YLE Colloquia Latina

Iulia sodalibus aestimatissimis s.p.d.
Versiones nonnullorum operum recentiorum, imprimis autem poematum Germanicorum, in sermonem Latinum hic inveniri possunt:
http://www.pantoia.de/index.html
Valete.

Marcus Iuliae ceterisque amicis pariter omnibus sal.
Gratias ago tibi, mea optima Iulia, pro inscriptione interretiali Pantoia. Hoc vero mihi liceat addere:
Goethe cum anno MDCCCXXIII poema „Hermann und Dorothea“ (id est „Arminius et Theodora“) a B. J. Fischer Latine redditum inspexisset, ut alia omittam, haec fere scripsit: carmen, quo maxime ipse delectaretur, e Theodisco in Latinum conversum iam lingua multo humaniore apparere (cf. Goethe, Editio Hamburgensis, vol. II, ed. VII., Hamburgi MCMLXV, p. 678). Quid plura?
Valete. V Non. Mart. Crefeldiae.

Iulia Marco ceterisque omnibus s.p.d.
Gratias, carissime mi Marce, pro hac tua adnotatione. Memineram Goethen aliquam versionem Latinam illius sui operis laudasse, sed cum viderem haud paucas exstare, dubitare cuepi, quaenam esset.
Ceterum valde delector et alia poemata perscrutere variasque versiones inspicere, sive rhythmo servato versae sive metro cuidam antiquo adaptae sint. Swoboda ille carmina Schilleriana rhythmice vertit, ibi e.g. in carmine ad Laetitiam textus Latinus invenitur cum textu originali Germanico congruens, qui cum musica Beethoveniana, quae post "hymnus Europae" facta est, bene cani possit. Etiam de Campana praeclarissimum carmen impetum, quem e rhythmo sumit, non amittit versione metrica.
Valete.