M. Favonius sodalibus sal.
Casu in opusculum incidi Secundi philosophi Atheniensis. Constat ex undeviginti sententiis sive gnomis Graece compositis, quarum structura ex hoc apparet exemplo:
„1. Quid est Mundus?
Incomprehensibilis complexio, aspectabile aedificium, altitudo oculis inaccessa, ex se natum spectaculum, multiformis figuratio, aeternus tenor, almus aether, multipartitus spiritus, circuitus erroris expers, sol, lumen, dies, luna, sidera, tenebrae, nox, terra, ignis, aqua, aer.“
Ecce - ordine conservato - ceterae quaestiones: Quid est Oceanus, Deus, Dies, Sol, Luna, Homo, Mulier, Divitiae, Paupertas, Amicus, Senectus, Somnus, Pulchritudo, Terra, Agricola, Navigium, Nauta, Mors?
Quo ex numero quaestio sive sententia octava sane monstruosa videtur esse et inverecunda. Legite modo, quid impudenter scriptum sit de muliere:
„8. Quid est Mulier?
Viri desiderium, bellua conviva, leaena lecti consors, dracaena custodita, vipera vestita, pugna voluntaria, bellum sumptuosum, damnum quotidianum, hominum procreandorum adiumentum, animal malitiosum, malum necessarium.“
Qua sententia mente animoque considerata nemo erit, quin intellegat etiam philosophos interdum desipere
.
Valete. IV Kal. Feb. Crefeldiæ.