YLE Colloquia Latina

Demetrius omnibus s.d.

Scitisne, quomodo linguam Latinam quam Board language sumere possim? Meum forum http://lingualatina.forumi.bg est.

Ericus Palmén Demetrio s.d.
Aperui paginam, quam in nuntio tuo supra posito commemoras; sed excepto titulo ibi in verborum litteris Cyrillicis scriptorum multitudine nihil Latinitatis inveni - neque intellego, quo modo per eam lingua Latina pro "Board Language" (?) exhiberi possit. Forum nostrum nonnisi Latine scribentibus destinatum est. Vale!


_________________

Iulia Demetrio et Erico sal.

Erice, si recte Demetrium intellego, e nobis quaerit, quomodo efficere possit, ut lingua Latina sit lingua fori principalis, sicut est in nostra area colloquiali, id est omnia vel saltem maxima pars eorum, quae nunc Bulgarice ibi conscripta sunt, Latine monstrentur. Qualis quaestio minime areae nostrae aliena esse mihi videtur ...

Ego tamen, care Demetri, rerum ad fora interretialia exstruenda pertinentium admodum imperita non te adiuvare possum. Tamen pro foro tuo, quod incoeptum omni laude dignum habeo, et pro Latinitate valde spero te aliquem inventurum esse, qui maioris usui tibi sit!

Valete!

Ericus Iuliae s.d.p.
Nescio, quo consilio illa area a Bulgaris condita sit. Classicis quidem linguis, praecipue Latinitati, videtur dedicata esse, sed fortasse aliter, ac nostra area, tantummodo, ut in ea problemata ad illas linguas pertinentia scientifice examinarentur, non, ut Latinitas ipsa in ea pro instrumento res communicandi (sive ”Board Language”) adhiberetur. Quo alio modo explicari potest, quod excepto titulo principali omnia in ea Cyrillicis litteris Bulgarice scripta sunt? Quanti denique in Bulgaria viva Latinitas aestimatur? Fortasse Latinistae Bulgarici vulgo censent non esse operae pretium aream nostrae similem condere, quod Latine colloquendi studiosi ibi nonnisi perpauci reperiantur. Equidem iam diu facere non possum, quin animadvertam Finnicorum quoque Latinistarum longe plurimos a nuntiis in aream nostram mittendis abhorrere; ego, ut prope unica exceptio, regulam confirmo. Apud nos ante omnia favore, quem nuntii Latini septimanales peregre assecuti sunt, effectum est, ut Radiophonia Finnica Generalis redactoribus eorum auctoribus etiam ad colloquiale forum condendum perduceretur. Vereor, ne idem in Bulgaria minus facile exsistat. Vale!

Iulia Erico optimo s.p.d.
Ignoscas, Erice, quod solum nunc tibi rescribo. De condicione Latinitatis in Bulgaria scilicet aeque imperita sum ac tu, at nonne omnia adiuvanda sunt, quae ad Latinitatem propagandam aliquo pacto prodesse possunt? De ceteris, quae ibi scripta sunt, cum non intellegam, neque aliquid conicere neque ullo pacto iudicare volo - ea solus Demetrius nobis explicare potest. Temporibus autem hodiernis, quibus omnibus praesto est interrete, nullo dubio plures viae exstant, ut homines ad usum vivum Latinitatis adducantur quam ante, cum quibus cordi est facile invenire possint, qui eis Latine scribentibus loquentibusve respondeant. Credo me non solam imprimis per interrete Latinitatem vivam colere coepisse et solum postea e regnibus virtualibus in mundum realem descendisse. Cum haec exstet facultas, ut sine magistro certo in mundo reali homines ad Latine scribendum adduci possint, talia proposita promovenda mihi esse videntur.
De ceteris, ut verum dicam, nihil dicere audeo quin Demetrius amplius de finibus suis nos certiores fecerit.

Quod scripsisti te solum e Latinistis Finnicis hic scribere, credo id plerisque in terris simile se habere. At animadvertisti unum quinque millionum Finnorum hic saepius nuntios mittere, ex octoginta millionum Germanorum autem duos, quorum altera ne vera Latinista quidem est? Vale!

Ericus Iuliae optimae s.p.d.
Sine dubio recte iudicas omnibus propositis ad vivam Latinitatem propagandam tendentibus faveri oportere; sed cum res hodiernas Bulgariae et Latinistas Bulgaricos parum noverimus, nobis peregrinis difficile est diiudicare, unde optime exordiamur. Sicut scripsisti, id ”solus Demetrius nobis explicare potest”. Ei facilius est quam nobis in patria sua homines invenire, qui efficaciter ”ad usum vivum Latinitatis adducantur” atque alios, qui ”eis Latine scribentibus loquentibusve respondeant”. Initio e.g. nostra area illis praebeat campum experiendi; deinde, si satis magnus numerus illi rei studentium collectus sit, universi coniunctis viribus eos adeant, qui in Radiophonia Bulgarica summam tenent imperium, iisque persuadere conentur, ut propria ibi area colloquiorum Latinorum condatur. Dubito tamen, an tale conamen in terra per tot annos dominationem communisticam perpessa (ultimo demum decennio saeculi praeteriti Bulgari ea liberati sunt!) difficilius successum assequi possit quam in aliqua terra occidentali. Utinam falsus sim vates!
Inter eos, qui in futuro conventu Neapolitano PHILIAs orationes facient, quandam personam novi e Bulgaria oriundam, multos quidem iam annos in America linguas classicas docentem; fortasse eam de his rebus consulere poterimus.
Quod ad duos Germanos in hac area frequentius scribentes attinet, alteram eorum mea quidem sententia haudquaquam iure negas veram Latinistam esse. Vale!

Iulia Erico optimo s.p.d.
Nescio quidem, Erice, quid hic disputemus: Demetrius de problemate technico nos consulavit, et nescio quidem, quid obstet, quin, si quis sciat, ei dicat; nos autem de condicionibus Latinitatis in Bulgaria et quomodo optime adiuvanda sit disserimus, de quibus optime ipse Demetrius vel Latinista illa Bulgaro-Americana tibi scilicet bene nota certiores nos facere poterunt. Nonne rem aliquantulum inflamus? Ceterum omnibus, quae scripsisti, adsentior. Vale!