Salvete, sodales amplissimi!
Dresdae heri consecrata est Aedes Sacra Dominae (*), quae bello mundano secundo mense Februario a. MCMXLV media urbe incendio deleta cum ingenti fragore corruerat. Per quinquaginta fere annos nihil aliud conspici poterat nisi immanis ruinarum moles. Post interitum Democraticae Reipublicae Germanicae Dresdenses clarissimam illam Aedem Sacram Dominae restituendam esse censuerunt. Quo facto homines omnium regionum tantae per decem annos pecuniae munera et publice et privatim dederunt, ut restitutio nihil haberet difficultatis. Hoc loco praetereundum non est, quod Britanni, quorum bombis urbs deleta erat, turrim cruce aurata ornandam curaverunt. Ceterum, cum ruinarum illa moles in planum deduceretur, quam plurimi conservati sunt lapides, quibus structores ad aedem restituendam uterentur. Qui facile in aede restituta conspiciuntur; nigrum enim per decennia duxerunt colorem.
Aedes Sacra Dominae evangelico-lutherana, quae ad artem barocam pertinet, saeculo XVII exstructa est, idque eodem loco, quo septingentis ante annis aedes catholica romanica Nostrae Dominae sacra aedificata erat.
Utinam aedes restituta remotis procul bellis multa maneat saecula!
Die reformationis Lutheri a. MMV.
-----------------------------------
(*) Germanice Frauenkirche: Frau = Domina vel potius Domina Nostra, i. e. Maria mater Iesu (cf. Gallice: Notre Dame, Hispanice: Nuestra Señora, Italice: Nostra Signora).