YLE Colloquia Latina

Nova carmina Latina
--------------------------------------------------------------------------------
Nuntium misit: Marcus Favonius ® | 05.12.2003 - 22:29 | |
--------------------------------------------------------------------------------
M. Favonius versificatoribus sal.
Cum novissimi gregis „moderatores desiderantur“ nuntii (n. 83sqq.) a proposito non mediocriter deflexerint, alienum non videtur novum hoc proponere thema: „nova carmina Latina“. quicumque ergo divino afflatu tacti nova carmina Latina condiderint vel Latini sermonis amore incensi peregrina carmina in Latinum converterint, ii grati et optati hoc intrabunt forum, dummodo ne „res privatas et honestatem cuiusvis infament“.
QVIS VESTRVM INCIPIET? CARMEN QVIS CONDERE VELIT?
ECCE PATENT PORTAE: MITTITE VERSICVLOS!



RE: Nova carmina Latina
--------------------------------------------------------------------------------
Nuntium misit: Marcus Favonius ® | 05.12.2003 - 22:40 | 1 | |
--------------------------------------------------------------------------------
Mendum metricum: in locum "velit" succedat "QVAERIT". Poetam me non esse intellegetis.


RE: Nova carmina Latina
--------------------------------------------------------------------------------
Nuntium misit: argentea | 05.12.2003 - 23:39 | 2 | |
--------------------------------------------------------------------------------
salve!
tibi scriberem versus, sed soleo convertere carmina Latina in meam linguam...


RE: Nova carmina Latina
--------------------------------------------------------------------------------
Nuntium misit: Marcus Favonius ® | 06.12.2003 - 00:37 | 3 | |
--------------------------------------------------------------------------------
M. Favonius denuo versificatoribus sal.
Quod ad carmina peregrina Latine reddenda attinet, oblitus sum gregem illum commemorare „de carminibus in Latinum convertendis“, qui mense Aug. a..c copiose institutus erat a Tiberi, doctissimo nostro sodali Austriaco. Valete.



RE: Nova carmina Latina
--------------------------------------------------------------------------------
Nuntium misit: Herimannus | 06.12.2003 - 01:42 | 4 | |
--------------------------------------------------------------------------------
Herimannus Marco et recentibus Latinis auctoribus sal.

Nonnulla equidem carmina Latine scripsi, quorum pauca libenter transcribam, quamquam paululum erubescens. Gratias ago maximas Marco, qui hanc facultatem omnibus praebeat.
Hodie me longum iter exspectat. Valete!


RE: Nova carmina Latina
--------------------------------------------------------------------------------
Nuntium misit: Tiberis ® | 06.12.2003 - 23:25 | 5 | |
--------------------------------------------------------------------------------
salvete,quicumque dediti estis carminibus Latine condendis!

deficiente anno cedente vigore dierum
utile erit tempus condere versiculos.
gratia, Marce, tibi, quod erat magnae tibi curae,
nostris propositis aptus ut esset locus.
versificatores,quotquot estis,adeste,operique
di faveant nostro, quamquam id inutile erit.

sed satis superque vobis proposuisse arbitror exempla mediocris meae facultatis versificandi. quanto plus iuvabit versus legere eorum, qui huius artis peritissimi sunt. quam ob rem vobis carmen praestantissimum reddere velim, quod nuper in pagina interretiali Circuli Latini Panormitani inveni.
valete.
ecce carmen,cuius auctor est Gerardus Alesius:

Ad Americanos post ruinam turrium geminarum (11.9.2001)



Turrium moles ruit alta perque
aethera immensum volat atra nubes
territans caelum gemina ruina
flammivomenti.

Grandia et dudum monumenta dicta
gaudium et splendor populo superbo
haec iacent – heu – milibus atque fiunt
grande sepulcrum.

Hoc stupet mortale genus per orbem
et stupet mundus nova monstra totus
stant stupore omnes oculosque multos
lacrima rumpit.

Lacrimant multi: simul ira fervet
saeva tam diro sceleri ut sit ultor
illico praesto: properant: iuvat quid
bella movere?

Profuit numquid potuisse magnum
Lydio regi superare regnum?
Pythio num consilio videtur
arma parare?

Mediae prosunt populis quid arma?
Nonne Dareum impulit error asper
magnus ut vellet celeberque parvos
frangere Graecos?

Ira quod suasit properata mensque
et dolor numquam poterit iuvare.
Effero numquamque furore iusta
poena petetur.

Vis vocabit vim: ratione recta
semper, o gens, iustitiam colatis
atque recto consilio, deosque
poscite pacem!




RE: Nova carmina Latina
--------------------------------------------------------------------------------
Nuntium misit: Marcus Favonius ® | 13.12.2003 - 15:11 | 6 | |
--------------------------------------------------------------------------------
In colloquiorum interpellatorem.

IMPROBE, SERMONES SCELERATA MENTE RETARDAS.
FVROR ME CEPIT. QVIS MIHI SVBVENIAT?
BESTIA MORTIFERIS INCENSVS DENTIBVS IRA
MENTEM DIVELLAT CERBERVS IPSE TVAM!



RE: Nova carmina Latina
--------------------------------------------------------------------------------
Nuntium misit: Marcus Favonius ® | 13.12.2003 - 20:05 | 7 | |
--------------------------------------------------------------------------------
In eundem, ne indignatio nostra ingravescat.

Colloquiis caesis pessum data lingua Quiritum
ingemit ultrices invocat et Furias:
„O Furiae, manibus discerpite sanguine tinctis
auctorem tanti – promeruit – sceleris!“



RE: Nova carmina Latina
--------------------------------------------------------------------------------
Nuntium misit: Gastón - latine incipiens | 14.12.2003 - 12:18 | 8 | |
--------------------------------------------------------------------------------
Salve Marce Favoni!

Tuum ingenium non modo Musae irritant sed etiam Furiae.

Vale!


RE: Nova carmina Latina
--------------------------------------------------------------------------------
Nuntium misit: Marcus Fregnacciandus | 17.12.2003 - 11:55 | 9 | |
--------------------------------------------------------------------------------
Marcus Fregnacciandus M. Favonio ceterisque poetis salutem.

Marce carissime, gratanter accipio facultatem, quam dedisti, epigrammata, dummodo gravia sint, scribendi et hic edendi. Oculis vestris duos versiculos meos, de brevitate vitae tractantes, proponam.

DEFLUIT E TREMULIS MANIBUS NUMQUAM REDITURA
VITA BREVISSIMA EO, QUO BREVIOR, MELIOR.

Valete omnes!

Datum Phaleriae die quinto ante Idus Decembres.


RE: Nova carmina Latina
--------------------------------------------------------------------------------
Nuntium misit: Marcus Favonius ® | 17.12.2003 - 20:34 | 10 | |
--------------------------------------------------------------------------------
Marcus Favonius Marco Fregnacciando ceterisque versificatoribus sal.
---------------------
Annos si tantum numeras mensesque diesque,
contrahitur vitae tempus in exiguum.

Erras, si spatium quereris tibi perbreve vitae:
Longumst, si tibi lex est rata „Carpe diem.“
---------------------
Data XVI Kal. Ian. Ex comitatu Morsatensi.



RE: Nova carmina Latina
--------------------------------------------------------------------------------
Nuntium misit: Marcus Fregnacciandus | 18.12.2003 - 16:06 | 11 | |
--------------------------------------------------------------------------------
Fregnacciandus Iuliae, deliciis suis, et omnibus poetis, dummodo libertatem loquendi ament, salutem.

Iulia carissima ac egregi viri, quid de me ipso faciam? Temptavi, confiteor, ad maiora verti, sed illa mihi tristissima evaserunt, haec, quae vobis propositurus sum, autem propiora indoli meae sentio et in eis magis delector.
Enim:

IULIA , DIXISTI MELIUS MALA VERBA RELINQUI:
SI FELLARE VELIS, QUALIA SINT DOCEAM.

DUM LINGIS RIGIDAM, STILLATIM OS IN TUUM HIANSQUE
MUNERA GRAMMATICES SEMINE MIXTA CADENT.

Valete omnes!

Datum Phaleriae ante diem XV Kalendas Ianuarias.





RE: Nova carmina Latina
--------------------------------------------------------------------------------
Nuntium misit: Herimannus | 02.01.2004 - 00:49 | 12 | |
--------------------------------------------------------------------------------
Herimannus legentibus sal.

Hoc versus transcribo, quos ante XXIII annos amicae dilectissimae die natali dicavi; amicitia nostra floruerat in urbe Ferraria, apud Padum (Eridanum) flumen iacentem, ubi ipsa vivit et ego aliquot annos vixi.

Nunc iam durae hiemes, iam quattuor atque viginti
vera animo et menti grata relicta tuis
a te sunt, quae tum cum me Ferraria diva
dulce tenebat - eras tunc mihi prima soror -
gaudia verba cruces partita es - nec licet illuc
regredi, abest quoniam tempus amicitiae.
Haec perpauca tamen tibi nunc tene: sic pudibundus
donat amans pueram flore, rubentque genae.

Novocomi, mense Septembri MCMLXXX

Et nunc paulum erubesco. Valete.



RE: Nova carmina Latina
--------------------------------------------------------------------------------
Nuntium misit: Mercurius Hungaricus ® | 12.01.2004 - 10:55 | 13 | |
--------------------------------------------------------------------------------
Ubinam estis, sodales? Mercurius sum!


RE: Nova carmina Latina
--------------------------------------------------------------------------------
Nuntium misit: Marcus Favonius ® | 13.01.2004 - 20:37 | 14 | |
--------------------------------------------------------------------------------
Salve, Mercuri!

Oro te adeas ad paginam hanc:

http://www.klak.com/zalk/nuntii/zalk01/1284.ph p




RE: Nova carmina Latina
--------------------------------------------------------------------------------
Nuntium misit: Herimannus | 15.01.2004 - 04:16 | 15 | |
--------------------------------------------------------------------------------
Herimannus parvulo gregi sal.

Hos versus composui optans potiora tempora colloquiis nostris redituros.
De colloquiis redivivis

Passim quattuor e regionibus orbis adire
iam tu iterum videas Mercurium Hungaricum
et trans Oceanum Regiomontanum; ibi Marcum
doctum, cui ventus suave nomen tribuit,
atque concivem Plini utriusque Herimannum
invenias, Gastòn quem solum Hiberiae alit
atque Ericum Palmen, mittentem verba Latina
Finniae ab ingratis et gelidis nivibus.

Multos perdidimus, quos speramus redituros,
plures colloquia haec splendida perficient.

Novocomi, a. d. XVIII Kal. Februarias, anno MMIV.

Valete!



RE: Nova carmina Latina
--------------------------------------------------------------------------------
Nuntium misit: Marcus Favonius ® | 15.01.2004 - 22:59 | 16 | |
--------------------------------------------------------------------------------
Marcus Favonius cum omnibus sodalibus, tum praeciupe Herimanno Novocomensi s.

VERE NOVO VELVTI SILVAS REVIRESCERE CERNIS,
SIC NOSTRIS FAVEANT DI QVOQVE COLLOQVIIS.

Valete.



RE: Nova carmina Latina
--------------------------------------------------------------------------------
Nuntium misit: Herimannus | 17.01.2004 - 01:25 | 17 | |
--------------------------------------------------------------------------------
Herimannus colloquentibus sal.

Versus meus V metrice incorrectus est!

doctum, cui nomen suave Favonius est,

Valete!



RE: Nova carmina Latina
--------------------------------------------------------------------------------
Nuntium misit: Gastón - Latine incipiens | 17.01.2004 - 21:33 | 18 | |
--------------------------------------------------------------------------------
Gastón Herimmano ceterisque sal.

Admiror illos qui versus metrice scribunt. Ego ne prosam quidem bene scribere possum. Spero relationem in lingua Latina quondam auscultare possim.

Certe mea lingua materna Hispana est, sed in Hispania non sum. Argentinus sum atque Bonis Aeribus (Bonaeropoli) habito.

Estne Regiomontanus Americanus?

Valete quam optime!


RE: Nova carmina Latina
--------------------------------------------------------------------------------
Nuntium misit: Anonymum | 18.01.2004 - 00:52 | 19 | |
--------------------------------------------------------------------------------
Herimannus Gastòn sal.

"invenias, Gastòn Aeribusque Bonis"

sic versum sextum convertere consentio. De Regiomontano memini eum e Brasiliana patria litteras mittere. Tibi, Gastòn, veniam peto, quod te ex Hiberica terra errans censuerim

Vale et valete!


RE: Nova carmina Latina
--------------------------------------------------------------------------------
Nuntium misit: Herimannus | 18.01.2004 - 16:00 | 20 | |
--------------------------------------------------------------------------------
Herimannus Gastòn sal.

Inveni locum eum, ubi Regiomontanus sodalis se in Brasilica terra natum confirmat. Inde versus meus.

Vale!

"RE: Convertite sententiam cum nominibus alienis

Nuntium misit: Regiomontanus ® | 18.07.2003 - 22:13 | 9 | |


Probate Tiberis,

(…)

Cum in regione montana (Lusitane ‘em região montanhosa’) Brasilicae Terrae natus essem, agnomen Regiomontanus excogitavi ut eam rem significaret, quod latinius simul quoque pro praenomine meo indeclinabili, id est Kl

Herimannus cunctis sodalibus et praecipue amantibus carminum Latinorum componendorum salutem plurimam dicit

Amici, Nonae Maiae mihi gratissimius et memorabilis dies erit: nam cum condiscipulis meis temporum illorum, quibus lingua Latina cotidiana voluptas et labor fuit, tricesimum diem festum anniversarium celebrabo periculi eius, quod "examen maturitatis" vocabatur, quo apud nos studia Lycaei tum concludebantur: aderunt nonnulli magistri et fere omnes discipuli, cenabimus et tempora beata revocabimus.
Ego, qui litteris Latinis et Graecis eminebam, statui parvum munus sodalibus offerre: carmen Latinum quo cena commemoratur, etiam in Italicum conversum.
Vobis novis et gratissimis Latinitatis sodalibus velim versus, quos composui, ante diem dictam ostendere, ut in iis menda linguae vel metri, si sint, inveniatis et corrigatis.
Ad intelligendum textum praemittam locum conventus esse ante Ferrariae aedem cathedralem divo Georgio dicatam, sub statua quae Borsum Estensium ducem commemorat; patefaciam etiam classem meam ab initio masculinam Ferrariae apud monasterium iuxta parvum templum Sanctae Monicae dicatum aulam habuisse, tum illi novos pueros et serius puellas (temporibus illis singulare!) iunctas esse; addam denique (palam dicite, si versus ultimus nimis obscurus sit) iam optimum magistrum, doctissimum Iulium Bettini, et condiscipulum praecellentem, Daniel Dalfiume, interea periisse.

Ecce carmen:

Numquis crediderit post sex lustra ante Georgi
templum, dum Borsus respicit a solio

dux, tot discipulos ex illa classe Lycaei
olim quae Monicae parvulam ad aediculam

coepit doctrinae latos percorrere fines,
incipiens annos quos memorare opus est,

et iuvenes quos sors paulatim iunxit alumnos
et miram maribus discipularum aciem,

huc conventuros? Aliquot venere magistri,
qui virides mentes erudiere, quibus

nunc etiam grati mentem convertimus. Illi
quos imo illicitum visere corde iacent.

Valete sodales!

Novocomi, a. d. VII Kalendas Maias.

Herimannus sodalibus et praecipue Marco F.

Nuntio vobis, amici, coenam qua cum multis condiscipulis celebravi tricesimum annum a fine Lycaei studiorum magno cum gaudio et cachinnis habitam esse in vico quodam apud Ferrariam urbem.
Carmen a me compositum, quod supra legere licet, et Marco adiuvante correcto post coenam et vinum convivis laetis legi; post lectionem condiscipulus meus Carolus, Latinae linguae parum peritus, concinere coepit: "Gaudeamus igitur - iuvenes dum sumus... ". Latina lingua, post tot annos, corda et mentes rursus simul contulit!

Valete, sodales novi!

Novocomi, a. d. VI Idus Maias MMIV

Ave, omnes.

Velim legatis hoc novissumum:

DIALOGUS

PAPILUS: MARCE, QUID EST CUR PENEM HABEAS SIC TURGIDUM,
AMICE?
MARCUS: PAUCIS ABSOLVAM: VIDI MEMORABILEM ET OMNI
SOLLICITUDINE REM DIGNAM.
PAPILUS: DIC, SUM TREPIDANTER!
MARCUS: DUM DOMUM ITURUS HERI QUAERENS SUB TEGMINE FAGI
PAULUM UMBRAE SUM, OCCURRIT IMAGO ET SPLENDIDA.
PAPILUS: QUIDNAM?
MARCUS: CULUS, OPUS PULCHERRIMUM, AMICE, APPARUIT ALTE.
ILLA PUELLA, IN AXE SEDENS, TENDEBAT AD AEREM
OPTANDAM NATIUM FORMAM: ADREXI MANEOQUE.
PAPILUS: HERCLE, MARCE MISERRIME, OPORTUIT INSERERE ILLI
TE PENEM ET CULUM SUBITO PERCIDERE ICTU.


Valete omnes.

Phaleriae a. d. VI Kal. Sept.

M. Favonius sodalibus s.

Versibus ludamus, amici !

Hodie casu in brevissima quaedam incidi carmina, quae haicua (*) vocantur. Haicu carmen est Iaponicum, idque minutissimum; constat enim tribus ex versibus, quorum unus quinque, alter septem, tertius iterum quinque continet syllabas. Haicua, quae hodie legi, Germanice tam eleganter erant condita, ut de haicibus Latine quoque componendis cogitarem. Equidem et haicua Latina fieri posse puto. Ut enim in media aetate varia erant carminum genera Latinorum, ita nostris quoque temporibus novis licet uti formis. Vos quid censetis?

Ecce haicu hodie quasi calamo per chartam currente a me compositum:

Nives decidunt.
Sonat flamma in foco.
Conticescimus.

Valete.
XIX K. Ian.


(*) Ut cornū, cornūs (n.), ita haicū, haicūs (n.).

Iulia sodalibus, praecipue autem Spartaco sal.

Hac nocte - factum fere incredibile - primos meos composui versiculos eosque ad Spartacum:

Soles me laudare, puellam extollere parvam,
Spartace, multa a me discere posse putans.
Quo laetor, tamen assentiri non tibi possum:
Immo ego multa abs te discere posse puto.

Utinam non nimia menda in iis lateant!

Valete!
Gottingae, a. d. XVII. Kal. Ian.

Spartacus nostris poetis Iulae Favonioque sal.

Quomodo potestis, amici, carmina scribere, nescio. Tali modo facere, ita cogito, haud queo ! Carmina de Spartaco mihi placuit, quamquam dignus eorum haud sim .

Evax, amici ! Sermo est "poeta nascitur, non fit".

Esto: merito vestro, inscientiam imperitiamque meam, illis versibus legendo, empleam!


Iubeo vos maxime valere.

Iulia Spartaco suo sal.

Sane dignus es meo epigrammate, mi Spartace: Tam saepe me ultra modum laudavisti ac me parem Favonio nostro inter doctissimos numerasti, et ego non tibi respondi, quamvis domi subriserim de laudibus tuis, quibus sane non digna sum, ut nunc denique tibi responderim.

Versus facere aliquid habet similitatis cum aenigmate difficiliore solvendo: Multum huc et illuc est meditandum, usque denique habeas versus, sed eo maior est voluptas verso semel confecto. Ceterum noli putare me faciliter hos versiculos ad te conscripsisse: Opus mihi erat compluribus horis, frequenti uso lexici et - ne omittam - musa maxime propitia; quae omnia non prohibuerunt Marcum versificem nostrum tamen invenisse mendum: Semper putavi syllabam primam verbi "solere" esse longam...

Verbum tuum de poetis attinet non ad omnes poetas, sed solum ad illos Horatios Catullos Vergilios ceterosque. Mihi quidem persuasum est cuiusviscumque hominis esse facultatem versus faciendi, etsi non sint pulchri. Age igitur et conare! Puto Musa propitia et te, si scis quae scribere velis, in fine incipiendo et primum pentametrum componendo posse versiculos scribere.

Vale quam optime!

Gottingae, a. d. XVI. Kal. Ian.

Iulia sodalibus, imprimis Spartaco sal.

Ecce iterum epigramma meum versu primo correcto:

Me laudare soles, nimium exaltare puellam,
Spartace, multa a me discere posse putans.
Quo laetor, tamen assentiri non tibi possum:
Immo ego multa abs te discere posse puto.

Gratias debeo Marco, qui bene mihi consuluit.

Valetote.

Laudibus egregiis - summis! - es, Iulia, digna,
quae scis tam lepidos scribere versiculos.

Spartacus Iuliae Favonioque ceterisque sodalibus sal.

Credite, amici, non ludo ! Re vera, nos Brasilienses, filii priscorum Latinorum saepe atque admodum, quamquam sincere, laudare solemus.

Sinite tamen dicam quod ego hanc rem vel libenter vel sub imo pectore facio. Utinam comites quales vos semper habeam !

Valete, sodales !

P.S. : Ceterum censeo imaginem mathematici a Iulia praebitam laudandam esse...
His verbis dictis, spero, amici, cum vos omnes tum praecipue Iuliam, propter Catonis imitationem, mox ac denuo subridentem fore...

Iulia Spartaco Marcoque sal.

Gratias tibi ago, Marce, ob versus tuos tam urbanos, qui ipse effeceris, ut nunc versus mei sint emendata, et qui ipse - etsi privatim - me certiorem feceris de partibus peioribus.

Ceterum, Spartace, vidi te me libenter laudare. Sed ubi pluries enumerasti me inter doctissimos in nostris colloquiis versantium, quod autem pro certo non sum, aliquid tibi respondere volui. Tantae enim semper erant laudes tuae, quantis digna ego sane non sum. Domi semper ridebam de tuis laudibus et de imaginatione te talia sincere dicere, et mihi dixi: "Quid tantis strepidat Spartacus laudibus mei?"

Valete!
Gorringae, a. d. XI. Kal. Ian.

(Quam sententiam traxi e Conradi Celtis oda III, IX: "Quid tantis strepidat Graecia laudibus?". Variatio mea (sine "mei") metrice paene congruit !)

P.S.: Ob litteram I in nomine meo, Spartace, minime in te eram irata, solum mirabar, quando ipse animadverteres, quod ubi non feceris, tibi indicavi.

Fregnacciandus omnibus qui amant nugas suas salutem dicit

Velitis audire novissimum carmen, quod nuperrime composui contra magistrum meum, qui nimia exspectatione cenam, quam coactus fui abolere ob quorumdam intervenientium amicorum defectionem, desideraverat.

CUR, BARNATE, DOLES NIMIUM QUOD CENAM ABOLEVI?
NONNE DOMI SATIAS, PORCE, SITIAM ATQUE FAMEM?

AT TIMEO NE SIT FOEDISSIMA CAUSA DOLORIS:
DEFUERANT CELERES CUM DAPIBUS RIGIDAE.

Velete omnes.

Datum postridie Non. Nov.

MUNERIBUS NIMIUM OBRUTUS DUM NOCTE DIEQUE
LUCTOR DOCTORIS NOMEN HABERE PETENS,
HOC TANTUM VOBIS, SODALES, SEMPER AMICI:
"QUAMVIS EGO LABOREM, IAM BREVI HUC REDEO."

Valde gaudeo, care Mercuri, me denique etiam abs te nuntium hic missum videre!!! Timebam enim te iam omnino a Coloquiis Latinis discessisse!! Cum primum epigramma confecero, quo rite poetice tibi poetae respondeam, iterum tibi scribam, interdum vale quam optime et bene prodeat thesis doctoralis tua!