Tiberis sodalibus suis, imprimis autem Marco et Herimanno s.d.
Quamvis nimirum fieri possit, ut ea verba, de quo agitur, sic intellegantur, ut tu, mi Herimanne, dixisti, tamen equidem talem conversionem probabilem esse non puto.
nam dubium non videtur esse, quin appellatione "armorum" bella ipsa aut eventa militaria significentur, cum "leges" ad res civiles pertineant (cf.illud Ciceronis "cedant arma togae ,concedat laurea laudi"), quin etiam "armis" prorsum sint oppositae. vide, quaeso, et alias eius generis antitheses, veluti "domi militiaeque", "domi forisque" et al.
ex quo evenit, ut "domus " et "arma" , sicut mea fert opinio, prorsus inter se repugnent. nam quomodo "domum armorum" vel "domum belli" intellegere possimus?
deinde, cum hoc carmen ab initio legimus, Italiam identidem "terram" vel "tellurem" appellari videmus(ceterum auctorem vocativo usum esse me non ignorare scito ) :
tellus sanctissima v.1,tellus tuta,t.metuenda v.2,t. generosior v.3,terra formosior v.4, (terra) cincta mari , t.splendida v.5
non igitur est causa, cur intellegamus "veneranda" non ad "terram" pertinere.
nam quid de "opulenta" ? num id ad "domus" referamus? quod quidem non modo sensu careret, sed etiam concinnitate.
"sacrarum" ad "leges" an ad "Pierides" pertineat, diiudicari non potest,quamquam probabilius mihi videtur esse, si id ad leges referamus.
valete.
XIII.Kal.Aug.