by Ericus Palmén on Sat 06 Dec, 2008 15.28
Ericus Palmén Rhumaki et Discipulae et Brescae (quae itidem Italae sunt ?), s.d.p.
Lectis nuntiis vestris, quos sub titulo ‘De linguis Finnica et Gaelica’ scripseratis, conclusi me fortasse, quod ad linguam Finnicam, sermonem meum patrium, attinet, vel paululum vobis auxilii praebere posse (Gaelica autem lingua mihi omnino ignota est).
Abhinc plus triginta annos praeter exspectationem rogatus, ut duas monachas Polonicas, quae in Finniam migraverant, elementa linguae Finnicae docerem, primum respondi me ad tale munus vix aptum esse, ut qui Polonice nescirem. Cum vero apparuisset easdem monachas etiam linguam Italicam callere, paulum dubitans munus accepi. Initio lingua Italica pro instrumento docendi utebar, sed paullatim illae me etiam Finnice loquentem intellegere didicerunt – adeo, ut anno transacto ad Italicam linguam confugere iam non nisi perraro opus esset. Deinde se in studiis Finnicis satis progressas esse existimantes ratione autodidactica Finnice discere perrexerunt, et quidem, quod sciam, eximio successu.
Crediderim igitur me, licet haec unica fere occasio mihi fuerit Finnice docendi, huius rei non omnino esse imperitum. Neque tamen simile experimentum fieri potest in hac area, in qua omnia colloquia Latine fiunt. Itaque vos delego ad librum, qui iam anno 1977 primum editus est et cuius novissimam editionem, anno 2007 divulgatam, per ‘Google’ usque venalem prostare comperi. Auctor eius est vir Finnicus iam vita defunctus OLLI NUUTINEN, ac liber ipse, SUOMEA SUOMEKSI ( = Lingua Finnica Finnice explicata) inscriptus (ISBN: 9789517177375), multis fasciculis completur, in quibus vocabularia diversis linguis exarata sunt, e.g. IL FINLANDESE IN FINLANDESE, GLOSSARIO SUOMEA SUOMEKSI. Grammaticam quidem Finnicam in hoc fasciculo doleo Italice non esse explicatam. Eadem domo editoria (Suomalaisen Kirjallisuuden seura = Societas litterarum Finnicarum) sumptus praebente alius quoque liber (EEVA UOTILA-ARCELLI, LA LINGUA FINLANDESE, ISBN: 951-717-073-4), anno 1975 divulgatus est, in quo omnia Italice explicantur (eo ego illas monachas docens utebar); sed timeo, ne iam pridem divenditus sit. Recentiora opera eiudem argumenti non cognovi, sed non dubito, quin per interrete talia – saltem Anglice elaborata – reperturi sitis.
Si vobis contigerit, ut e.g. per materiam didacticam ab OLLI NUUTINEN exaratam praeliminariter linguam Finnicam noscatis, in problematis nimis arduis, quibus haud dubie occurretis, etiam me per electrogrammata privata aditote; fortasse ad ea solvenda aliquas res Italice potero explanare. Attamen iam in antecessum moneo sermonem meum patrium, diversissimis formis completum nec syntactice minus arduum, linguam haudquaquam facilem esse – mea quidem sententia multo difficiliorem quam linguam Latinam. Valete!
Ericus Palmén