Marcus Phlebae ceterisque sodalibus pariter omnibus sal.
Epistula tua grato animo perlecta imprimis me illa quaestione commoveri confiteor, quae de felicitate definienda inter vos exorta videtur esse. Equidem, quod ad hanc rem attinet, Senecae libellum, qui inscribitur „De vita beata“, magni etiamnunc momenti esse puto. Cuius in initio scriptum est hoc: „Vivere, Gallio frater, omnes beate volunt, sed ad pervidendum, quid sit, quod beatam vitam efficiat, caligant; adeoque non est facile consequi beatam vitam, ut eo quisque ab ea longius recedat, quo ad illum concitatius fertur, si via lapsus est... Proponendum est itaque primum, quid sit, quod adpetamus; tunc circumspiciendum, qua contendere illo celerrime possimus...“ (I 1sq.). Sed legite modo ipsi. Si bibliothecam Latinam interretialem (Britannice „www.thelatinlibrary.com“) adieritis, opusculum illud facile reperietis.
Vobis nunc precor, ut hoc anno quam plurimas horas numeretis serenas.
Pr. Non. Ian.