Convenere simul pueri non dispare forma
Nyctilus et Lycidas parili perculsus uterque
Corda furore, pares modulari carmina plectro.
Hos etenim Micon totis discurrere silvis
Cogebat, pueros inter pulcherrimus omnes
Ast crudele micans rabidaque ferocior ursa.
Sic modo quae placuit fagus vitatur ab illo
Condictasque fugit platanos optataque linquit
Antra neque assuetos pueris remeavit ad ulmos.
Tandem defessi quos ignis adederat idem
Dulcibus acceptum vulnus luxere querellis
Inque vicem proprios maesti solantur amores.
N.
Invidiose puer, rabidaque ferocior ursa
Quid quae nuper ego modulabar carmina vitas?
Fit leve quod patimur leve fit quod uterque dolemus
L.
Me, me respicias puer o crudelis Amyntas
Haud semper formosus eris: cito labitur aetas.
Fit leve quod patimur leve fit quod uterque dolemus
N.
Quid me spernis, Amor? venerem sensere puellae
Et sensere viri, solus tamen ipse relinquor.
Fit leve quod patimur leve fit quod uterque dolemus
L
Huc, formose veni: gelidum vocat aestus in antrum.
Iam pecudes nemoris fessae subiere latebras.
Fit leve quod patimur leve fit quod uterque dolemus
N.
Ne niveum, nimis o puer improbe perde colorem
Sole sub hoc; platani mecum requiesce sub umbra.
Fit leve quod patimur leve fit quod uterque dolemus
L.
Qui tulerit pueri fastus feret ille pruinas
Sithonias, aestus Lybiae neque laeserit ipsum.
Fit leve quod patimur leve fit quod uterque dolemus
N.
Quid prodest carmen miscere nocentibus herbis?
Ecce magis, meus est meus est formosus Amyntas.
Fit leve quod patimur leve fit quod uterque dolemus
L
Seu quo Luna tumet seu quo disrumpitur anguis
Cantavi, solus tamen ignibus uror eisdem.
Fit leve quod patimur leve fit quod uterque dolemus