de re publica

Colloquia de aliis thematis

Moderators: Moderator, Redactio Interretialis

de re publica

Emitteby Phlebas on Mart 30 Mart, 2010 0.42

Phlebas sodalibus salutem

Post saevissimam contentionem inter partes, heri et hodie Italos suffragium ineunt. Numerus suffragantium valde deminutus apparet, immo non inmerito: una pars leges ad personam iubet, altera, ut consensum obitneat, sine ullo consilio, solum odium in partem adversam suscitare scit. Et in perprofunda crisi oeconomiae civitas iacet.

Una pars, iudicibus adiuvantibus, colloquia intercepta publicat, altera instrumenta communicationis detinet et suam propriam "veritatem" imponere conatur; vocibus dissidentibus ut taceant iubet. Sed non tacent.

De meretricibus, lenonibus, spadonibus; de adulteriis, corrupteliis, mercimonis publice disputant. De re publica minime, de oeconomia solum ut falsi numeris errores adversae partis demonstrent. Et duo deces centena milia Italorum sine muneribus agunt.

Tres urgentias habemus, id est: ratio annuorum, efficientia publicae administrationis et pondus fiscalis, sed nemo solutiones evidentes, quamvis inpopulares, proponere audet.

Rei publicae oblitus, in suburbano meo otiose diem Solis transcurro. Senecam nostrum distracte percurrens invenio:

Denique in illa rei publicae trepidatione, cum illinc Caesar esset decem legionibus pugnacissimis subnixus, totis exterarum gentium praesidiis, hinc Cn. Pompeius, satis unus adversus omnia, cum alii ad Caesarem inclinarent, alii ad Pompeium, solus Cato fecit aliquas et rei publicae partes. Si animo conplecti volueris illius imaginem temporis, videbis illinc plebem et omnem erectum ad res novas vulgum, hinc optumates et equestrem ordinem, quidquid erat in civitate sancti et electi, duos in medio relictos, rempublicam et Catonem. Miraberis, inquam, cum animadverteris
Atriden Priamumque et saevom ambobus Achillen;
utrumque enim inprobat, utrumque exarmat. Hanc fert de utroque sententiam: ait se, si Caesar vicerit, moriturum, si Pompeius, exulaturum.

Ubi es, Cato noster, ubi animum virtutemque tuam invenire possumus ut unus vocem suam extollat, non in Caesarem aut in Pompeium, non pro Caesare aut pro Pompeio, sed pro re publica?

Valete quam optume
Nomino numeros; quibus numeramus; et adsunt in memoria mea non imagines eorum, sed ipsi.
Phlebas
 
Nuntii: 123
Nomen dedit: Iov 29 Dec, 2005 15.42

Re: de re publica

Emitteby Rhumak on Ven 02 Apr, 2010 14.54

Phlebae, lecturis rescripturisque spd

Sic se habebat Italia semper pridie dictaturae, Caesaris, si vis, Mussolinii, si vis, Nicholai Rientii, si vis quoque: semper est respublica nostra cuiusque libet nationis acre impendium virium publicarum in unius paucorumve commodum conlatum: tributa impendiaque publica pro bono communi impensa populum grandiunt: ut egomet puto, si finxeris populum rete laneum, impendia tributaque calculos, quo melius distributos in rete calculos congesseris, ut quodque nodum idem pondus ferat, eo diutius rete resistet: sin non pro bono communi, sed unius paucorumve, calculorum pondus in unum paucave noda retis cadit, ceteris nodis commode est nullumque onus suscipiunt, ecce fit ut citius violentiusque rete findatur secumque etiam commoda noda ducit praecipitata deorsum. Sed cum semel onus iniquum fit, rete quod prius rectum erat, ita ut, si de latere aspiceres, linea magis quam rete videretur, ecce paullulum inclinat: cum semel inclinat, calculi olim bene distributi ad medium delabi incipiunt; cum autem semel delabi coeperunt, rete usque magis inclinat eoque citius calculi in media noda decurrunt, usque dum in medium congesti rete dirumpant: sic rete ex linea recta, idest democratia quam Graeci vocant, fit angulus obtusus, idest oligarchia vel monarchia, ex obtuso fit acutus, idest dictatura vel tyrannis: posthaec denique omne rete idest omnis respublica desperate frangitur nec nisi bello civili multisque certe vulneribus annisque delapsis iterum coniungi retexique potest.
Nunc rete italicum in angulo obtuso est.

Vale
Πατρίους παραδοχὰς ἅς θ' ὁμήλικας χρόνῳ κεκτήμεθα, οὐδεὶς αὐτὰ καταβαλεῖ λόγος οὐδ' εἰ δι' ἄκρων τὸ σοφὸν ηὕρηται φρενῶν.
Quae tradita patribus coaeva temporis accepimus, ea nulla ratio destruet neque alta mens si repperit scientiam.
(Eur., Bacch., 201-3)
Rhumak
 
Nuntii: 691
Nomen dedit: Lun 12 Iun, 2006 13.49
Location: Latium

Re: de re publica

Emitteby Marcus Favonius Ursinus on Sat 03 Apr, 2010 11.04

Marcus Phlebae Rhumakique sal. pl. d.
Litteris vestris tam tristis rei publicae Italicae status exponitur, ut omnes quoque peregrini, qui Italiae se amicos confitentur, non mediocriter perturbentur, idque eo magis, quo diligentius recordantur, quid Plinius scripserit (nat. 37, 201):
    … in toto orbe, quacumque caeli convexitas vergit, pulcherrima omnium est iis rebus, quae merito principatum naturae optinent, Italia, rectrix parensque mundi altera, viris feminis, ducibus militibus, servitiis, artium praestantia, ingeniorum claritatibus, iam situ ac salubritate caeli atque temperie, accessu cunctarum gentium facili, portuosis litoribus, benigno ventorum adflatu. …
Quae verba amplissima nonne iis semper ante oculos versari debent, qui rem publicam gubernant vestram?
Laetissimos vobis precor dies festos.
:D
Marcus Favonius Ursinus
 
Nuntii: 465
Nomen dedit: Sat 08 Iul, 2006 11.28
Location: Germania Inferior

Re: de re publica

Emitteby Rhumak on Sol 04 Apr, 2010 12.57

Marco spd

Certe haec vel similia verba ante rectorum nostrorum oculos versari videntur: et omni vi sua gestiunt, ut illa eradant! hostis suos Italia non extra, sed intus habet tamquam cancrorum tumidissimum, amicos tenacissime pellens.

Quam optimum tibi, suavissime rerum, Pascha precor.
Πατρίους παραδοχὰς ἅς θ' ὁμήλικας χρόνῳ κεκτήμεθα, οὐδεὶς αὐτὰ καταβαλεῖ λόγος οὐδ' εἰ δι' ἄκρων τὸ σοφὸν ηὕρηται φρενῶν.
Quae tradita patribus coaeva temporis accepimus, ea nulla ratio destruet neque alta mens si repperit scientiam.
(Eur., Bacch., 201-3)
Rhumak
 
Nuntii: 691
Nomen dedit: Lun 12 Iun, 2006 13.49
Location: Latium


Return to Alia themata

Qui adsunt

Users browsing this forum: No registered users and 1 guest

cron