YLE Colloquia Latina

Salvete, sodales honoratissimi!

In dies fere numerus augetur eorum, qui nihil aliud agere videntur nisi ut colloquiis nostris perverse utantur. Inspicite quaeso indicem utentium, pseudonyma novissima imprimisque inscriptiones interretiales, et intellegetis, quantopere colloquia nostra a quibusdam hominibus malevolis inquinentur. Equidem multo maiorem partem sodalium indignari puto se una cum ista colluvie in eundem indicem relatam esse. Ceterum animadvertendum est, quid ea de re Mercurius noster Hungaricus nuper scripserit („Alia themata“ -> „Moderatores desiderantur!“ # 3790). Vos quid censetis? Quid fieri oportet?

Tiberis sodalibus suis,imprimis Marco suo s.d.p.
neminem esse, quin tibi vehementissime assentiatur, persuasum habeo. nam quis est, qui aequo animo tolerare possit plures in dies paginas interretiales indici utentium inseri, quae nihil continent nisi res sordidas atque obscenas ?
ubinam gentium sunt moderatores, qui intercedant ? paulatim quaerendum est, numquis exstet, qui hoc munere fungatur. an cuiquam vestrum ullum ullius moderatoris nomen notum est ?
equidem suspicor illos moderatores, si qui sint, quod ad querelas nostras pertinet, non assis facere. o rem turpem et dignam, quae vehementissime vituperetur !
at nos ,qui nostrorum colloquiorum dignitatem debeamus servare,eiusmodi interpellationes prorsus neglegere oportet ; "licet canes latrent", ut est in proverbio, "agmen progreditur."

valete.

Omnes gentes, quae stultitias obscenasque scripserunt, expellendae sunt nobis. Satis est.
Etiam necesse est delere e datorum ordinatro nostri siti omnes utentes eos qui umquam scripserunt unum nuntium.
Omnes possunt delere et expellere istos utentes.

Soter Marco Favonio, praeclaro Amico,
et pariter optimis Administratoribus, claris Moderatoribus et omnibus Sodalibus s.p.d.


Clarissime ac carissime Amice Marce,

tuae summae humanitas elegantiaque ac simul tua verba gravia in malevolos turbatores, qui ineptis, stupidis, molestissimis ac squalidissimis nuntiis aream Colloquialen nostram infestant, omnino ad latus tui et omnium “bonae voluntatisâ€

M. Favonius Scipioni, Soteri Tiberique sodalibus honestissimis sal.
Gratias vobis ago maximas.
Equidem litteras vestras praestantium plenas consiliorum ab administratoribus tanta cum diligentia lectum iri spero, ut ista colluvies a colloquiis efficaciter arceatur. Videant moderatores, ne quid colloquia detrimenti capiant!
Optime valete.

M. Favonius Erico Palm

Ericus Palmén Marco Favonio ceterisque de eadem re sollicitis s.d.p.
Ego quoque aream nostram visitans summa cum indignatione animadverti nonnullos homines ”indice utentium” et ”conspectu personalium” ita, ut dicis, abuti solere. Doleo in regimine Radiophoniae Finnicae Generalis omnem rem videlicet minoris, quam aequum est, iudicari. Quondam uni ex iis, qui ibi operantur, de ea mentionem faciens hoc fere tuli responsum: eodem problemate ceteras quoque colloquendi areas, non solum Latinam, laborare, neque quemquam prae aliis suis muneribus tantum operae nuntiis ineptis impendere posse, ut eorum per dies noctesque vigilandorum curam susciperet; accedere huc, quod perpauci in redactione praesto essent homines Latinitatis tam periti, ut de nuntiis Latinis ex area tollendis soli decernere auderent; ego ipse, si quibus nuntiis peciliariter vexarer, proponerem, ut illi tollerentur. Ita oblique mihi concessisse videtur neminem ibi esse, qui moderatoris munere strenue fungeretur. Interdum Finnice monui de quibusdam nuntiis ab hac area manifesto alienis, ac plerumque me rogante tales nuntii deleti sunt. Praesertim novissimis temporibus tamen redactores aliquid rogans responso omnino carui. Hodie pluribus diversis occupationibus distineor, quam ut moderatoris inofficialis munere me regulariter onerem; sed facere possum, ut redactores denuo adeam. Quid, si ab iis petam, ut ex utentium indice tollantur nomina omnium eorum, qui, quamquam registrati sunt, nullum tamen umquam nuntium in aream miserunt? Iam eorum permagnus est numerus. Deinde colligamus oportet ceteros nuntios, qui iure existimari possunt ”colloquia nostra quasi caeno replere”, et indicem eorum in redactionem Radiophoniae Finnicae Generalis mittamus postulantes, ut ii quoque ad unum omnes deleantur et auctores eorum ex area excludantur; quo facto Redactionis nomine peculiare divulgetur decretum, cuius haec fere sit summa: ”Sic deinde, quicumque alius aream nostram caeno inquinaverit!” (cf. Livius, 1, 7, 2). Valete!

M. Favonius Erico Palm

Ericus Palmén Marco Favonio s.d.p.
Recte iudicas: si omnium tacitorum colloquentium nomina ex area tollantur, haud paucis iniuria inferatur. Id a nobis absit! Coniunctis viribus noxios, qui aream nostram commaculant, ab innoxiis honestis sodalibus separare debebimus. Equidem te adiuvante moderatores areae nostrae dormientes iam e somno neglegentiae excitare conatus sum; propediem videbimus, utrum mihi aures praebituri sint necne. Vale!

M. Favonius Erico Palm

possumusne indicem utentium expellendorum facere?

Ericus Palmén Marco Favonio & Mercurio Hungarico & Scipioni ceterisque sodalibus honestis s.d.p.
Cura levatus suspiravi, quod res nostra opinione celerius prospere successit. Evidenter moderatoribus huius areae auxilio nostro opus est, quo citius et efficacius posthac scripta inepta, si quae in eam irrepserint, inde tollantur. Ut antea scripsi, hodie tot aliis occupationibus distineor, ut tempus me deficiat ad aream nostram regulariter vigilandam; sed vos nolitote dubitare me, si res poscet, etiam privatis nuntiis excitare! Vires igitur coniungamus! Curate, ut Latinissime valeatis!

Soter clarissimo Erico Palmen s.p.d.


Maximas gratias et ego tibi ago, optime Patrone probitatis et decoris Areae Colloquialis nostrae !

Nobis cultoribus linguae Latinae rursus intercessio tua summo adiumento ad Moderatorum presentiam sollicitandam fuit et maximi momenti etiam in posterum ad dignitatem omnium nostrum servandam erit.

Sicut tu ipse hortatus es, si res poscet, ad te mittemus etiam privatos nuntios, confisi auxilio tuo pretiosissimo et rati vires nostras coniungendas esse ad honestatem Fori nostri muniendam et defendendam contra perversitatem et caenum malevolorum ac stultorum turbatorum.

Cura ut optime valeas, eximie Amice !!

Ab imo pectore

Soter

A. d. IV Nonas Novembres - Neapoli

Iulia sodalibus sal.

Nonne omnino facilius esset, si ipsi quemquam nostrum eligeremus moderatorem sive adiministratorem? Sunt, quibus confiserim hoc munere prudenter fungi, et celerius possent deleri nuntii offendentes, nec iterum iterumque Erico nostro esset redactio Radiophoniae Finnicae Generalis adeunda, quae nuntios tolleret. Nam si tantum operis eis est de foro vigilare, quantum Erico inquirenti responserunt sibi esse, eos gaudere necesse est, si e parte nostrum adiuventur.
Quid censetis vos, sodales?

Valete quam optime.

M. Favonius sodalibus, imprimis Iuliae s.d.p.
Quaestio ad exitum adducta videtur esse; nam Administrator indicem utentium diligenter custodiens nomina suspiciosa, simulac comparuerunt, continuo eradere solet. Quod grato animo cognovimus.
Valete.