lingua latina et scientia

Colloquia de aliis thematis

Moderators: Moderator, Redactio Interretialis

Emitteby Rhumak on Sol 04 Feb, 2007 13.48

Erico Rhumak spd

Quaeris, docte amice, numquid Italis cum latino aliter ac Finnis se habeat. Latinitas ad quadragensimum usque abhinc annum etiam in scholis mediis inferioribu docebatur: ut iam alicubi scripsi, parentes mei, quamquam alter architectus, altera epistularum diribitorii magistra - nil igitur quod ad latinitatem colendam attineat -, nonnisi in mediis scholis studuerunt, atqui nunc, post quadraginta annos, aliquod verbum, casus declinationum et alia memorantur. Schola nostra antiqua ita facta erat, ut nemo in Italia in operam dandam exire posset, a mechanico ad summum magistratum, omnino latinis litteris ieiunus. Et populus consentiebat: mediolanenses dicere solebant (nescio an soleant): "Stude latino, si vis optimus mercator fieri!", quia latine sciendo ratio, scientia, calliditas ipsa inesse censebatur.

Dein schola nostra, quam ubique orbis mirabantur, seriem horrendam ictuum passa est: latinus schola media sublatus est, scholis singulis programmata sua per se conscribere datum est, ita ut in multis lycaeis scientificis, ubi latine docendo decem ante annos nil mirum inerat, hodie permultae sectiunculae oriantur et moriantur sine quiete, in quibu latinitas non docetur. In lycaeo classico (repeto, lycaeo classico) duae harum sectiuncularum quibu communistae tantopere in natione nostra faverunt altera latinum et graecum in unam materiem reducit, altera grammaticam nonnisi quam minimum tractat adque solas litteras intenditur (quid dein de litteris lingua ignota pulchri intellegas, utinam quis mi explicaret). Nunc igitur in Italia latinitas hic Olympum hic Avernum tangit: non perpauci extant, ex quibus et humiliter ego, qui quamvis aliis materiebus, quae nil cum latino habent, praecipue student, cum latine in lycaeo didicerint (non in altera earum sectiuncularum eram!), ne mens sua inter angusta saepta materiei sibi ad operam dandam electae maneret, colere perrexerunt et nuncusque omni conamine faciunt, modo cum modo sine gloria, ut stylus suos omnino mendis careat; alii multi quidem, qui quamvis ipsis litteris student, omnes eas partes universitatis eligunt, in quibu quam minime latine discere debeant. Sic fit ut ipse, qui architecturae studeo, latine et graece valde melius sciam ac quidam quondam condiscipuli mei qui nunc nulli alii rei ac litteris in universitate student!

Quibus omnibu dictis et firmatis, nihilominus, immo sane idcirco, eos qui, repeto, non coacti volentesque conari velint, thesis latine scribere non dedecet atque magistros eorum illas emendare, curare, omnia facere ut quam optime conscriptae eveniant, omni oportunitate necessest. Qui queunt, facturos spero; qui nondum queunt, queuntum exemplo magistris hortantibus habeo pro certo quandoque quituros ac continuo facturos. Nil ab omnibus simul semel oritur, ut puto: semper a paucis aemulatione postmodo auctis. Ipsi pupuli linguam maternam aemulatione prius, iumento deinde ludorum didicimus: ideo quire facile (etsi nempe vero nullam rerum sine labore consequaris). Omnes scientias deinde per secla latine scriptas addamus: quis earum studiosus est, quin a tractatis antiquis doctrinae suae lingua pristina legendis oblectetur? Quin etiam, siquidem scientiati tamdiu ea usi sunt, aliqua pulchritudo et concinnitas et per se et in scientiae notionibus explicandis huic inesse linguae necessario debet, alioquin iampridem aliqua altera lingua electa esset. Iuvat me ipsum, cuius doctrina iampridem, iam a multo pluribus seclis ac scientia, latine loqui desiit, tractatum de architectura vitruvianum latine legere; quid quod tractatus mathematici similesque ad 1940 usque latine scripti sunt? ideo velle facillimum (et item nempe nullam rerum concinnitate privam velis - et eligas, et electam in aeva retineas).

Ita igitur fore spero in Europa, ut gradatim, pedetemptim, quo modo cumque dicatur, in scholis, in ludis, in universitatibus, per iocum nunc, nunc serio habitu, nunc tribu verbis, magno mox sermone, lingua ista inter nos europaeos agnoscamur, intellegamur, historiam communem et nobis modo propriam simul videamus et omnia in plena paritate, et in scientiis et, ut aisti, in facetiis (quarum et vita cotidiana constat). Sensim et constanter, spero.

Vale(te)
Πατρίους παραδοχὰς ἅς θ' ὁμήλικας χρόνῳ κεκτήμεθα, οὐδεὶς αὐτὰ καταβαλεῖ λόγος οὐδ' εἰ δι' ἄκρων τὸ σοφὸν ηὕρηται φρενῶν.
Quae tradita patribus coaeva temporis accepimus, ea nulla ratio destruet neque alta mens si repperit scientiam.
(Eur., Bacch., 201-3)
Rhumak
 
Nuntii: 691
Nomen dedit: Lun 12 Iun, 2006 13.49
Location: Latium

Emitteby Maria Barbara on Sol 04 Feb, 2007 20.59

Maria sodalibus s. d. p.
In mea scola media lingua Latina conpulsoria erat, et est. Maioritas condiscipularum mearum frustra esse dicebant hoc studium, cum lingua Latina inutilis esset, et magis volebant linguam Graecam antiquam (quia pulchra est) vel linguas recentes discere.
Valete!
Quem quidam eligentes, vel potius religentes miseramus negligentes.
Maria Barbara
 
Nuntii: 23
Nomen dedit: Sol 24 Sep, 2006 19.23
Location: Pannonia

Lingua Latina et scientia

Emitteby Ericus Palmén on Sol 04 Feb, 2007 21.33

Ericus Rhumaki s.d.
Tibi gratias ago, quod fusissime, quomodo in Italia res ad institutionem Latinam pertinentes se habeant, mihi explicavisti. Aliquatenus condicio rerum par est in Italia atque in Finnia, videlicet etiam alibi in Europa: institutio Latina ubique inde ab annis 1960–1970 multum e pristino statu suo amisit. Etiam apud nos quondam aliquot erant lycea quae vocabantur classica, in quibus Latinitas in media schola per quaternos annos ac deinde in gymnasio per ternos annos ita discebatur, ut in singulis classibus quinae horae septimanales ei dedicarentur; nunc vero perpaucae scholae in maioribus urbibus sitae eum sibi â€
Ericus Palmén
Ericus Palmén
 
Nuntii: 273
Nomen dedit: Lun 01 Mart, 2004 14.32
Location: Media Finnia

Emitteby Iulia on Mart 06 Feb, 2007 12.50

Iulia Phlebae, Rhumaki, Erico, Lucio ceterisque s. d. p.

Primum, Phleba, gratias tibi plurimas oportet agam de illo loco famosissimo citato! Illam "demonstrationem mirabilem", quam "marginis exiguitas non caperet", per tria saecula optimus quisque mathematicus invenire studebat, ita ut Petri de Fermat margo maximam acciperet famam. Scio institutum mathematicum Gottingense singulis septimanis epistulas accipere ex omnibus orbis terrarum partibus, quas mittunt homines non mathematici, qui - plerumque falso - credunt problema quoddam magnum solvisse; quorum hominum nonnulli de illo theoremate agunt et demonstrationem originalem mirabilem illam invenisse credunt: Demonstratio enim, quam Andreas Wiles invenit, longissima ac difficillima est et non mirabilis (est quidem mirabilis in eo, quod Wiles post tria centennia primus demonstrationem invenit; non autem mirabilis est elegantia sua).

Rhumak, poscis non articulum in periodicis edendum, sed totos libros Latine scribendos esse. Librum scribere etiam lingua vernacula multum consumeret temporis, quod annis metiri oportet potius quam mensibus, quanto plus Latine, cum multis rebus ultimis saeculis inventis ne lingua quidem apta exstet. Sane scientiarum decimi octavi saeculi omnia Latine exprimi possunt, sed ex eo tempore tot nova proposita in usum venerunt, ut lingua decimi octavi saeculi vix apta haberi potest. Inde hodie singulis hominibus operae pretium non est tale susceptum aggredi, cum vix ullus talem librum legere possit, imprimis cum hodiernis temporibus omnes tam intente eo nituntur, ne tempus perdant. His non dico id numquam fieri posse, solum dico id in scientiis naturalibus nostro tempore utopicum esse. Incipiant ii, quorum lectores sciunt Latine; curant scholae, ut plures discipuli melius sciant Latine, dein fortasse fieri poterit. Hodie autem quis complures annos ageret librum scribendo, quem nemo legere possit, quod Latinistis scientia rerum naturalium, investigatoribus rerum naturalium scientia Latinitatis deest? Esto: Cum tu, Rhumak, tam vehementer poscis libros scientiarum naturalium Latine scribi, ipse fac! Ipse Latine scribas librum de architectura, quod si satis multi legant, etiam ego librum mathematicum Latine scribam.

Luci, tecum consentio linguam Latinam multum prodesse ad verba recte utenda - etiam in Germania quidam professores aliquam rem "translatare" volunt, ut fiat "translatio", et unus professor physicus solet de "viribus centripedalibus" loqui (pro "centripetalibus"). Neque noceret, si omnes omnes litteras Graecas scierent. Memini me aliquando in aedibus facultatis physicae tale audisse colloquium: "Quidnam rho illud sibi vult?" - "Quid rho?" - "An theta est?" - "Ah, de sigma loqueris!" (obiter dictum: etiam scientia litterarum veterum Germanicarum non nocet.)Tamen si quis solum linguam epistomologicam recte adhibere vult, celerius solum linguam epistemologicam discet quam Latinam et Graecam. Institutio linguae epistemologicae, ut ita dicam, imprimis in eo ab institutione linguarum antiquarum differt, quod omnes exspectant studentes verba et rectum usum eorum quasi nihil agendo discere, cum linguas antiquas quisquis discere velit, multas horas assidue studere debeat. Quid mirum, si multi prave adhibeant verba epistemologica, si numquam revera ea didicerunt?
(Tamen praeferendum censeo linguam scientificam quasi fundamento linguarum antiquarum scire; iis autem, qui aliter sentiunt, saltem lingua epistemologica suae disciplinae discendam esse duco.)

Valete.
Gottingae, postridie Nonas Februarias
Quaecumque a proavis tibi sunt commissa benignis,
compara ut illa tibi propria possideas!

- mathesis localiter trivialis -
Iulia
 
Nuntii: 569
Nomen dedit: Lun 15 Mart, 2004 18.08
Location: Saxonia Inferior

Emitteby Rhumak on Mart 06 Feb, 2007 14.39

Iuliae ceterisque spd

Hahahae! Vellem, cara mea, sed difficultas non in latine scribendo sed in latine scribendis est! Nam de architectura sicut omnibu nunc scientiis omnia omnibusque contraria hoc saeculo scripta sunt, ita ut non tantum in lingua et in eius vocabulorum aptitudine, quantum in rebus ipsis laborem intellegendi lector saepe reperiat: nam si de pilone ex caemento ferrato, de fenestra continua, de tecto culto etc latine loquar, profecto cuncti saltem architecturae plusminus periti me intellegent, sed quid si de deconstructione, de polaritate urbana, de schemate radiocentrico, hippodamico etc? Tu profecto me intellegis, si haec dico, et nempe de hoc latine loqui facillimum est etiam nunc, sed quod perdifficile est, in artibus et in scientiis, non verba, sed ideas intellegere. Nescio qui res tuae mathematicae se nunc habeant, sed quantum ad artes, hodie tanta flumina atramenti saepe nullo parvove consilio vomuntur, ut forte ad putandum compellar ipsas artes meliores factas iri, si omnibus scripturis aliquantulo magis pensitandum et lingua aliena vernaculaque severiori scribere coactis minus facetiarum, plus verborum significatu suo exquisitorum exactiorumque chartis mandandum erit. Sed haec forsan alia quaestiost.

Cum dicis:
Incipiant ii, quorum lectores sciunt Latine; curant scholae, ut plures discipuli melius sciant Latine, dein fortasse fieri poterit.


eadem fere adfirmas atque egomet, cum Erico dicebam:
Ita igitur fore spero in Europa, ut gradatim, pedetemptim, quo modo cumque dicatur, in scholis, in ludis, in universitatibus, per iocum nunc, nunc serio habitu, nunc tribu verbis, magno mox sermone, lingua ista inter nos europaeos agnoscamur (...). Sensim et constanter, spero.
,

ergo fieri non potest quin tibi assentiar :D

Quod nemo negat, equidem quandoque nobis Europaeis linguam communem eligendam esse: hoc unum dico, latinam esse solam mi hoc dignam visam, ut quae non tantum in se pulcherrima rebusque dicendis brevissima et concinna, quantum nemini nostrum omnino vernacula neque omnino peregrina sit: quas res et ipsa non uno nuntio tuo iam saepe hic scripsisti.

Vale(te) mihi
Πατρίους παραδοχὰς ἅς θ' ὁμήλικας χρόνῳ κεκτήμεθα, οὐδεὶς αὐτὰ καταβαλεῖ λόγος οὐδ' εἰ δι' ἄκρων τὸ σοφὸν ηὕρηται φρενῶν.
Quae tradita patribus coaeva temporis accepimus, ea nulla ratio destruet neque alta mens si repperit scientiam.
(Eur., Bacch., 201-3)
Rhumak
 
Nuntii: 691
Nomen dedit: Lun 12 Iun, 2006 13.49
Location: Latium

Emitteby decurio on Mart 06 Feb, 2007 20.25

decurio omnibus vobis spd

quid de hoc magistro de scientia? revera cogito eum correctum esse eo, quo latinitas sit inutilis. sed antequam vos meam opinionem nimium aspere obiurgare coepistis, audite. quid utile est omnium illorum studiorum quae vocamus "humanitates"? nihil vero credo utile de illis esse. sed si quis dubitet ea beneficia, quae ex artibus liberalibus, ut vocantur, eveniant, ei oporteat legere statim Ciceronis orationem pro Archia poeta, ubi ille dicit:
sed pleni omnes sunt libri, plenae sapientium voces, plena exemplorum vetustas: quae iacerent in tenebris omnia, nisi litterarum lumen accederet. -pro Arch. 14

nil de humanis artibus est "utile," sensu stricto, sed num sine illis nos paulum meliores nos animalibus sumus?
at latinitas est saucior, ut credo, hodierno tempore, cum scientiae statu conlata in institutione; ex causa magistrorum et professorum qui (stulti) iudicent utilia esse magis ad docendum et inutilia esse expellenda--quae "inutilia" sunt magis existimatissima.
decurio
 
Nuntii: 19
Nomen dedit: Mart 17 Ian, 2006 23.04
Location: cansia

Lingua Latina et scientia

Emitteby Ericus Palmén on Merc 07 Feb, 2007 17.55

Ericus Palmén Decurioni s.d.p.
Tu adiectivum ’utilis, -e’, ut ipse concedis, stricto sensu adhibes; illi autem magistri et professores â€
Ericus Palmén
Ericus Palmén
 
Nuntii: 273
Nomen dedit: Lun 01 Mart, 2004 14.32
Location: Media Finnia

Emitteby Marcus Favonius Ursinus on Merc 07 Feb, 2007 19.37

M. Favonius Ursinus sodalibus eruditissimis, imprimis Erico Palm
Marcus Favonius Ursinus
 
Nuntii: 465
Nomen dedit: Sat 08 Iul, 2006 11.28
Location: Germania Inferior

Lingua Latina et scientia

Emitteby Ericus Palmén on Merc 07 Feb, 2007 20.50

Ericus Palmén Marco Favonio s.d.p.
Mihi abhinc paucos annos redactor cuiusdam periodici militaris telephonavit et dixit sibi nuper commentationem (Finnice scriptam) missam esse, in qua quaedam sententia Latina interposita esset: "Civis pacem, para bellum." Id quidem se intellegere, ad pacem servandam cives ad bellandum, si opus esset, paratos esse debere, sed aliquid absurdi sibi videri in forma illius sententiae esse. Respondi eum rectissime iudicasse et addidi omnem ex illa sententia absurditatem, si vocabulum 'Civis' delevisset et in locum eius 'Si vis' substituisset, sublatum iri. Id fuit sat sapienti; redactor ille manifesto Latinitatis peritiorem se praestitit quam auctor dictae commentationis, qui Latine parum sciens tamen eam sententia Latina ornare voluerat. Nonne hoc quoque ostendit, si quis Latinitatem linguam mortuam esse contenderit, eum interrogandum esse, num usquam mortuam maioris vigoris convenerit? Optime valeto!
Ericus Palmén
Ericus Palmén
 
Nuntii: 273
Nomen dedit: Lun 01 Mart, 2004 14.32
Location: Media Finnia

Scientia aut humanitas?

Emitteby Phlebas on Sat 10 Feb, 2007 11.56

Phlebas Caroli Monti sodalibusque scientiam humanitatemque quaerentibus salutem

Quantum mirum dialogum scientia et humanitas latine seruere!

Lucretius, discipulus, lato sensu, Democriti, che il mondo a caso pone, somnium observat, animum investigans, et poetice depingit:

Praeterea molli cum somno dedita membra
effusumque iacet sine sensu corpus onustum,
est aliud tamen in nobis quod tempore in illo
multimodis agitatur et omnis accipit in se
laetitiae motus et curas cordis inanis.


quaestionem valde hodiernam ponens: recentissime acta The Economist de neuroscientia et de libero arbitrio ample disputat (1): inventiones neuroscientiae demonstrant quomodo infirmitates et natura limitent libertatem hominum, id est ambitum liberi arbitri. Sed quomodo veritas scientiae informare debeat evolutionem societatis, id est leges et mores, non scientia ipsa sed psychologia, oeconomia, ethica investigare possunt.

Exempli gratia, quantum ad ethicam attinet, verba praestantissima Thomae (De Malo) nobis ostendunt quanti momenti sit investigatio naturae et infirmitatum hominum ut recte iudicemus culpas aptasque leges instituamus:

Dicendum, quod peccatum ex malitia commissum ceteris paribus est gravius peccato quod committitur ex infirmitate.


Scientia infirmitatem indagat, ethica et ius ostendunt quomodo actus infirmi iudicandum sit.

"homo sum, humani nihil a me alienum puto" evocat Seneca noster et doctissime scribit Naturalium Quaestionum libros, ubi invenies:

Veniet tempus quo ista quae nunc latent in lucem dies extrahat et longioris aevi diligentia. Ad inquisitionem tantorum aetas una non sufficit, ut tota caelo vacet: quid quod tam paucos annos inter studia ac vitia non aequa portione dividimus? Itaque per sucessiones ista longas explicabuntur. Veniet tempus illud quod posteri nostri tam aperta nos nescisse mirentur.


Visio mirabilis evolutionis scientiae et ignorantiae hominum, aptissima ad instruendum magistrum tuum, Caroli Mons optime: scientia non est religio et veritatem scientiae sine mora investigare, disputare, mutare, id est augere, necesse est. Historia scientiae utendum est, sicut aptissimo instrumento ut recte potentiam et fragilitatem scientiae intellegamus.

Ecclesia Romae iudicat opus Galilei propter contradictionem sacrae scripturae, audacter Frater Thomas Campanella scribit "Apologiam pro Galileo mathematico florentino" in qua verba verae sapientiae invenire potes:

Ad 10um nego, scandalum activum, quod solummodo vetatur in evangelio, oriri ex Galilaeo. Non enim vacat ipse rei illicitae sed indagini veritatis, quam mandat et iubet Deus ... et ex evangelio, ubi Christus talentum a se datum sub poenis maximis defodi vetat.


Forsitan casus Galilei nihil intersit magistri scientiae tui? Et unde veniat amor scientiae, ex imperio ethico (ut dicit Thomas noster) aut ex desiderio utilitatis (ut dicit magister ille sapientissimus tuus, Caroli Mons mi). Et quo ducat, ad utilitatem aut ad veritatem?

Verba philosophorum, historicorum, legislatorum omnium aetatum se miscent cum verba scientiae: quantum dialogus variarum disciplinae vitalis est, quantum iucundus symposion investigatorum ad humanitatem perficiendam!

Id est, mea humillima opinio, scientia instrumentum, et valde mirabile, est. Quomodo instrumento scientiae utendum sit non ipsa scientia sed historia, oeconomia, ethica, estetica (et Iulia nostra rectissime de elegantia demonstationum scribit) id est humanae scientiae, nos docent. Aut, ut ita dicam, non est studium humanitatis sine scientia, non est vera scientia sine humanitate.

Ne, sicut servi scientiae, scientiae obsequamur sed, sicut domini intellectus nostri, veritatem quaeramus, opus est humanitas nostra scientiam sapienter dirigat et scientia informet studium humanitatis.

Valete

A.d. IV Id. Feb. Mediolani, grates agens diis primae pluviae

-------------------------------------

(1) The Economist, Dec. 23rd 2006 – Jan. 5th 2007
Nomino numeros; quibus numeramus; et adsunt in memoria mea non imagines eorum, sed ipsi.
Phlebas
 
Nuntii: 123
Nomen dedit: Iov 29 Dec, 2005 15.42

Emitteby Iulia on Sat 10 Feb, 2007 21.18

Iulia Phlebae suo carissimo s. p. d.
non est studium humanitatis sine scientia, non est vera scientia sine humanitate.

Ne, sicut servi scientiae, scientiae obsequamur sed, sicut domini intellectus nostri, veritatem quaeramus, opus est humanitas nostra scientiam sapienter dirigat et scientia informet studium humanitatis.

Agere non possum, carissime mi amice, quin ex animo tecum consentiam.
Articulo illo vero in Oeconomista divulgato etiam ego valde commota sum, quia ibi maiore, quam fieri solet, diligentia disseritur, quid eveniret, si biologi revera demonstrarent voluntatem omnino non esse liberam, imaginationem, a qua equidem abhorreo. Ceterum verbis tuis doctissimis addere nil possum.

Cura, mi amice, ut quam optime valeas! :D
Gottingae, a. d. IV. Id. Feb.
Quaecumque a proavis tibi sunt commissa benignis,
compara ut illa tibi propria possideas!

- mathesis localiter trivialis -
Iulia
 
Nuntii: 569
Nomen dedit: Lun 15 Mart, 2004 18.08
Location: Saxonia Inferior

Studia humanitatis

Emitteby Phlebas on Ven 02 Mart, 2007 0.33

Phlebas Iulia, Caroli Monti sodalibusque omnibus salutem

Heri Le Monde (1) publicavit articulum cuis titulus est "Quales exitus studiorum universitatis?" (Quels d
Nomino numeros; quibus numeramus; et adsunt in memoria mea non imagines eorum, sed ipsi.
Phlebas
 
Nuntii: 123
Nomen dedit: Iov 29 Dec, 2005 15.42

Emitteby Rhumak on Ven 02 Mart, 2007 15.29

Phlebae aestimato psd

Tibi amice de cinemate et musica respondeo quae nempe iam scis: minime verum est nos europaeos ab america dependere: nam complures registas praeclaros et habemus et alimus, qui ubique orbis conspiciuntur: vide Bellocchio, Benigni, et habueramus Gassman, De Sica etc; Graeciam Anghelopoulos, Hispaniam Almodovar lustrant; pro spectaculo Beppe Grillo, pro theatro Dario Fo, Albertazzi; pro musica Andrea Bocelli, Luciano Pavarotti, Riccardo Muti; et item Germania his in artibu maxime pollet (praesertim in musica) et itaque ceterae nationes magnos viros cinematis theatrique habent. Peccatum quo laboramus quantum ad varias species spectaculorum non bonorum defectio, sed communicatio est. Nos nosmet novimus et americanos sed non Germanos; Germani semet norunt et americanos sed non Italos, Hispani semet norunt et americanos sed neque Italos neque Germanos... Sive: unusquisque nostrum semet americanosque novit colitque sed non ceteros. Itaque in musica: nosti nos optimos musicos habere musicosque americanos pariter cognoscis, sed quid de musicis eg Finnis? ego nil comperi. Europa sibi artifices suos non communicat vel nonnisi intra angusta populoque praesepta conclavia murosque. tamen res mutari coeperunt.

Ego Corae saltationi renascentiae studeo: paucos ante menses quidam mei condiscipuli in Suebiam vocati sunt, quia illic gubernatio discipulos technicarum scholarum suos parum humanitatis peritos iudicavit; quapropter scholas discipulos peregrinos ceterae Europae artes peculiariaque sua discipulis earum exposituros convocare coegit: quaedam schola technica etiam gregem meum invitavit, qui saltatum renascentiae more illuc volavit (tunc ego necdum inieram): inter alia imprehensa hoc mirabile est, quod omnibu discipulis suis, post haec spectacula, pensum dederunt, ut centum verbis quisque quae viderat describeret: moles scriptorum congesta est in opus unum postmodo publico munere editum. Quam sententiam et ceteras quidem nationes europaeas - nostram quoque - probaturas esse sperandumst! sine communicatione nullus communis victus.

Valete
Πατρίους παραδοχὰς ἅς θ' ὁμήλικας χρόνῳ κεκτήμεθα, οὐδεὶς αὐτὰ καταβαλεῖ λόγος οὐδ' εἰ δι' ἄκρων τὸ σοφὸν ηὕρηται φρενῶν.
Quae tradita patribus coaeva temporis accepimus, ea nulla ratio destruet neque alta mens si repperit scientiam.
(Eur., Bacch., 201-3)
Rhumak
 
Nuntii: 691
Nomen dedit: Lun 12 Iun, 2006 13.49
Location: Latium

Emitteby Iulia on Sat 03 Mart, 2007 22.50

Iulia Phlebae Rhumakique s. d. p.

Grave quidem est, quod scripsisti, optime Phlebas, et rectissime reprehendis tantum distare videri inter "studia" humanitatis in universitatibus et "vera" humanitate, quae non solum, sed maxima ex parte per scientiam linguarum antiquarum traditur. De doctissimis verbis tuis, mi amice, conabor quid sentiam tibi ac ceteris patefacere.

Incipis articulo, quem ephemeris praeclara francogallica "Le Monde" paucos ante dies publicavit. Profecto periodicum Germanicum "Der Spiegel" (1) mensi Decembri de simili quaestione disseruit, concluditque nimios iuvenes historiae linguisve studere, numerum studentium disciplinarum physicarum technicarum autem non sufficere; qui disciplinarum humanitatis studia perfecerint, saepissime longius sex mensibus laborem quaerere et multo minus pecuniae pro eo accipere quam qui scientiis naturalibus technicisve operam dederint. Cuius disciplinae iuvenes studia suscipiant, quamquam ipsi iuvenes dicant statum rerum oeconomicum magni momenti iis esse in materiebus elegendis, tamen secundum articuli auctores maxima parte ex eo pendet, e qualibus familiis veniant: Ita quorum parentes medici vel advocati sint, rarius rebus sociologicis neque ingenariis studere; aliter ac iurisconsultorum, medicorum eorumque, qui humanitatis disciplinis studeant, parentes ingenariorum plerumque non academicos esse nonnullosque ingenarios studia suscipere solum postquam aliam professionem didicerint. Suspicantur etiam auctores fortasse eius rei causa in Germania pauciores iuvenes scientiis naturalibus vel ingenariae studere quam in aliis terris (E iuvenibus inter viginti et triginta annos natos 0,8% in Germania, 2,1% in Britannia, 1,7% in Finnia, 2,2% in Francogallia, 1,3% in Hispania, 0,9% in Italia talia studia compleverunt), quia in scholis non satis technica doceatur.

In hoc quidem articulo assentior, Germaniam sicut plerique aliae Europae terrae, cum opibus naturalibus careant, hominibus scientiarum naturalium technicarum doctis egere. In hoc puncto autem cavendum est, ne scholae nimis oeconomiae subigantur, nam schola singulus fere est locus, ubi revera vitae, non professioni disci possit.


Pergis, Phlebas, argumento Europaeos non solum ea, quae humanitatis studiis disci possint, non adhibere ut mundo serviant, sed etiam "opera humanitatis" non producere. Quod ad primum punctum attinet, mihi semper videbatur in librariis multos libros emi posse ad eventus actuales pertinentes, iudicare de iis autem non possum, cum non legerim. Quod attinet ad pelliculas musicamque, Rhumaki oportet assentiar: Non omnino desunt opera humanitatis in Europa, immo saepenumero ea, quae proferunt Europaei, maioris habeo quam quae ex America ad nos pervenerunt. Studia humanitatis quidem vana sunt, nisi in vita reali adhiberi possunt, nisi hominibus mundoque prosunt. Aspice ergo pelliculas Hollywoodianas, quae immensis sumptibus immensique usu cum instrumentorum technicorum tum effectibus qui dicuntur virtualibus factae sunt, sed saepissime de nihilo agunt, et compara cum multis pelliculis Europaeis, quae ipsa narratione movent spectatores, non bestiis miris magnisve proeliis... Nimiae pelliculae Hollywoodianae una eademque ratione factae sunt: Aliquantulum amoris, aliquantulum belli, fortasse narrationem notam, et ecce pelliculam. Accedit quod praemia Oscar non aeque distribuantur et itaque merito plus de iis fit sermo: Nam quot disciplinis pelliculi Americani iudicantur, una solum disciplina exstante optimae pelliculae peregrinae. Aequius iudicium habendum est praemiorum Nobelianorum litteraturae, ubi inter laudatos inveniuntur plus septuaginta Europaorum, e Civitatibus Unitis autem decem solum laudatos ortos esse.

In hoc tuo argumento, Phlebas, etiam non video quomodo a prima parte ad secundam pervenias: Pro certo enim plures Europaei linguis cum modernis tum antiquis operam dant quam Americani; si ergo humanitas maxima ex parte in linguis antiquis nititur, in Europa amplius eam vigere necesse est quam in Civitatibus Unitis. Tamen dicis Europaeos pauciora "opera humanitatis" producere quam Americani. Nonne opera, quae humanitatis dici possunt, imprimis a talibus hominibus producuntur, qui curant humanitatem? Aut ergo Americanis maior est humanitas quam Europaeis (illis saltem, quae pelliculae et similia proferunt) aut ea opera, de quibus mentionem fecisti, non sunt humanitatis. Mihi hoc verius esse videtur illo, nam quamquam minime credo Americanis minorem esse humanitatem quam Europaeis, tamen mihi videtur ibi ut in una terra facilius opes conferri posse ad pelliculas Hollywoodianas faciendas quam in tot singulis terris Europaeis, opes autem a spectatoribus conferri, qui istas pelliculas spectant; multa pars autem hominum pelliculas de nihilo agentes amare videntur.

Maximi momenti etiam est id, Rhumak, quod dixisti Europaeos se invicem parum nosse. Revera de eo meditans animadverti me - scilicet - civitates Germanicas nosse, praeterea civitates Americanas memoriae tradidisse, sed Austriae, Francogalliae, Italiae certas regiones provinciasve licet sciam, tamen nonnullas restare, quas in tabula geographica nominare non possim; item me fortasse maximi momenti librorum Germanicorum nonnullos legisse, sed litteris alienis parum peritam esse, idque haud minime eius rei causa, quod in schola non docentur. Hoc in America melius solvitur, nam in universitatibus sunt lectiones historiae mundialis designatae studentibus primorum annorum, qui studentes in principio multis rebus operam dare solent. In Germania ad examen maturitatis superandum multis rebus opera danda est, postea autem in universitate uni disciplinae duabusve solum studetur; ad studia ergo humanitatis divulgenda oportet ea in scholis docere.


Phlebas, quae de studiis linguarum alienarum in Italia dicis, scilicet studentes solum historiam litterariam discere, linguas autem ipsas non scire oportere, credere vix possum. An dicere voluisti a studentibus quidem posci linguam scire, eos autem ob nimiam pigritiam opera conversa legere? Ita etiam in Germania saepissime se habet, imprimis inter eos, qui magistri in scholis fieri volunt. Soleo singulis semestribus uni cursui de lingua Latina interesse, et animadverti studentes Latinitatis Mediae Recentiorique, quae disciplina non in scholis docetur, plures linguas scire et minus a conversione pendere quam qui Latinitati Classici student, quorum scilicet plerique magistri fieri volunt; similiter in mathesi physicaque se habet, nam qui diploma petunt plerumque ingeniosiores sunt et magis rei causa lectionibus intersunt quam magistri, quorum multi - mirabile dictu! - eisdem ipsissimis rebus peccant, quas olim in discipulis reprehendent.



Conclusioni tuae, carissime Phlebas, nil habeo quod addam.


Vae me, quanta scripsi! Quaeso loquacitati meae ignoscatis! :oops:
Valete!

Gottingae, a. d. V. Non. Mart.
Quaecumque a proavis tibi sunt commissa benignis,
compara ut illa tibi propria possideas!

- mathesis localiter trivialis -
Iulia
 
Nuntii: 569
Nomen dedit: Lun 15 Mart, 2004 18.08
Location: Saxonia Inferior

Pelliculae cinematographicae et humanitas

Emitteby Phlebas on Lun 12 Mart, 2007 23.20

Phlebas Iuliae Rumakique salutem

Rectissime, amici, opera cinematographica praeclara auctoresque Europeae meministis. Vere operum non obliviscor, sed numeros observo et de auctoritate intellectus Europaei dubito.

Quomodo auctoritatem istam mensurare possumus? Mea opinio simpliciter: numerus spectatorum satis accurata mensura est.

Si numeros inspiciamus inveniamus, proh dolor, in theatris Europae circiter 70% spectatorum opera cinematographica Americana spectare. (1)

Et diversitates culturarum nationum Europearum non explicant phaenomenon: omnes Europaei opera Americana spectant!

Iulia nostra rectissime dicit:

In hoc tuo argumento, Phlebas, etiam non video quomodo a prima parte ad secundam pervenias: Pro certo enim plures Europaei linguis cum modernis tum antiquis operam dant quam Americani; si ergo humanitas maxima ex parte in linguis antiquis nititur, in Europa amplius eam vigere necesse est quam in Civitatibus Unitis.


Opus est conexum meum plane ostendam:

Cultura, ut ita dicam, Americana invadit Europam et opera Europaea quasi ignota sunt.

Cur? Mea opinio caremus cultura, id est unitate, Europaea.

Non debemus simplicitatem culturae americanae imitari sed invenire meditullium culturae Europaeae.

Cives formare debemus in communes radices (Romae, Graeciae, Christianitatis, medii aevi, antiquissimae historiae relationum cum nationibus Tyrrhenicis et Arabiae …) et in diversitatem linguarum culturarumque.

Tacitus noster (2) dicit:

Inde etiam habitus nostri honor et frequens toga; paulatimque discessum ad delenimenta vitiorum, porticus et balinea et convivorum elegantiam. Idque apud imperitos humanitas vocabatur, cum pars servitutis esset.


Eliegendum est: aut strenue defendere culturam nostram venustissimam aut servire.

Valete


-----------------
(1) Eurostat, European business - 2006 edition - Chapter 21: Communications and media
(2) De vita Iulii Agricolae, xxi
Nomino numeros; quibus numeramus; et adsunt in memoria mea non imagines eorum, sed ipsi.
Phlebas
 
Nuntii: 123
Nomen dedit: Iov 29 Dec, 2005 15.42

PreviousNext

Return to Alia themata

Qui adsunt

Users browsing this forum: No registered users and 1 guest

cron