YLE Colloquia Latina

De rationibus linguae Latinae docendae in mundo
--------------------------------------------------------------------------------
Nuntium misit: Mercurius Hungaricus ® | 07.11.2003 - 10:24 | |
--------------------------------------------------------------------------------
Numero visitantium ex variis gentibus oriundorum in diem aucto tandem meam quaestionem ut proponam, occasionem praeberi existimo; scire etenim velim, quo modo quibusque rationibus apud vos singulos sermo noster Latinus doceatur; qui auctores quotque textuum in secundariis scholis ac in universtitabus legi debeantur; qualia sint seminaria, lectiones, examinationesque; quo denique modo muneris professorii* candidati erudiantur. Una lingua, variae methodi. Sed quales methodi? Responsum date! (Hor.)

*in scholis secundariis


RE: De rationibus linguae Latinae docendae in mundo
--------------------------------------------------------------------------------
Nuntium misit: Marcus Favonius ® | 08.11.2003 - 00:13 | 1 | |
--------------------------------------------------------------------------------
M. Favonius cum omnibus linguae Latinae studiosis, tum praecipue Mercurio Hungarico s.
Ne in tot tantisque rebus exponendis explicandisque modum excedam, me haec sinite praefari: Germaniam omnem scitote confoederationem esse sedecim civitatum, quae institutis ad cultum civilem pertinentibus inter se differunt: Quot civitates, tot erudiendi praecepta. Qua de re certi constituendi mihi sunt termini: nihil aliud igitur explicaturus sum nisi perpauca ex sescentis iis praeceptis, quae in Rhenania Septentrionali Guestfaliaque in Latine docendum posita sunt, eaque scilicet summatim.
Quid ergo? Ecce nonnullae FAQ , i. e. frequenter allatae quaestiones .
1. Omnesne Latine discere coguntur discipuli, qui scholas quae dicuntur secundarias (gymnasia) frequentant? Minime coguntur; optio iis datur, utrum Latine discere velint necne.
2. Per quot annos discipuli linguae Latinae studere debent, ut prospere eos Latine didicisse testimonio confirmetur? Vel tres annos (cl. XI – XIII) vel quattuor (cl. IX – XII) vel quinque (cl. VII – XI) vel sex (cl. V – X). Plerique autem per quinque annos Latine discunt.
3. Quid praeceptores et praeceptrices sibi proponunt? Efficere volunt, ut discipuli textus Latinos Germanice reddere convenienterque interpretari sciant.
4. Qui auctores leguntur? Quae themata tractantur? In classe X: Phaedrus / Nepos (Hannibal) vel Plinius minor / Caesar (de bello Helvetico, de Gallorum Germanorumque moribus) / Catullus vel Martialis. In cl. XI: Ovidius (Metamorphoses) / Plinius minor vel Seneca (epistulae morales).
In cl. XII – cl. XIII (i. e. quattuor spatia semestria): Cum auctoris, tum etiam thematis semestris eligendi optio praeceptori vel praeceptrici data est. Ecce themata auctoresque: (1) Lectio carminum: Horatius / Vergilius / Tibullus / Propertius / Catullus / Martialis / Iuvenalis. (2) De arte oratoria: Cicero / Tacitus / Quintilianus. (3) De rerum gestarum historia: Livius / Sallustius / Tacitus / Nepos / Augustinus. (4) De re publica: Cicero / Caesar / Augustus / Augustinus / Thomas Morus / Erasmus / Thomas Hobbes / Horatius / Tacitus / / Accedere ad rem publicam: Cicero / Catullus / Lucretius / Seneca. (5) De philosophia et religione: Cicero / Lucretius / Horatius / Seneca. (6) De vita Romana cottidiana: Plinius / Petronius / Seneca / Minucius Felix / Catullus / Horatius / Martialis. (7) De medii recentiorisque aevi auctoribus: Abaelardus / Erasmus / Christophorus Columbus &c. Sed satis iam de hoc. Venit nox... Equidem, quaecumque in hac epistula desiderentur, ea suppletum emendatum correctum iri spero. Valete quam optime. VII Id. Nov. Ex Rhenania inferiore.




RE: De rationibus linguae Latinae docendae in mundo
--------------------------------------------------------------------------------
Nuntium misit: Iulia | 08.11.2003 - 12:58 | 2 | |
--------------------------------------------------------------------------------
Iulia Marco Mercurioque s.

Vivo in alia Germaniae civitate, in Saxonia Inferiore , sed pleraque sumt similia iis, quae Marcus disseruit. Tamen quaero ex te, Marce: Apud vos discipuli, qui in classe VII coeperunt, "parvo latino" confirmantur classe XI prospere finita? Apud nos iam post classem X id testimonium accipiunt.
Ad auctores Marco Favonio tam diserte enumeratos unum adiciam: nostrorum praeceptorum quidam legit cum omnibus classibus suis Einhardi Vitam Caroli Magni.
Valete quam optime. VI Id. Nov. E Saxonia Inferiore.


RE: De rationibus linguae Latinae docendae in mundo
--------------------------------------------------------------------------------
Nuntium misit: Marcus Favonius ® | 08.11.2003 - 16:05 | 3 | |
--------------------------------------------------------------------------------
Marcus Iuliae aliisque Latine docendi sociis s.p.d.
Gratias tibi, Iulia, ago maximas pro epistula tua.
Quod ad duo illa testimonia sive diplomata, quorum alteri nomen est „Latino“, alteri „Parvo Latino“, attinet, inter nostra decreta et vestra nihil videtur interesse. Tamen hoc addendum est: Parvum Latinum nostrum nulla alia in civitate valet nisi in Rhenania Septentrionali Guestfaliaque.
Nunc ad Einhardi Vitam Caroli Magni: Libellus sane dignus est, qui in librorum numerum legendorum referendus sit (cf. thema septimum). Valete quam optime.



RE: De rationibus linguae Latinae docendae in mundo
--------------------------------------------------------------------------------
Nuntium misit: Mercurius Hungaricus ® | 10.11.2003 - 11:25 | 4 | |
--------------------------------------------------------------------------------
Mercurius omnibus, praecipue autem sociis suis duobus Germanis sibi carissimis, Iuliae ac Marco Favonio s. d.

Etsi haec grex colloquialis a me sit creata, collegae mihi amatissimi, tamen Marcus dignior esse videtur, qui auctor huius gregis nominetur, cum ille cathecismo suo aptissimo confecto solida ei ac firmissima fundamenta iecit. quod haud cum invidia, sed maximo cum solatio ac gaudio accepi, immo et ipse, quibus methodis apud nos, i. e. in Hungaria lingua Latina doceatur, normam a Marco traditam sequendo vobis, si vacabo, ostendam. Nunc autem et negotia quotidiana me a plura scribendo retinent, et multo magis iuvat de eis, quae mihi scripseritis, sciscitari, quam de eo, quod iam novi, disserere...
1.) Miror equidem, quam plurimi auctores apud vos in scholis secundariis legantur; scire autem velim, quot carmina e. g. Horatii aut quot versus Aeneidis discipulis praeparanda ac convertenda sint? Simplicius:): utrum magna copia textuum eis legenda, an non?
2.) Marce, themata a te descripta ac demonstrata utrum vere ita in libris scholasticis composita, an solum a te haec themata creata? ac utrum themata eo ordine, in quo ea descripseris, sequantur?
3.) Num magistri apud vos exercitationibus ad retroversionem spectantibus utantur?
4.) Quae est indoles examinationum "Latini" ac "parvi Latini"?
5.) Utrum multi discipuli apud vos Latine discere velint (aut saltem eorum parentes, ut illi discant), an magis ut linguam quasi mortuam (quod ridiculum sit!) respuent et despiciant? In quot centesimis scholarum lingua nostra in Germania doeatur?

Hae sunt quaestiones, carissimi sodales, quae nunc in mentem mihi inciderunt; sed multo plura esse scitote, quas tibi in futuro proponere velim. Nihil autem nunc restat, quam ut vobis valedicam ac responsa vestra exspectem. Ex Pann. Inf. IV. Id. Nov.



RE: De rationibus linguae Latinae docendae in mundo
--------------------------------------------------------------------------------
Nuntium misit: Mercurius Hungaricus ® | 10.11.2003 - 15:35 | 5 | |
--------------------------------------------------------------------------------
Mercurius omnibus s. d.

VISITATORES NOVI carisimmi!

Si velitis, et meis, et Marci quaestionibus - excepta mea 4. - respondere potestis, quod mihi gratissimum incidet! Valete.


RE: De rationibus linguae Latinae docendae in mundo
--------------------------------------------------------------------------------
Nuntium misit: Marcus Favonius ® | 10.11.2003 - 20:04 | 6 | |
--------------------------------------------------------------------------------
Marcus Mercurio suo s.
His ipsis diebus cum plurimis officii oneribus opprimar, oro atque obsecro te, ut ‚stes indutum loricam patientiae’ (cf. Eph. 6, 14): quam maturrime possum, ad te rescribam. Vale.



RE: De rationibus linguae Latinae docendae in mundo
--------------------------------------------------------------------------------
Nuntium misit: Iulia | 10.11.2003 - 22:10 | 7 | |
--------------------------------------------------------------------------------
Iulia omnibus, sed praecipue Mercurio suo s.p.d.

Primum: "parvum Latinum", "Latinum" et "magnum Latinum" testimonia sunt, quibus discipulorum scientia linguae Latinae affirmatur. Quae testimonia assequuntur post classem X (parvum L.) , XI (L.) vel XII (magnum L.) discipuli, qui in classe V vel VII coeperunt latinitatis studium, et post cl. XII (p. L.) vel XIII (L. vel, cum examine addito, magnum Latinum), qui in classe IX coeperunt. Sunt testimonia similia in lingua Graeca (Graecum) et Hebraica (Hebraicum), quae etiam universitate assequi potest. Iis tesimoniis opus est, si linguis aliquis aliisve artibus universtitate studere volunt.

Deinde: Usque ad classem XI discipuli libros legunt a magistris electos. Qui auctores plerisque in casibus sunt ex iis, qui Marcus noster nominavit, sed certe non omnes leguntur. Ego quidem legi Caesaris bellum gallicum sane accurate, i.e. totum fere primum librum, transitus in Britanniam Germaniamque et capitula de Germanorum moribus atque de animalibus istis, ceterum Plinii minoris epistulas ambas de eruptione Vesuvii et unam de Christianis, denique unas narrationes Ovidii Metamorphosum, scilicet de aetatibus mundi, de Philemone et Baucide, Nioben, agricolas Lycios. Pro semestribus quattuor de classibus XII et XIII praeceptores deligunt themata plerumque ex a Marce enumeratis. Ad ea themata optant quosdam ex auctoribus de ea re scribentibus, sed recte susciparis non omnia ex iis leguntur. Quae Marcus enumeravit sunt nisi auctores plurimum in classibus lectos.
Hoc est status rerum praesens in mea civitate. Non certe scio an in Rhenania Septentrionali Guestfalia Abiturum (i. e. examen quo ad universitatem admittuntur) centrale (i.e. non a praeceptoribus, sed a civitate allatum) habeant necne. In Saxonia Inferiore introducitur anno 2006. Haud dubito tum canon aliquod introductum fore.

Tertium: Numquam audivi hodie discipulos debere in linguam Latinam convertere; si tamen faciunt sua sponte (e.g. Iulia quaedam...)

Spero ea quaestiones tuas respondere. Nunc curiosissima sum de rationibis linguam Latinam docendi in Pannonia aliisque terris!

Valete omnes. Ex Saxonia Inferiore VI Id.Nov.


RE: De rationibus linguae Latinae docendae in mundo
--------------------------------------------------------------------------------
Nuntium misit: Mercurius Hungaricus ® | 12.11.2003 - 11:44 | 8 | |
--------------------------------------------------------------------------------
Mercurius omnibus, specialiter autem Iuliae s. d.

Gratias tibi, carissima amica, pro tuis litteris Germanica accuratione compositis. Equidem quid "Latinum" et cetera sibi velint iam video (illa supplenda quodam verbo esse crediderim - testimonium? examen?), et tuis litteris etiam de operibus, quae in scholis leguntur, abunde informatus sum. Ceterum ratio Hungarica, quo ad opera legenda attinet, non multum a Germanica differre videtur, excepto, quod apud nos non ea partes commentariorum Caesaris tractantur, ubi de moribus Germanorum narratur, sed ubi de Gallorum moribus religioneque, quod autem haud admirandum puto. Plinii epistolam de Vesuvio erupto et discipuli Hungarici convertunt, sed ubi de Christianis agitur - quae epistola mihi magnopere placet - omissa est e libris ad usum scholarum concinnatis. Cuius negligentiae causa nescio an antiquitas illorum librorum sit, qui adhuc in tempore communismi compositi sunt, in ea aetate, quando de Christianitate loqui aut scribere haud licuit, id est: "nihil nisi malum". Qua re fit, ut etiam Augustinum frustra in istis libris quaereres. Novi ergo libri scholis nostris concinnandi, cum iam nihil causae sit, cur opera de Christianis aut a Christianis scripta ex iis libris excludantur.


RE: De rationibus linguae Latinae docendae in mundo
--------------------------------------------------------------------------------
Nuntium misit: Marcus Favonius ® | 12.11.2003 - 22:01 | 9 | |
--------------------------------------------------------------------------------
Marcus Iuliae, Mercurio ceterisque Latinistis s.d.p.
Quaestiones a te, mi Mercuri, institutae tanti sunt momenti, ut plures epistulas scribi oportere videatur.
Primum omnium maximas ago gratias pro Iuliae Mercuriique epistulis a.d. IV. Id. Nov. datis, quae valde probatae mihi sunt; inter decreta enim, Iulia carissima, quae in Saxonia Inferiore de Latine docendo facta sunt, et ea, quae in Rhenania Septentrionali Guestfaliaque valent, quid intersit, plane nescio. Deinde novis illis quaestionibus a te, spectatissime collega, argute propositis non mediocriter delectatus sum.
Sed in praesenti cum plurimis officii muneribus, ut iam scripsi, occupatus sim, veniam vos oro mihi detis, si non ad omnia interrogata respondero. Quod vero ad quaestionem secundam, hoc est ad themata eorumque ordinem pertinet, haec summatim (v. Iuliae epistulam): cum auctores, tum themata, quae ad cl. XI, XII, XIII pertinent, a magistratibus ita decreta sunt, ut maxima nobis potestas data sit eligendi, quae themata tractanda sint et quo ordine, qui auctores legendi sint et quae opera, quibus libris uti oporteat &c.
Quod denique ad quintam quaestionem attinet, spero hanc satis vobis fore centesimarum portionem, ex qua apparet, quot discipuli discipulaeque hoc ipso anno in universo nostro gymnasio Latine discant: 45 fere %. In classe VII Latine discere coeperunt 40,2 %, in classe IX 18,9 %, qua in classe discipulis, qui in classe VII Francogallice discere coeperunt, facultas datur Latine quoque discendi. Ceterum in omnibus nostrae civitatis gymnasiis Latine docetur.
Ad cetera autem, quam maturrime fieri poterit, respondebo. Interim oro vos ‚stetis induti loricam patientiae’. Spes enim nostra: „Finis coronat opus.“ Valete quam optime. Pr. Id. Nov.



RE: De rationibus linguae Latinae docendae in mundo
--------------------------------------------------------------------------------
Nuntium misit: Mercurius Hungaricus ® | 13.11.2003 - 14:01 | 10 | |
--------------------------------------------------------------------------------
Mercurius omnibus, praecipue Marco suo s. d.

E tuis verbis, carissime collega, coniectare licet magnam libertatem magistris Germanicis praebitam esse in docenda lingua Latina; tamen, ut poeta dicit, "est modus in rebus, sunt certi denique fines"; id est, textus clarissimos, ut e. g. caput I. Annalium C. Taciti, aut versus I-LIV. carminis primi Aeneidis, etiam in Germania omnibus discipulis cognoscendos ac legendos esse putaverim. Qui sint hi textus apud vos, mihi ut explanetis velim. Valete. Ex Pann. Inf. Id. Nov.




RE: De rationibus linguae Latinae docendae in mundo
--------------------------------------------------------------------------------
Nuntium misit: brasilianus | 13.11.2003 - 14:15 | 11 | |
--------------------------------------------------------------------------------
In Brasili latina lingua non docetur in scholis: spero ut dicturum esse!


RE: De rationibus linguae Latinae docendae in mundo
--------------------------------------------------------------------------------
Nuntium misit: marcus ieremus | 13.11.2003 - 14:29 | 12 | |
--------------------------------------------------------------------------------
In francia, lingua latina in modus littero docetur ergo loqui lingua latina simpliciter dificile est . Praetera sine dubio culpae in hoc scriptum sunt !


RE: De rationibus linguae Latinae docendae in mundo
--------------------------------------------------------------------------------
Nuntium misit: Mercurius Hungaricus ® | 14.11.2003 - 10:23 | 13 | |
--------------------------------------------------------------------------------
Mercurius Hungaricus Brasiliano ac Marco Ieremo s. p. d.

Credere vix possum, brasiliane, in tua patria linguam Latinam exsilii damnatam esse; sunt enim apud vos, nisi fallor, scholae ab ecclesia catholica (rectius a societate Iesu) possessae, ubi sermo noster sine dubio docetur. Ceterum linguam Latinam omnibus discipulis in Brasilia discendam esse censeo, cum vestram linguam Lusitanam Latinae filiam esse constat. Vale.

Equidem non solum in Francia, carissime Marce, ita se res habent, sed fere in toto mundo. Tempora, cum in schola discipulis nonnisi Latine loqui liceret, iam praeteriverunt; nunc enim magistri nebulones in Latine loquendo exercere prorsus desiverunt. Quae cum ita sint, nobis ipsis nostra peritia si non in loquendo, saltem in scribendo Latine erudienda est; cui hic, in colloquiis Latinis occasio praeclara offertur. Vale.

PS: Magister quidam in Hungaria in classe sua Latina 'lupos' (qui ante lectionem, qui e classe absint, referre, tabulam abstergere, cretam petere etc. debent) Latine referre absentes docuit, quod ita sonatur:

"Domine magister, tibi refero neminem abesse."

aut:

"Domine magister, refero tibi Petrum Kovács ac Claudiam Szabó abesse."

Quam rationem ego valde approbo, cum ea in Latine colloquendo discipluos quamvis minime exerceat.

Valete.


RE: De rationibus linguae Latinae docendae in mundo
--------------------------------------------------------------------------------
Nuntium misit: Gastón - latine incipiens | 14.11.2003 - 11:54 | 14 | |
--------------------------------------------------------------------------------
In Argentina item lingua Latina non docetur in scholis publicis sed docebatur! Multi "praeclari paedagogi" in mea terra censent linguam Latinam docere inutile esse atque discipulos tantum linguam Anglicam scientiamque computatraliam studere debere.

Nunc etenim plurimi lingua Hispana bene uti non posssunt. Multum difficile est nonnullis amicis meis aliquam historiam narrare in sua propria lingua.



RE: De rationibus linguae Latinae docendae in mundo
--------------------------------------------------------------------------------
Nuntium misit: Mercurius Hungaricus ® | 14.11.2003 - 14:22 | 15 | |
--------------------------------------------------------------------------------
Mercurius omnibus s. d.

Nunciis Brasiliani ac Gastónis perlectis linguae Latinae docendae conditiones in America meridionali iniquissimas esse non sine dolore maximo video; sed adhuc spes mihi est scholas ecclesiasticas et ibi asylo sermoni Ciceronis esse. Valete.


RE: De rationibus linguae Latinae docendae in mundo
--------------------------------------------------------------------------------
Nuntium misit: Iulia | 14.11.2003 - 18:58 | 16 | |
--------------------------------------------------------------------------------
Iulia omnibus, praecipue autem Mercurio suo Hungarico s.

In Germania discipuli (vel parentes eorum) decernunt utrum Latinam discere velint linguam an non. Ergo praeceptores ac maiores discipuli Latinam linguam discentes novos persuadere conantur ad linguam discendum Latinam. Sunt dies apertae portae, ubi - ut illi, qui Anglicae vel Francogallicae student linguae - saepe fabulam quandam dant, eamque scilicet in lingua Latina. Ego quidem bis vel ter fabulam vidi de Theseo Minotauroque.
Sed id persaepe singula est occasio, in qua vere latine loquuntur.

Soror mea linguae Latinae ignorans conabatur legere litteras meas: Intellexit verba "Germania" ac "parentes"...
Valete. a.d. XVIII Kal. Dec. Ex Saxonia Inferiore.


RE: De rationibus linguae Latinae docendae in mundo
--------------------------------------------------------------------------------
Nuntium misit: Marcus Favonius ® | 14.11.2003 - 19:01 | 17 | |
--------------------------------------------------------------------------------
Salvete, quotquot estis, una salute omnes.
Ecce inscriptio interretialis, qua usos vos intellecturos esse spero, quomodo Latinitas colatur in Germania: http://www.lateinforum.de/
XVIII Kal. Dec. Ex Germania inferiore.



RE: De rationibus linguae Latinae docendae in mundo
--------------------------------------------------------------------------------
Nuntium misit: Marcus Favonius ® | 14.11.2003 - 20:54 | 18 | |
--------------------------------------------------------------------------------
M. Favonius cum omnibus Latine doctis, tum praecipue Iuliae sal.
Fabulas Latinas edere...: Rem execellentissimam – pro di immortales – nobis proposuisti, Iulia, eandemque dignissimam, quam imitemur. Sed et alia multa sunt, quibus discipulorum animi incitentur ad Latine discendum. Equidem excursionibus quoque eorum impetum contineri et constitui posse pro certo habeo. Ut exemplis utar, quae ad nostras res Germanicas pertinent: visenda sunt multa in Germania inferiore: Castra Vetera, Colonia Ulpia Traiana (quam magistratus restituendam curant), Colonia Agrippina (museum Romano-Germanicum), Bonna (museum archaeologicum, in quo lapis ille clarissimus est memoriae M. Caelii centurionis inscriptus, qui „occidit bello Variano“) &c. -Legite modo Tacitum!- Neque saltum Teutoburgiensem, ubi Varus cladem illam atrocissimam accepit, praetermittendum esse censeo; locus enim pugnae ante nonnullos annos a centurione Britannico sive Anglico repertus est (cf. etiam initium colloquii, quod inscribitur „Ubi Varus cladem acceperit“). Sed de hoc satis. Valete quam optime.



RE: De rationibus linguae Latinae docendae in mundo
--------------------------------------------------------------------------------
Nuntium misit: Marcus Favonius ® | 16.11.2003 - 16:10 | 19 | |
--------------------------------------------------------------------------------
M. Favonius cum omnibus sociis litterarum Latinarum peritis, tum praecipue Mecurio suo Hungarico sal.
Quod ad nuntium tuum decimum attinet, mi Mercuri, non est index („canon“) textuum legendorum, quo optio omnino nobis adimatur eligendi. Itaque nonnullos tibi textus proponam, quos praeteritis annis cum discipulis interpretatus sum. Tractati sunt loci electi ex his auctoribus:
ex Ovidii metamorphoseon libris (de Pyramo et Thisbe, de Europa, de Daedalo et Icaro, de Apolline et Daphne) - in classe XI.I - ;
ex Plinii epistularum libris (imprimis de Vesuvio eructante) - in classe XI.II - ;
ex Ciceronis de re publica libris - in classe XII.I - ;
ex Vergilii Aeneidos libris (imprimis de Aenea et Dido) - in classe XII.II - ;
ex Senecae epistularum moralium libris - in classe XIII.I -.
Sunt collegae, iique historici, qui Senecae Tacitum anteponant. Ceterum variationem delectare memento. Valete quam optime.



RE: De rationibus linguae Latinae docendae in mundo
--------------------------------------------------------------------------------
Nuntium misit: Simplicius | 16.11.2003 - 21:34 | 20 | |
--------------------------------------------------------------------------------
Simplicius Latinae linguae
In Italia discipuli (vel eorum parentes) cursum studiorum, non singulas disciplinas decernunt. Hoc, ut mihi videtur, facit ut nonnumquam - ut non dicam saepe - discipuli tolerent (vel fastidiant?) studium huius linguae, quae mortua (vel potius - ut ego saepe dico - occisa) appellatur, plus quam ament. Lingua latina docetur in scholis quae Lycaei dicuntur, per quinque annos (breve temporis spatium... ad hoc dici potest: vita brevis, ars longa). Tria sunt genera lycaeorum: in eo qui dicitur 'classicus' lingua quoque Graeca antiqua docetur.
Suspicabar - nunc certus sum - Germaniam aliasque Europae regiones Latinam linguam pluris quam cunae eius, Italia, ducere.



RE: De rationibus linguae Latinae docendae in mundo
--------------------------------------------------------------------------------
Nuntium misit: Mercurius Hungaricus ® | 17.11.2003 - 11:18 | 21 | |
--------------------------------------------------------------------------------
"et dicebat eis Iesus quia non est propheta sine honore nisi in patria sua et in cognatione sua et in domo sua" (Marc. 6,4.)

Mercurius Simplicio s. d.

Ecce recte dicit Dominus noster nullum prophetam in patria sua acceptum esse: ita linguam Latinam non equidem matrem, nonnisi novercam Italianae haberi ex epistola tua edoctus sum. Audivi autem in certaminibus internationalibus linguae Latinae Italianos discipulos saepissime victores evadere, praecipue in eis certaminibus, in quibus Latine scribendum est. Cuius rei causa sine dubio partim ab eo repetenda est, quod in Italia paene omnes discipuli Latinam discere obligantur; ita ex 'lege magnorum numerorum' plures sunt, qui ad altissima fastigia linguae Latinae evehantur. Sed procul sit, ut hanc causam unicam esse victoriarum Italianarum credam! Quae sint ceterae causae, mihi ut explices velim. Vale. Ex Pann. Inf. d. XV. Kal. Dec.


RE: De rationibus linguae Latinae docendae in mundo
--------------------------------------------------------------------------------
Nuntium misit: Mercurius Hungaricus ® | 17.11.2003 - 12:56 | 22 | |
--------------------------------------------------------------------------------
Mercurius Marco ac Iuliae s. d.

Gratias pro vestris litteris. Iulia, idea fabulae Latine dictae et mihi valde placet: en ego fabulam de Mucio Scaevola cum discipulis meis produxi, sed in lingua vernacula.
Marce, si omnia ita sunt, ut scripsisti, num discipuli Germani studia sua Latina conficere possunt, e. g. ex Annalibus Taciti ne ulla quidem littera perlecta?? Et quaenam opera legi debent ad examina "Latina" feliciter superanda? Valete. Eodem die ut supra.


RE: De rationibus linguae Latinae docendae in mundo
--------------------------------------------------------------------------------
Nuntium misit: Iulia | 17.11.2003 - 17:02 | 23 | |
--------------------------------------------------------------------------------
Iulia Mercurio Marcoque s. p. d.

Putavi et alios magistri fabulas Latinas edere discipulos ad Latinae studere linguae persuadendi causa... Tamen valde gaudeo fabulas Latinas vos tam delectare.
Mercuri, recte suspicas: Omnes discipuli, qui e.g. classem X feliciter superant, "Latino" affirmantur eos doctos esse in lingua Latina. Non iis opus est seperatim examina scribere. Ergo ad "Latina" assequendum modo iis legenda sunt ea, quae praeceptores tractant. Igitur si praeceptor quidam non amat Tacitum, discipuli non legunt ullam litteram Annalium eius.
Tamen omnes discipuli, qui "parvum Latinum" assecuti sunt, quodam tempore Caesarem tractaverunt; qui "Latino" vel "magno Latino"affirmati sunt, plerumque eadem fere legerunt, quae Marcus in nuntio XIX suo eumeravit.
Sed nunc sum curiosa: Quae sunt tractanda in Pannonia, et quibus magistri est optare? Valete quam optime. a. d. XV Kal. Dec. Ex Saxonia Inferiore.


RE: De rationibus linguae Latinae docendae in mundo
--------------------------------------------------------------------------------
Nuntium misit: Simplicius | 17.11.2003 - 21:06 | 24 | |
--------------------------------------------------------------------------------
Simplicius Mercurio s.d.
Recte dicis, puto, cum de 'lege magnorum numerorum' loqueris, sed ad hoc alia adiungere velim quibus cum tuis quaestionibus melius satisfaciam tum clarius sententiam meam pandam.
Dicendum est Italicam linguam propiorem esse antiquae Romanae linguae et hoc discipulos in Latine scribendo adiuvare posse; dicendum insuper est variae esse scholas et varios gradus ad quos discipuli perveniunt. Discipuli optimi inveniuntur - et qui radices dulcis Italicae linguae ament -, sed, ut dixi, saepe inter alios qui inutile ut Latine discant se operam dare iudicant. Si lingua Latina a discipulis eligatur, hoc non accidat. (Si opinio communis - et hoc ad gubernatores nostros tendit, qui semper Anglicae linguae studium promovent et in concilia cum aliarum nationum praesidibus de Romolo et Remolo (sic!) loquuntur...- non inutile studium antiquitatis exsistimaret, iuvenes quoque ei aliquid ponderis tribuerent)
Maiors pars discipulorum, quinque annis hoc studio deditis, paucas lineas (13, 14) auctorum Romanorum (Senecae, Ciceronis, Livii...) duabus horis in Italicam linguam vertunt. Quid accidit in scholis vestris? Alia vellem scribere, sec 'fugit irreparabile tempus'...
Vale.



RE: De rationibus linguae Latinae docendae in mundo
--------------------------------------------------------------------------------
Nuntium misit: Marcus Favonius ® | 18.11.2003 - 08:31 | 25 | |
--------------------------------------------------------------------------------
Marcus Mercurio suo sal.
Quod ad nostram Latine docendi rationem attinet, censeo addenda esse tria. Ac primum quidem multum interest, quot singulis hebdomadibus horas in classibus XI, XII, XIII discipuli Latine discant: quorum alteri - maior est pars - cursus fundamentales transcurrunt (3 x 45 minuta), alteri speciales (5 sive 6 x 45 minuta). Cuius rei in thematibus eligendis et auctoribus rationem habendam esse apparet. Deinde Taciti legendi nullam nobis impositam esse necessitatem iure suspicatus es. Postremo non fiunt in gymnasiis nostris examina quae vocantur Latina: quicumque enim in classe XI sive XII litteris Latinis prospero eventu studuerit, is Latinum quod dicitur meritum accipiet praemium. Equidem multa ex his in controversiam vocari posse scio. Vale quam optime. XIV Kal. Dec. Ex Rhenania Septentrionali.



RE: De rationibus linguae Latinae docendae in mundo
--------------------------------------------------------------------------------
Nuntium misit: Mercurius Hungaricus ® | 18.11.2003 - 15:00 | 26 | |
--------------------------------------------------------------------------------
Mercurius Iuliae, Simplicio ac Marco s. p. d.

Cum plura scribere non possim, una eademque epistola vobis respondebo. Video etenim vos omnes scire velle, quo modo quibusque regulis in Pannonia vel rectius in Hungaria sermo Latinus doceatur; quod libenter vobis nunc demonstrarem, nisi negotia mea plurima diutius me hic morari vetarent. Cras autem, si valebo, quod di faxint, omnia bene ac accurate vobis referam.
Iulia, equidem iam intellegere mihi videor, quo modo generaliter se res habeant in gymnasiis Germanicis; pro qua tibi ac Marco gratias debitas ago. Nunc autem, qualia opera legere, quidque scire debeant ei, qui in universitate classicam philogiam tractare velint, id est, qualia sint examina, quibus feliciter superatis candidati in universitatem admittantur, a vobis sciscitari velim.
Simplicii, tuam epistolam haud laetam tanto dolore legebam, quanto eam scripsisse videris. Cum equidem de ruditia virorum in rebus publicis versantium, qui "Romolo et Remolo" dicunt legerem, nescivi mehercle, utrum mihi ridendum aut flendum esset. Nunc vero etiam a te interrogare velim, quid discipulis Italicis discendum est, si in universitatem admitti velint.
Marce, equidem miror apud vos res sic libere, ne dicam tanta cum licentia administrari; in Hungaria enim paene ab omnibus claris auctoribus paullulum carpimus. Nec libertas tanta magistris ad textus eligendos data est; sed de his omnibus cras fusius. Iam valete. Ex Pannonia Inferiore d. XIV. Kal. Dec.



RE: De rationibus linguae Latinae docendae in mundo
--------------------------------------------------------------------------------
Nuntium misit: Simplicius | 19.11.2003 - 00:06 | 27 | |
--------------------------------------------------------------------------------
Simplicius Mercurio s.p.d.
Pauca verba:
1. Crede mihi, melius est ridere quam flere (cum audivi Berlusconem talia -et alia pariter ridicula quae nunc non memini - dicentem, risi)
2. Ad humanitatis studia gradus universitarii accedendum in omnibus athenaeis (notitia saltem mea) admissionis examinatio non requiritur: oves et boves intrant...
3. Mihi accidit, praesertim his temporibus bellicis berlusconianisque (liceat semel macheronizare), ut multa, si non omnia, in deterius deferam. Manet quod Latina lingua mihi videtur pluris existimata aliis locis ac Italia. Nonne Finnico sito nunc utor?


RE: De rationibus linguae Latinae docendae in mundo
--------------------------------------------------------------------------------
Nuntium misit: Simplicius | 19.11.2003 - 00:08 | 28 | |
--------------------------------------------------------------------------------
Errata corrige (ah, damna Italicae scholae )
Ad accedendum ad ...


RE: De rationibus linguae Latinae docendae in mundo
--------------------------------------------------------------------------------
Nuntium misit: A | 19.11.2003 - 23:29 | 29 | |
--------------------------------------------------------------------------------
Vos admiror: Potestis scribere sine operis?? Vel est solum res discendi?


RE: De rationibus linguae Latinae docendae in mundo
--------------------------------------------------------------------------------
Nuntium misit: A | 19.11.2003 - 23:29 | 30 | |
--------------------------------------------------------------------------------
Corrigo - scribere Latine!

Marcus Favonius Mercurio Hungarico ceterisque sodalibus s.

De Latinitate Russica quid noverim, ex me quaeris, mi Mercuri. Non ita multum..., sed duae res memoratu dignae esse mihi videntur. Quarum altera est „Gymnasium Classicum Petropolitanum“: Docetur Latine et Graece, idque usque ad maturitatis experimentum! Docentur artes quoque mathematicae etc., ne in uno artium genere discipuli discipulaeque erudiantur. Editur etiam commentarius periodicus sane illustris, qui inscribitur „Abaris“...

Altera res liber est, qui inscribitur „По­латыни между прочим / Словарь латинскиx выражeний“ (id est „Latine per occasionem / Index locutionum Latinarum“). Editus est Moscoviae a. 1992, pp. 230 (ISBN 5-7196-0212-7). Ne plura scribam, legite modo haec: „Omnia mea mecum porto ОМНИА МЭА МЭКУМ ПОРТО. Все мое ному с собой. Цицерон ...“, deinde locutio accurate illustratur atque explanatur.

Sed satis iam verborum est.

Optime scripsisti, Mercuri: „certe dolendum est adhuc neminem Russicorum latinistarum Colloquia adiise“.

Utinam mox quam plurimarum gentium cives in colloquia nostra veniant!

Valete.

x Kal. Apr. a. mmiv.

Michel Egidius Valentinus omnibus latinophilis et Antiquitatis amantibus.

Ego sum scholasticus classicarum litterarum in Aquarum sextarum (Aix-en-Provence) in Gallia narbonnensi. In « gymnasio » per quinque annos didici sed tamen Latina vel Graeca lingua Gallice reddere etiam dificilissimum est. Non loquar quo modo in gymnasio hodie discetur sed in universita. Sunt efficienter non multae latini (et graeci) sermonis horae. Quo semestro spatio quoque septem dierum spatio latinarum litterarum quinque horae et graecarum tam mihi sunt. Quam multum!!!!! At sunt quoque quattuor gallicarum litterarum horae et quattuor antiquae historiae.
Latini autem sermonis horae distribuntur hoc modo. Duae horae magnorum auctorum operorum lectionis, quae Ciceronis sermo pro Archia poeta et Senecae Tragoedia Thyestes. Una hora qua e latina lingua in gallicam linguam vertere docemur et denique duae horae qua latina lingua gallice reddere docemur. Quae res de graeca lingua similis est nisi quod unum textum qui Odysseae carmen X est legemus.
Quod cum ita sit nonnullos paulos progressus feci.

Valete

Massiliae, a. d. VII Kalendas Maias MMIV.

Mercurius Michaeli s. d.

Gratias pro tuis litteris, in quibus lingua latina ac Graeca quomodo in universitatibus Gallicis doceantur, diligenter explicavisti. Alioquin scire velim, quales textus vobis "in scholis stylisticis" (ita saltem in Hungaria eae scholae vocantur) Latine reddendi sint, quotque versuum - e. gr. e tragoedia Senecae "Thyestes" - vobis in scholas singulas praeparandum. Vale. d. V. Kal. Mai.

Michel Egidius Valentinus Mercurio.

Si vales, bene est, ego valeo.

Mi mercuri, quoniam de eis rebus me interroges, subtiliter et copiose respondebo. Maxima textuum pars, quos a nobis latine reddendi sunt, ex classico libro, cuius scriptor F

M. Favonius Erico Palm

Mercurius Sullae s. d.

Nunc, ut in epistola priore promisi, quomodo in Hungaria lingua Latina doceatur, breviter disseram. Plerumque in gymnasio coeperunt discere linguam Latinam discipuli, cum illi annorum XV sunt; sed in gymnasiis classium octo nonnullis iam in classe prima (sive quinta) pueri puellaeque annorum XI. prima elementa illius linguae docentur.
Ratio eligendorum auctorum, quorum opera in scholis legantur, haec est: ex singulis operibus (certe celebrioribus) pauca legenda sunt. In classe prima nonnisi textus "artificiales" a discipulis leguntur, qui non a scriptore quodam antiquo, sed a libri scholastici auctoribus compositi sunt: cui rationi ego maxime dissentio, quod discipulis quam maturissime textus originales ad legendum porrigendos esse crediderim. In classe secunda opera Caesaris, Ovidii, Catulli; in classe tertia Vergilii, Ciceronis; in classe denique quarta ex magna parte Horatii Tacitique opera leguntur convertunturque. Minores textus (Martialem, Tibullum, sententias etc.) de enumeratione omisi. Haec nunc, amica mea; de universitatibus alio tempore. Vale. Transaquinci, prid. Id. Nov.

Iulia Mercurio et Sullae sal.

Video ex epistula tua, Mercuri, te aeque amare id stultum verbum "sermo Latinus artificialis". Si ars esset hodie textus componere Latinos, etiam ars deberet esse nobis, qui non in aliqua terra angophona vivimus, Anglice loqui!
De tempore, quo incipiatur textus scriptorum antiquorum legere, nescio, quid sentiam. Cum magistro privato linguam Latinam didici, ergo tam cito procedibamus, ut omnes textus mihi difficiles videbantur. Cum autem prima verba Caesaris legi, id multo difficilius erat quam textus libri. Et ubi Caesarem plus minusve potui convertere, idem erat in versibus Ovidii: Nihil fere comprehendi. Nunc autem Ovidium fluentiter possum legere.
Non ergo bonum puto discipulis, cum adhuc contendunt elementa grammaticalia intellegere, iam textus antiquos, qui plerumque haud sunt faciles, praponere. Aliud autem est, si maximas difficultates a magistro sublata sunt, priusquam datur textus discipulis. Ceterum difficile est invenire excerpta haud nimium difficilia, in quibus e.g. nulla deponentia aut aliae res occurrunt.

Puto autem haud malum interdum aliquid Latine scribere, etiam fortasse in schola, quia hoc modo facilius profundiusque discitur grammatica. Equidem nuc multo citius possum epistulas meas scribere, quam cum coepi, et spero etiam aliquantulum emendatius, et saepius scribens multo citius ac diligentius didici legere.

Valete.
Gottingae, pr. Id. Nov.

P.S.: Sulla, cur hoc elexisti nomen? Semper stupesco, quia te virum puto. Ceterum, cum longum tempus singula fuerim mulier in hoc foro, quae scripsit nuntios, gaudeo de omnibus aliis feminis, quae accedunt.
Mercuri, Hungarici videntur proverbium tuum rapuisse ab Gottingensibus! Quis enim nesciret "Extra Gottingam non esse vitam, si esse vitam, non esse ita"?

[quote="Area Latina"]De rationibus linguae Latinae docendae in mundo
--------------------------------------------------------------------------------
Nuntium misit: Mercurius Hungaricus ® | 07.11.2003 - 10:24 | |
--------------------------------------------------------------------------------
Numero visitantium ex variis gentibus oriundorum in diem aucto tandem meam quaestionem ut proponam, occasionem praeberi existimo; scire etenim velim, quo modo quibusque rationibus apud vos singulos sermo noster Latinus doceatur; qui auctores quotque textuum in secundariis scholis ac in universtitabus legi debeantur; qualia sint seminaria, lectiones, examinationesque; quo denique modo muneris professorii* candidati erudiantur. Una lingua, variae methodi. Sed quales methodi? Responsum date! (Hor.)

*in scholis secundariis


Stephanus Arx Mercurio Hungarico ceterisque omnibus sodalibus s.p.d.

Sum Italus qui docet Latinam linguam apud Lyceum quod ad scientiales artes pertinet. Valde nos decet de rerum agendarum ratione ad artem didacticam pertinenti hic disserere. Immo oportet me redire ad intimam naturam methodi Ørbergianae, propterea quod innumera sunt detorta iudicia quae saepe vulgantur.
Non pertinet, in primis, methodus "natura", quae dicitur, ad praxin tantum
didacticam: si enim id verissimum est, quod quisque suos docet discipulos
iuxta proprios mores, et si, igitur, oportet discipulos se exercere ad eadem
inspicienda a variis speculis, Ørberg multa alia et plura praebet. Volumina
enim, quae inscribuntur "Lingua Latina per se illustrata" minime grammaticam suppeditant novissimo ordine demonstratam, sicut accidit in libris qui in methodum tralaticiam incumbunt, sed attinent ad intima secreta Latinitatis, ad quae discipuli adire facilius possunt. Iuvenes enim, tribus annis (idest tempore confecto quo volumina Ørbergiana legi possunt) Latinum sermonen penitus discunt, scilicet lexicon quoddam et simul verborum constructionem.
Id novum est, quod iuvenes discere possunt modum scribendi, quem auctor quidam elegit. Quae optime dixit enim de philologis P. Maas in volumine illo quod Germanice inscribitur "Textkritik", Lipsiae 1950:
"tota vita curabit ille ut conscientiae incitationem ad scribendi genus
attinentem expoliat, etiam si sibi fatendum est totam hominis vitam minime sufficere ad litterarum dicionem acquirendam". Quod plus additur in methodo Ørbergiana adipiscenda id est, quod sermo maternus ius civitatis non habet ad linguam alteram discendam. Disciplina logica, qua tam bene usi sunt patres Societatis Iesu in "Ratione Studiorum", minime praecipuus discipulorum labor videtur. Quaestio attinet, in primis ad textos
classicorum directo legendos: quod, nisi incipit a gymnasio, minime efficit
ea ad quae adipiscenda methodus Ørbergiana structa est. Sicut iam scripseram in pagina domestica mea, "nos enim linguam Latinam didicimus, cum discipuli essemus, secundum systema normativum, ordine vere geometrico demonstratum, cuius finis erat rationalis expositio, quae dici potest, rerum grammaticalium. Quae autem non ad abstractiones glottologicas attinent, sed ad circuitus verborum, in quibus stat natura cuiusdam linguae. Nos in studia humanitatis plurimos annos incubuimus, sed discipuli, qui nobis imbuendi sunt, se ad Latinitatem praebere possunt quinque tantum annos. Rebus sic stantibus id nullo modo accidere potest, quod pueri, inceptis biennio studiis secundum methodum tralaticiam, se triennio dent, duce magistro, ad methodum Ørbergianam. Nihil inutilius, qua mea prudentia est, nihil imbecillius! Agitur enim de quaestione revolutionis cuiusdam, quae iure Copernicana dicta est, in qua res grammaticales non a priori illustrandae sunt, sicut apud grammaticas normativas, sed, ut philosophice loquar, a posteriori. Scilicet postquam regulam quandam discipulus invenerit in textis, in quibus legit ipse fabulam scriptione continua exaratam et in qua de rebus cotidianis agatur".

Vale quam optime
Dabam Genuae Idibus Nov.

M. Favonius sodalibus, imprimis Stephano Arci collegae sal.
Litteris tuis, Stephane, curiose atque contente lectis animum tuum advertere velim ad librum, qui inscribitur „De restauratione linguae Latinae libri tres“. Forsitan tibi notus sit. Compositus est a Georgio Haloino typisque excussus Antverpiae anno MDXXXIII, nostris vero temporibus editus Lipsiae in aedibus B. G. Teubneri anno MCMLXXVIII. Qui liber quamvis sit perantiquus, tamen dignus etiamnunc videtur esse, qui legatur, idque imprimis ab iis, quibus cordi est recta Latine docendi via et ratio. Legite modo ipsi, sodales:
„Nec ulla diligentia aut subtilitate ad elegantiam linguae Latinae perveniemus, nisi abiecta penitus grammatica, ut ne minimam eius regulam observare intendamus, sed aurium iudicio et aurium voluptate loquamur, quoad patitur priscorum consuetudo, et elegantiam absque labore concipiemus. grammatica enim linguae Latinae fudamentum non est, ut fere omnes scripsere, sed potius impedimentum, ...“ (1, 15, 11).
Quae vos ea de re tenet opinio?
Valete.
Idibus Novembribus.

Pistos sodalibus, imprimis M. Favonio s.d.p.

Grammaticam discere inter omnes constat multis discipulis impedimento esse videri, ut eam neglegant. Nemini quidem dubium est, quin per aures vel per textus legendos se ad linguam aptare via sit optima discendi. Sed praeclara in arte, qua nostri auctores opera sua imbuerunt, puto id fieri minime posse sine ulla consuetudine ac cognitione artis grammaticae.

Valete!

P.S.: Vehementer est querendum deesse tempus, quo discipuli nostra lingua uti discere possint!

Marcus Favonius wrote:M. Favonius sodalibus, imprimis Stephano Arci collegae sal.
Litteris tuis, Stephane, curiose atque contente lectis animum tuum advertere velim ad librum, qui inscribitur „De restauratione linguae Latinae libri tres“. Forsitan tibi notus sit. Compositus est a Georgio Haloino typisque excussus Antverpiae anno MDXXXIII, nostris vero temporibus editus Lipsiae in aedibus B. G. Teubneri anno MCMLXXVIII. Qui liber quamvis sit perantiquus, tamen dignus etiamnunc videtur esse, qui legatur, idque imprimis ab iis, quibus cordi est recta Latine docendi via et ratio. Legite modo ipsi, sodales:
„Nec ulla diligentia aut subtilitate ad elegantiam linguae Latinae perveniemus, nisi abiecta penitus grammatica, ut ne minimam eius regulam observare intendamus, sed aurium iudicio et aurium voluptate loquamur, quoad patitur priscorum consuetudo, et elegantiam absque labore concipiemus. grammatica enim linguae Latinae fudamentum non est, ut fere omnes scripsere, sed potius impedimentum, ...“ (1, 15, 11).
Quae vos ea de re tenet opinio?
Valete.
Idibus Novembribus.

Stephanus Arx Marco Favonio ceterisque omnibus sodalibus s.p.d.

Gratias ingentissimas tibi persolvo, optime Marce, pro volumine isto de quo disseris! Iam mihi notum erat, sed nondum in manibus habere possum, pro dolor!!
Confer, quaeso, quid significare de stilo et grammatica videatur Aemilius Springhetti ille in volumine quod inscribitur: "Institutiones stili latini", Romae 1954 (p. 5): "Recte monet Quintilianus aliud est latine, aliud grammatice loqui.
a) Grammatice enim loqui et scribere, idem est ac emendate seu, ut ait Cicero, pure et latine adhibere materiam seu verba, quae stilus perspicue et ornate disponit ut apte exprimant dicenda. Dicit ergo
1)emendatum usum in verbis flectendis et nominibus declinandis; in casibus, temporibus modisque usurpandis; in vocabolorum recta seu latina pronuntiandi, scribendi, derivandi componendi ratione.
2)verborum delectum, quae sint pura seu latina, ita ut excludantur verba vetusta, novata, barbara, rara, etc. quae quandocumque sermonis latini puritatem corrumpunt.

b) Latine autem loqui hic accipitur pro perspicue, ornate et apte ut habet Cicero, totum nempe propriumque dicit latine dicendi genus.

Vale atque vale
Dabam Genuae a.d. XVIII Cal. Dec. a. MMIV

M. Favonius Stephano Arci s.d.p.
Maximas tibi gratias, collega honoratissime, pro litteris ago tuis, in quibus Aemilii cuiusdam mentionem facis Springhetti. A quo philologo scriptum esse repperi librum, qui inscribitur „Selecta Latinitatis scripta auctorum recentium (saec. XV – XX)“ (ed. Romae MCMLI). Quem librum cum tibi notum esse suspicer, oro te certiorem me facias, quae scripta ab Aemilio Springhetti selecta sint.
Vale.
XVIII K. Dec.
In Cornicum Campo.

Marcus Favonius wrote:M. Favonius Stephano Arci s.d.p.
Maximas tibi gratias, collega honoratissime, pro litteris ago tuis, in quibus Aemilii cuiusdam mentionem facis Springhetti. A quo philologo scriptum esse repperi librum, qui inscribitur „Selecta Latinitatis scripta auctorum recentium (saec. XV – XX)“ (ed. Romae MCMLI). Quem librum cum tibi notum esse suspicer, oro te certiorem me facias, quae scripta ab Aemilio Springhetti selecta sint.
Vale.
XVIII K. Dec.
In Cornicum Campo.

Stephanus Arx Marco Favonio s.p.d.

Rectissime conicere videris, optime collega mi! Aemilius Springhetti ille edidit apud Pontificiam Universitatem Gregorianam volumen illud quod inscribitur Selecta Latinitatis Scripta Auctorum Recentium (seac. XV-XX), Romae 1951. Quem librum, pro dolor, nondum in manibus habeo, sed in eum incubueram praeterito anno. Rebus sic stantibus non possum tibi mittere indicem, sicut est in votis, sed pro certo habe inter auctores selectos inesse praesertim rerum scriptores. Oratio soluta tantum adhibetur. Optimus liber mihi visus est.

Vale atque vale
Daba, Genuae a.d. XVIII Cal. Dec. a. MMIV

Galeanus Stephano Arci s.d.

Tibi tuae collegaeque maximas gratias ago, ut commemoravitis tales littera de auctoribus recentibus latinitatis recentis.
Scitis possibilitatem dari emere eas litteras alicubi vel non vendetur in negotiis locatis?
Velim legere tales littera, ut non scribeatur multum in latinam linguam (nisi in foris)...sunt translatae transferunturque recentes litterae auctorum in latinam (non solum Harrius Potter et Philosophorum lapis), sed magnas litteras (John Grisham p.ex.), litteras quotidianas poemataque?
Vives in Italiam, vere? Potes emere litteras recentes latinas ubi habitas?
Mihi placeret multum legere responsum tuum.

S.v.b.e.v.b.

Galeanus Archineus Avius,
Offenburgi, Germania inferior