------------------------------------------------------------------------
Nuntium misit: - | 08.11.2003 - 15:48 | 9 | |
--------------------------------------------------------------------------------
Nuntius a re alienus deletus est.
Redactio interretialis



RE: Versus carissimi
--------------------------------------------------------------------------------
Nuntium misit: Herimannus | 09.11.2003 - 10:57 | 10 | |
--------------------------------------------------------------------------------
Herimannus poetarum amantibus sal.


Versum commemorare velim quem avunculus meus, cuius Latinae linguae studium brevis temporis fuerat, persaepe nominabat:



"...nec pudeat tenuisse bidentem"



ex Georgicorum libris extractum. Quotienscumque humilia opera mihi contigerunt, hic versus in mentem redit.

Valete.



RE: Versus carissimi
--------------------------------------------------------------------------------
Nuntium misit: Marcus | 12.11.2003 - 11:42 | 11 | |
--------------------------------------------------------------------------------
Fregnacciandus omnibus qui estis per orbem salutem plurimam dicit.


Mihi semper carissimum fuit ab adulescentia usque nunc hoc Martialis epigramma:



GAUDES PERCIDI PERCISUS PAPILE PLORAS

CUR QUE VIS FIERI PAPILE FACTA DOLES?

....



Nunc, libros epigrammaton Martialis in manibus non habens, non memini recte ubinam collocetur, sed certus sum vobis esse notissimum!!!



Valete omnes!



RE: Versus carissimi
--------------------------------------------------------------------------------
Nuntium misit: Simplicius | 14.11.2003 - 20:40 | 12 | |
--------------------------------------------------------------------------------
Ibant obscuri sola sub nocte per umbram (Aen. VI 268)


Humanae conditioni aptum mihi videtur...

Veniam peto nimiae gravitatis meae...



RE: Versus carissimi
--------------------------------------------------------------------------------
Nuntium misit: Erkki Palmen | 14.11.2003 - 23:55 | 13 | |
--------------------------------------------------------------------------------
Salve, Marce Fregnacciande!

Istud distichon tibi "carissimum" in libro quarto Martialis invenitur (4,48,1-2). In posteriore versu exscribendo modicum paragramma fecisti; scribere oportet: cur, quae (non: que!) vis fieri, Papyle, facta doles. Omitto reliquos duos eiusdem epigrammatis versus huc addere, licet item carissima tibi sint. Vale! Ericus P.


RE: Versus carissimi
--------------------------------------------------------------------------------
Nuntium misit: Herimannus | 15.11.2003 - 00:58 | 14 | |
--------------------------------------------------------------------------------
Herimannus poetarum amantibus sal.


Hanc margaritam in Petroni Satirico inveni, et communico:



"..........................Amica vincit

uxorem. Rosa cinnamum veretur.

Quicquid quaeritur, optimum videtur." (XCIII).



Valete.



RE: Versus carissimi
--------------------------------------------------------------------------------
Nuntium misit: Marcus | 19.11.2003 - 10:59 | 15 | |
--------------------------------------------------------------------------------
Fregnacciandus Erkki Palmenio salutem plurimam dicit.


Verum dicis, Henrice carissime, peccavi et veniam peto, sed ob errorem digitationis. Quid de illo epigrammate? Estne gratum tibi? Cur non legis epigrammata mea quae (-ae!!) scripsi in Nuntio electronico quod incipit: Mordacia epigrammata paederotica?



Vale.



RE: Versus carissimi
--------------------------------------------------------------------------------
Nuntium misit: Erkki Palmen | 19.11.2003 - 13:57 | 16 | |
--------------------------------------------------------------------------------


Ericus Palmén Fregnacciando s.p.d.

Quis tibi dixit me epigrammata a te commemorata non legisse? Immo cotidie omnes nuntios in aream nostram venientes legere soleo. Omnia Latina quodam modo mihi grata sunt – haud pauca illo ipso epigrammate Martialis gratiora! Vale!




RE: Versus carissimi
--------------------------------------------------------------------------------
Nuntium misit: Marcus | 20.11.2003 - 11:33 | 17 | |
--------------------------------------------------------------------------------
Marcus Fregnacciandus Erico Palmenio salutem.


Erice carissime, magno cum gaudio accipio te legisse epigrammata mea, sed scire velim, quaeso, quid tibi visum sit de illis. Ea aestimas flocci? aut tibi videntur aliquid valere et ,maxime, tibi risui fuerunt?

Id spero.

Censeo Catullum qui scripsit "Paedicabo ego vos et irrumabo" et caetera similia multo pluris esse quam qui "Odi e t amo" et "Vivamus atque amemus". Saepe in scholis solum castigatum et castratum Catullum magistri curant ut discipuli sui legant. Hoc mihi non placet.

Vale!!



RE: Versus carissimi
--------------------------------------------------------------------------------
Nuntium misit: Marcus Favonius ® | 21.11.2003 - 23:41 | 18 | |
--------------------------------------------------------------------------------
Ne vox mulieris in auctorum choro Latinorum neglegatur, tandem audientia fiat aliquando Sulpiciae poetridis, cuius elegidia corpori Tibulliano adiuncta sunt (III 13 – 18 = IV 7 – 12).

Carmina amatoria sunt, brevia, tenera, verecunda. Ecce carmen IV 12:

„Ne tibi sim, mea lux, aeque iam fervida cura

ac videor paucos ante fuisse dies,

si quicquam tota commisi stulta iuventa

cuius me fatear paenituisse magis,

hesterna quam te solum quod nocte reliqui,

ardorem cupiens dissimulare meum.“

Versus sane apti ad permovendum animum...
Area Latina
 
Nuntii: 106
Nomen dedit: Lun 01 Mart, 2004 20.14

Return to Litterae Latinae

Qui adsunt

Users browsing this forum: Google [Bot] and 1 guest

cron