YLE Colloquia Latina

Spartacus suis sodalibus sal.

Iam dudum nullum aenigma mythologicum habemus. Vereor ne aliqui tales res spernere possint. Venia data vobisque volentibus, habeo in animo novam interrogationem omnibus participibus mittere...


Valetote!

M. Favonius sodalibus s.
Forum nostrum mythologicum ne orbum longius atque desertum esse videatur, ecce nova quaestio, qua sapientium torqueantur ingenia :
Deus quidam (A) deam quandam (B) primam sibi elegit concubinam. Quae gravida facta ab isto deo insolenter tractata est (C). Paulo post partus insoliti sane atque monstruosi (D) tempus advenit.
Qui deus (A)? Quae dea (B)? Quid accidit (C, D)?
Valete. III Id. Feb.

Spartacus Favonio omnibusque mythologiam amantibus sal.

Gaudeo, Favoni, magnopere, quia thema istud de mythologia denuo "in proscenio" misisti!

Inspice num haec responsa idonea fortasse tibi sint:

A: Zeus
B: Semele
C: Vidit Iovem in tota sua gloria ac postea,
sex mensium praegnatione occididit
D: Dionysus natus est, nono mense, e Iovis femore !

Postea factus Dionyus amens est, ab Hera (vel Iunone).


Valetote.

Marcus Spartaco suo s.d.p.
A: Iuppiter sive Zeus: optime! Sed quod ad B, C, D attinet, erras, mi amice, quod valde doleo . Iuppiter Semelam insolenter quidem tractavit Dionysumque insolito modo edidit, sed Cadmi et Harmoniae filia neque dea erat neque Iovis concubina prima. Quid igitur? Utinam ne nimia meditatione torquearis! Vale. III Id. Feb.

Tiberis Marco et Spartaco s.d.p.
nomine Iovis cognito hoc quidem aenigma facile solvi potest, si modo consilium quoddam nobis non desit.
tamen Spartaco nostro spatium quoddam deliberandi concedere velim,ut qui primus nomen dei quaesiti indagaverit.
valete,
III.Id.Feb.

M. Favonius sodalibus, imprimis Spartaco Tiberique s.d.p.
Eximiam admiror, mi Tiberis, probitatem tuam atque humanitatem. Et in te, mi Spartace, nunc maxima est facultas ad rem „medi"tando perficiendam. Valete. Pr. Id. Feb.

Iulia Marco ceterisque aenigmatophilis sal.

Prima Iovis uxor erat Metis (B), quam, ex oraculo cognoscens eam parturam esse filium, qui ipsum Iovem regno esse pulsurum, gravidam devoravit (C). Quae autem eo tempore partura non erat filium, vero Minervam, quae, una cum matre devorata, partus tempore a Vulcano e Iovis capite liberata est (D). Videte Hes. Theog. 886-900.

Numquam autem nisi hic alicui contigit, ut sortem ab oraculo praedictum averteret. Quam ob rem pulcherrimum habeo aenigma tuum, Marce!

Valete!

Marcus Iuliae s.d.p.
Gratulor tibi de re diligenter perfecta. In exspectatione nunc novae sumus quaestionis. Vale.

Spartacus omnibus sodalibus praecipue Favonio, Tiberi Iuliaeque sal.

Propter laborem, heu!, sero ad has paginas veni.

Tibi, Iulia, scientiae tuae causa, plaudam!

Mirandae valde mihi sunt, palam dicam, Tiberis vel pudor vel benevolentia, ne dicam morum suavitas.

Spero mox novum aenigma mythologicum venturum esse, ac iam animo laetanti finem huius epistulae nunc faciam.

Valetote!

Iulia sodalibus sal.

Difficile vero est aenigma invenire, quod neque nimium difficile neque Marco nimium facile est. Videamus ergo istud:

Rex quidam (A) tres habet filias (B, C, D), quibus dea quaedam (E) mandat, ut vas certi generis servent. Una filiarum - dicamus B - primum contra deae iussum vas inspectat et (F) in illo invenit, deinde a deo quodam (G) amore sororis C affecto, cum eam visitare vult, pecuniam poscit. Quae ob facinora primum ab E - alia dea (H) adiuvante - punitur, deinde a G in lapidem mutata est.

Valete.
Gottingae, a. d. XVI. Kal. Mar.

Tiberis Iuliae sal.
Tres Cecropis (A) natae fuerant, mea Iulia, quarum
nomina sunt, ni fallor, Aglauros(B), Pandrosos(C), Herse.(D)
corbem, ubi Pallas (E) Erechthea (F) condiderat,retegebat (B),
quod vetuit dea. non satis est:iuvare recusat
Mercurium (G).fuit ille incensus amore sororis (D).
quam cum vellet adire, soror( B) prohibebat amantem,
ni daret aurum avidae. sed Pallas perdidit illam
Invidia adiuvante(H) dea.poenam graviorem
Mercurio dederat: qui saxum fecerat illam.
valete.
XV.Kal.Mart.

Iulia Tiberi ceterisque sodalibus sal.

Postquam per tres dies Marco adiuvante conata sum tibi versibus respondere, nunc hastam abieci. Vide pentametrum singulum, qui contigit: Vobis tam facile est condere versiculos!

Sane scis aenigma meum abs te perfecte solutum. Si vis, novam nobis propone quaestionem.

Vale!

Attendite! Musa tandem venit!

Iulia sodalibus, imprimis Tiberi sagaci aenigmatum solutori sal.

Ecce responsum meum, quem quarto die tandem versibus scripsi:
Enodata tibi est, Tiberis, res carmine docto:
Oro nobis nunc ut nova munera des.
Quod, si vis, aenigma tuum, Tiberis mi, age pulchris,
si tibi Musa favet, versibus efficias.
Scis componere tu quod ego non scribere possem -
heu! tibi tam facile est condere versiculos!!!

Versus primus est Marci, quem meo malui.

Valete quam optime!

Tiberis sodalibus suis, imprimis autem Iuliae ,poetriae praestantissimae , sal.
summa cum admiratione , mea Iulia, versus tuos iucundissimos legi.
excellentissime !
videamus, an mihi quoque responsuro Musa faveat !
ecce novum aenigma ad mythologiam pertinens:

tandem pro scelere illum (A) uxor (B) crudeliter ulta est:
afuit huic pietas, cum orbam se redderet ipsam
natum(C) interficiens vindexque sororis amatae (D)
terribiles epulas cenanti apponeret illi.

valete.
X.Kal.Mart.