by Ericus Palmén on Sat 14 Oct, 2006 19.31
Ericus Palmén Aelio s.p.d.
Haud iniuria censes non satis paginarum interretialium liberis destinatarum praesto esse, ac bene egisti, quod initium faciens paginam creavisti, quam hac area utentes facile comperire possunt.
Simul petis, ut ea aspecta de erroribus, si qui ibi sunt, te certorem faciamus.
Equidem summatim primas picturas textusque sub iis scriptos perlegi et quaedam corrigenda repperi, de quibus mox fusius referam; magni enim interest emendatam Latinitatem liberos iam inde ab initio doceri. Itaque velim etiam huius thematis titulum nonnihil retractari. His diebus administratores Radiophoniae Finnicae Generalis utique ob alias quasdam res electrogrammate adibo, simulque ab iis petam, ut titulum LATINA PRO LIBEROS (!) e.g. in formam LIBELLI LATINI LIBERIS DESTINATI mutent.
Haec hactenus: ad cetera corrigenda supra dicta propediem redibo. Cura, ut valeas!
Ericus Palmén