Itineraria

Colloquia de aliis thematis

Moderators: Moderator, Redactio Interretialis

Itineraria minima – Ex Gallia Romam petens

Emitteby Phlebas on Merc 27 Iun, 2007 23.01

Phlebas sodalibus salutem

Aeronave relicta, tramine (hamaxosticho, traeno?) iter facio, ex Mediolano Romam petens: opportunitatem habeo ut varietates regionum Italiae nostrae pigre contempler.

Mediolano relicto, venusta aedificia abbatiae mediaevalis Viboldonis invenies, inter virides arbores camposque rubri lateres emicant.

Tramen rapide percurrit planitiam Padi, Padana italice dictam, ubi agri, populi (…populiferque Padus) et rarae villae partim dirutae: praesens agricultura deminutionem numeri agricolum imperat, et pristina aedificia, hospitio innumerorum colonum apta, inutilia iacent.

Rivi et fossae planitiem percurrunt, abundantia aquarum explicat ubertatem humi.

Inopinate, post parvum lucum populorum, domus, more Franco XIX seculi extructa, curiositatem meam destat et repente recedit. Stationes velocissime transimus et celeritas nomina legere impedit. Apennini longe apparent; candidae primae nubes caelum spumant.

Placentiam tangimus et Padum transimus, hodierna aedificia sequuntur vetera opificia. Deinde agri virentes et rarae villae, Parmam tangimus et Bononiam inimus, ubi tramen stationem habet.

Post Bononiam natura locorum mutat: ardui colles in vicem agrorum succedunt, et nemora et rarae vinae. Iam nigri primi cupressi ex humilioribus nemoribus eminent; tempestas mutat et humiles nimbi iuga montium abscondunt. Antiqui pagi in latere collium stant.

Progressus tramini asperitatem collium mitigat, numerus cupressorum augescit et agros vinae et oleta succedunt; venustae villae in summo collium dulcia convallia spectant.

Deinde sequuntur planitia et montes, Soractem longe prospicio (aut prospicere fingo).

Repentine pini deinde innumera aedificia: Romam contingimus et altae cupressus polyandrion ostendunt.

Iter finem facit sed curiositas de domu, more Franco extructa in meditullio planitiae Padi, et de historia domus domini, permanet.

Valete quam optume
Nomino numeros; quibus numeramus; et adsunt in memoria mea non imagines eorum, sed ipsi.
Phlebas
 
Nuntii: 123
Nomen dedit: Iov 29 Dec, 2005 15.42

Itineraria minima, sera romana

Emitteby Phlebas on Mart 03 Iul, 2007 0.37

Phlebas sodalibus salutem

Longo die itinereque confectis, domum advenio. Solus et sine cena. Ad cauponam sub domo positam accedo: aer clarus et tepidus ad lentam cenam aestivam (quamvis solitariam) invitat.

Humanitatem adtente otioseque aspicio et invenio matrem filiamque hilariter cenantes, puella stilo deversores delineat et mater iocose, familiarissime, particeps subridens, persollas petit.

Sacerdos cum tyronibus de operibus actis et acturis affabiliter colloquitur, et sapida obsonia parce degustat atrumque vinum.

Cauponae ministrator mecum discurrit, continue iocans, deos gratias: solum solatium solitudinis.

Viatores Anglice et Germanice loquuntur; officiales de actis hodiernis, vere pacate, disputant.

In vicem lucis tenebrae succedunt et memoria diei acti repente evanescit.

Valete quam optume et infidi temporis lubricam possessionem cavete
Nomino numeros; quibus numeramus; et adsunt in memoria mea non imagines eorum, sed ipsi.
Phlebas
 
Nuntii: 123
Nomen dedit: Iov 29 Dec, 2005 15.42

Conventus Neapolitanus ad humanismum pertinens

Emitteby Ericus Palmén on Sat 28 Iul, 2007 19.34

Ericus Palmén omnibus sodalibus s.d.p.
Septimanae proxime praeteritae maximam partem (16.–21.7.) necnon biduum praecedens (14.–15.7.) Neapoli transegi. Causa principalis, quae me impulerat, ut his ipsis diebus fervidissimis medii mensis Iulii eo volarem, fuit conventus internationalis ad humanismum pertinens, cui, quantum potui, interesse studui.
Itinere meo admodum contentus sum. Conventus bene institutus exstitit. Quidnam habuerit propositi, dilucidissime e libello programmatis omnibus participibus distributo apparet, praesertim e praefatione, in qua moderatores conventus inter alia scribunt se eum instruentes illud sibi proposuisse, ut, quam vitalis etiam nostra aetate esset humanitatis ac bonarum litterarum vis, clare appareret: eam plurimum valere “ad iuvenum animos informandos, ad regendam administrandamque rempublicam, ad naturales quaestiones ratione quadam tractandas et via, denique ad humanum genus humanius faciendumâ€
Ericus Palmén
Ericus Palmén
 
Nuntii: 273
Nomen dedit: Lun 01 Mart, 2004 14.32
Location: Media Finnia

Emitteby noricus on Lun 30 Iul, 2007 10.35

..
Last edited by noricus on Sat 18 Aug, 2007 13.17, edited 1 time in total.
noricus
 
Nuntii: 181
Nomen dedit: Iov 12 Ian, 2006 18.19

Conventus Neapolitanus ad humanismum pertinens

Emitteby Ericus Palmén on Iov 02 Aug, 2007 22.40

Ericus Noricum activissime vivae Latinitati faventem salutat.
In nuntio tuo supra posito ad conventum internationalem Neapolitanum pertinente quaesivisti a me, utrum “Latine dixissent oratores necnon vel semper et cuncti an pauci et raro, deinde utrum disputationes factae essent aliqua de re an solummodo orationes silentibus audientibus praebitaeâ€
Last edited by Ericus Palmén on Ven 03 Aug, 2007 22.47, edited 1 time in total.
Ericus Palmén
Ericus Palmén
 
Nuntii: 273
Nomen dedit: Lun 01 Mart, 2004 14.32
Location: Media Finnia

Emitteby Marcus Favonius Ursinus on Ven 03 Aug, 2007 10.03

Marcus Erico amico illustrissimo doctissimoque salutem dicit plurimam.
Binis tuis litteris ponderosis perlectis conventui illi Neapolitano me non interfuisse doleo; sed quibusdam de causis hoc anno prohibeor, ne peregriner. – Imprimis mea interest legere, quid Valahfridus Stroh „de origine vocum ‘humanitatis’ et ‘humanismi’ disseru(erit)“. Quid mirum, si me quoque spes tenet fore, ut acta conventus in medium proferantur? Optime vale. III Non. Sext. Crefeldiæ.
Marcus Favonius Ursinus
 
Nuntii: 465
Nomen dedit: Sat 08 Iul, 2006 11.28
Location: Germania Inferior

Emitteby noricus on Ven 03 Aug, 2007 12.39

..
Last edited by noricus on Sat 18 Aug, 2007 13.17, edited 3 times in total.
noricus
 
Nuntii: 181
Nomen dedit: Iov 12 Ian, 2006 18.19

Emitteby Iulia on Ven 03 Aug, 2007 23.36

Iulia omnibus sodalibus, imprimis Erico Rhumaki Jarcio Conventus Neapolitani participibus necnon Norico Marcoque de eodem conventu curiosissimis s.p.d.

Par est, ut etiam ego, ut quae Neapoli fuerim, verba aliquae faciam de conventu de Humanitate, quamquam Erici optimi nostri verbis vix habeo, quae addam.

Quod scripsisti de linguis adhibitis, Erice, certe omnia vera sunt; addam me uni acroasi interfuisse, cui tu non interfuisti, quae Italice habita est, ita ut ob conversionem duplex tempus consumeret, ceterum una, quae licet maxima ex parte Latine habita sit, tamen longissimis citationibus Italicis abundabat, ita ut solum a linguam Italicam bene callentibus bene intellegi potuisset. Citationes eius orationes etiam in scheda disributae sunt, quae post acroasin diligenter legendo vix intellexi, audiendo ergo etiam, si non post aliquas minutas audire desiissem, nullo pacto intellexissem. Accedunt ad haec aliquae orationes in inauguratione, sicut Ericus recte dixit, et, si in quo loco alienis ducibus usi sumus, illorum explicationes convertae sunt.
Quod attinet ad acroases, scio nonnullos relatores lectiones suas alia quadam lingua exaratas convertendas misisse, et erant, qui Latine disseruerint, sed nonnisi lingua quadam vernacula ad quaestiones respondere voluissent. Quo certe fit, ut nimis celeriter delegant orationem neque libere orent, quod mihi quidem, si pronuntiatione Italica fit, difficilius est intellectu, tamen male orantes in quovis conventu invenies, et boni ac clari Latinistae dilucidissime et non e notis haerentes locuti sunt.
Haec autem omnia, quamquam nunc late a me explanata, tamen vix quid mali habuerunt quantum attinet ad conventus decursum. Quod autem eiusdem, immo maioris momenti habeo, est, quod participes omnium gentium Latine inter se locuti sunt. Certe, vitari non potest, quin etiam greges regionales formentur, et aderant etiam, qui vix Latine intellegerent, tamen lingua Latina longe omnibus aliis linguis praevalebat, imprimis, cum homines diversae linguae concurrerunt, non Anglica, sed Latina lingua usi sunt.

Quod attinet ad acta, Marce et Erice, constat collectum atque divulgatum iri; testem huius rei affero ipsum Aloisium Miraglia, qui ultimo die lectionem suam ob nimiam moram (sicut semper!) omittens dixit nos, quae disserturus erat, in actis lecturos esse.

Quod maximi momenti toti proposito de humanitate atque Latinitate viva habeo, dimidia circiter pars participum erant iuvenes, qui aetatem triginta annorum adhuc non transgressi sunt. Optimum et validissimum testimonium diputationes de talibus rebus adhuc animos incendere, fundamenta humanitatis adhuc vivere.

Curate omnes, ut quam optime valeatis et bene dormiatis!
Gottingae, a. d. III. Non. Aug.
Quaecumque a proavis tibi sunt commissa benignis,
compara ut illa tibi propria possideas!

- mathesis localiter trivialis -
Iulia
 
Nuntii: 569
Nomen dedit: Lun 15 Mart, 2004 18.08
Location: Saxonia Inferior

Barbarorum in humanismum impetus

Emitteby Ericus Palmén on Sol 05 Aug, 2007 22.52

Ericus Palmén Marco Favonio Ursino et Iuliae et Norico necnon ceteris humanitatis studiosis s.d.p.
Verum est, quod Noricus scripsit, conventum Neapolitanum 15.- 22.7.2007 celebratum ostendisse etiam hodie restare multos homines, qui Latinitatem non sint deserturi. Ut vero eloquentia antiqua ab interitu servetur, vehementer nobis videtur pugnandum fore.
Nuper enim omnes participes dicti conventus a moderatoribus eius electrogramma acceperunt, in quo de impetu in eos a quibusdam obtrectatoribus humanismi facto refertur. Obtrectatorum illorum potissimi, ne nomina odiosa eorum taceam, sunt Galli della Loggia et Iohannes Berlinguer; quorum ille quaerere dignatur, quid nostra aetate iam iuvet de humanitate disserere, cum physicae naturalesque doctrinae praevaleant, hic autem, quondam in Italia Administri Publicae Institutioni provehendae munere functus, in Actis diurnis ‘Il Manifesto’ inscriptis suadet, ut exturbatis classicis, qui dicuntur, scriptoribus tandem aliquando discipulis novae artes mechanicae tradantur, quibus possint suum ingenium excolere secundum eam indolem, quae huius saeculi propria videtur. Praecipue Instituto Italico Philosophiae Studiis provehendis praesidique eius G.Marottae crimini tribuitur, quod conventui instituendo faventes publicam pecuniam inepte per fenestram abiecerint: «perch
Ericus Palmén
Ericus Palmén
 
Nuntii: 273
Nomen dedit: Lun 01 Mart, 2004 14.32
Location: Media Finnia

Emitteby Iulia on Mart 07 Aug, 2007 23.50

Iulia Erico, Marco, Norico ceterisque omnibus s.p.d.

Imprimis gratias tibi, optime Erice, ago, quod verba ista in ephemeride de conventu publicata palam fecisti. Profecto Aloisius iam ultimo conventus die articulum istud in nos odiosum - in Latinum scilicet conversum - nobis recitavit et omnia ea, quae in adhortatione nunc divulgata consripta sunt, praecepit nos hortans atque admonens, ut vocem nostram tolleremus; ipse dixit se symbolon scripturum esse, cui omnium conventus participum nomina adiuncturus esset, nisi quis obiceret.


Ceterum, cum adhuc solum de ipso conventu verba facta sint, narrabo, quae diebus insequentibus egerim: Contra enim ac Ericus, qui ante tempus profectus est, ego usque ad ante diem VI. Kalendas Augustas (die Veneris) in mirabili illa urbe permansi.
Excursiones post conventum una cum amicis duas feci (unam etiam ante conventum), primam Herculaneum, alteram in Campos Phlegraios. Iter Herculanense magnificum erat, ore aperto amici explicationes auscultando nesciebam, quo primum oculos verterem, et si potuissem, statim omnes domus simul occuparem nesciens, quam ceteris praeferrem, quamquam fortasse villa illa ad mare (olim) sita paullulo ceteris melior esset... Una etiam nonnulla de villa Papyrorum, quae dicitur, ad finem exfossata somniavimus et quae ibi adhuc inveniri possint. Bis de iis somniavimus: Herculanei et in museo archaeologico, quod una iterum petivimus, cum spatium temporis intra conventum ei reservatum parum visum sit. In museo optima est pars, in qua inventa villae Papyrorum exhibiti sunt, imprimis saltatices et athletae artificissime effecti; ceterum nonnulla Pompeiana ibi collecta sunt necnon praeclarae quaedam statuae Graecae, ut Doryphoros, Hercules Farnese, qui dicitur, tyrannorum necatores, Venus Capuana, ... sed aberro.
Herculaneum, quod attinet ad aream accessibilem, longe Pompeis minor est, imprimis quod supra oppidum recentius eiusdem nominis exstructum est, cuius incolae certe exagi nolunt... Eodem autem modo area archaeologica domibus liberata est: Regibus enim Bourbonicis licuit homines vi expellere. Domuum multorum secundum tabulatum exstat, etiam lignea elementa nonnulla inveniri possunt - lignum quidem antiquum! Est etiam lignum ex parte antiquum, ut ita dicam, nam in unius domus horto semina pirorum, quae in vasibus quibusdam condita invenerunt, iterum seminaverunt et nunc ibi arbores sunt eiusdem generis atque abhinc duo milia annorum! Pompeis etiam maiora fecerunt: Ibi vites seminaverunt et e bacis vinum confecerunt - vinum vere Romanum!!!
Certe etiam libentissime dominum Calpurnium Pisonem Caesoninum sua in villa visitarem, quod autem fieri on potest, cum aedes sub terra adhuc iaceat... In universum dicens iudicarem Herculaneum hoc itinere longe magis mihi placuisse quam Pompei, imprimis autem hanc ob rem, quod Pompeios grege trecentorum hominum visitavimus, Herculanei autem tres fuimus.

Neque minus admirabiles iudicarem esse varia, quae in Campis Phlegrais videri possunt: Mirum naturae spectaculum praebet vulcanus, cuius nomen Solfatara, in cuius imo cratere licet ambulare. Aer sulfuris odore completus est, humus calidus et saepe mollis, nonnullis locis continuo vapores calidi sulfurati exfunduntur, quorum rumor etiam audiri potest. Aliae partes saepibus prohibitae sunt, ne quis in limo fervido mergatur. Mirus sane locus! Tamen sunt, quae in summo crateris margine domus suas extruxerint, nescio qua temeritate capti, nam si paululum solum moveatur vulcanus, domus illae statim evanescent - una quidem cum incolis!
Omnino aliud certe antrum Sibyllae - et hic gratias bibliopoliis Neapolitanis, ubi pridie Aeneidem emi, ita ut sextum librum relegendi mihi esset facultas ante quam profecti sumus! "Excisum Euboicae latus ingens rupis in antrum, / quo lati ducunt aditus centum, ostia centum, / unde ruunt totidem uoces, responsa Sibyllae." (Verg. Aen. VI. 42-44) Ibi multis locis versus Vergiliani (Latine tantum!) exhibuntur, quae ad ipsa loca pertinent, et credere posis Vergilium heri ibi fuisse, ut eam carminis sui partem conscriberet. Ante oculos profecto habes Troianos ante antrum exspectantes, Aenean ipsum paucis sodalibus in interiora penetrantem, ubi Sibylla miris vestibus indutis in adyto fumis animum obumrantibus completo eum exspectat. Etiam columbae, quorum in Aeneide (VI 190; ibi Miseni, sed tamen) mentio fit, adhuc adsunt!
Supra antrum dua templa, alterum Graecum Apollinis, alterum Romanum Iovis, quod postea ecclesia christiana facta est; utriusque "solum" fundamenta et partes inferiores adhuc exstant, tamen sufficit, ut plus minusve mente fingi possit, qualem fortasse olim praebuerint speciem. Est Cumis etiam magna adhuc area, sub qua creditur urbem ipsam latere - curiosa sum, quae ad lucem proveniant!
Baiarum magnae partes sub aqua nunc sunt ob phaenomena vulcanica, quibus ea regio scilicet abundat; non videri non potest tamen magnum Veneris templum - cui alii deo ibi templum aedificare oportet? Ceterum Bais sunt villae optimi cuiusque Romani.
Misenum ex loco superiore vidimus, et amicus monstrare mihi potuit, unde Plinius maior profectus sit, ut Vesuvium peteret. Est ibi lacus tunc temporis artificialiter factus, in quo naves repararentur. Aspectus ibi pulcherrimus est, omnia mare aut terra aut paeninsulae aut lacus - pulchrio paene quam ipse sinus Neapolitanus, quo pulchrius amoeniusque nihil in mentem mihi venit!

In summa optimum atque iucundissimum Neapoli egi tempus. Sunt quidem, qui dicant Neapolim esse paradisum a diabolis incultum: Ut verum dicam, ne unum quidem diabolum ibi inveni, solum optimos amabilesque homines! Gratias imprimis amicis - verius ante iter amicis, nunc vero amicissimis -, qui non solum ad mirifica ea loca me duxerunt, sed etiam reliquum temporis mecum agere voluerunt et quibuscum iucundissimum tempus egi. Urbs per se sat placet, imprimis cum adiungantur adamatus meus sinus Neapolitanus una cum Vesuvio necnon loca circumiacentia, quorum nomina nusquam non nota sunt: quanto iucundius cum amicis, et si ipsi amici simul ducis munere funguntur, ut meliores peritiores duces fingi vix possint, melius equidem cogitare non possum. Iam meditor, quando proximum illuc me conferam!


Valete omnes!

Gottingae, a. d. VII. Id. Aug.
Quaecumque a proavis tibi sunt commissa benignis,
compara ut illa tibi propria possideas!

- mathesis localiter trivialis -
Iulia
 
Nuntii: 569
Nomen dedit: Lun 15 Mart, 2004 18.08
Location: Saxonia Inferior

Emitteby Marcus Favonius Ursinus on Sat 11 Aug, 2007 22.01

Marcus Ericum amicissime salutat.
Maximas gratias tibi ago, quod tam diligenter mihi tamque dilucide explanasti, quid Valahfridus Stroh de voce humanismi edisseruisset. Qui vir clarissimus m. Martio optimum edidit librum, quem tibi notum esse pro certo habeo: inscribitur „Latein ist tot, es lebe Latein. Kleine Geschichte einer großen Sprache“. Quo lecto apparet Valahfridum nostra aetate in numero esse Latinitatis fautorum amplificatorumque fortissimorum. Equidem ad unum omnes mulieres virique doctissimi, qui Neapolim convenerant, praestare puto linguam Latinam minime mortuam esse, immo vero vivere. Qua de causa obtrectatores illi litterarum Latinarum non extimesco: canum similes videntur esse, qui quamvis latrent, non mordent. Nescio an apud vos quoque Finnos in proverbii consuetudinem venerit illud Theodiscum: Hunde, die bellen, beißen nicht (id est: canes latrantes non mordent). Hoc vero caput esse contendo: Suo quemque nostrum loco, quantum potest, Latinitati favere oportet.
Iubeo te optime valere.
Marcus Favonius Ursinus
 
Nuntii: 465
Nomen dedit: Sat 08 Iul, 2006 11.28
Location: Germania Inferior

Ex portu Lunae Cyrnon petens

Emitteby Phlebas on Sat 01 Sep, 2007 17.04

Phlebas sodalibus salutem

Post tres dies cunctationis, propter tempestatem maris Ligustici ( Caurus vehementer spirabat ), pridie calendae Augustus, post meridiem, portum linquimus et brevis cursus nos ducit ad initium navigationis nostrae aestivalis: ad ancoram consistimus in statione sub ora viridi insulae Palmariae, quae ab occidente claudit sinum portus Lunae.

Onerarias, frequenter transeuntes, longe aspicere possumus : portus valde frequentatus est, sed statio nostra recondita stat: nobiscum solum aves; singula naucula piscatoria lente transit.

Ex scopulo albo ( Punta Bianca italice appellato ), qui celat antiquum portum Lunae, Luna rubra, perlucens surgit nautasque exclarat; lente cenamus remotas luces litoris mirantes vinumque persuavem collium Lunae sorbentes.

Lenis aura septentrionalis spirat, astra spectans haec verba inchoo, sed mox sub Iove frigido recumbo: cras longam navigationem inchoabimus.

Calendae Augustus, primo diluculo ancoram tollimus et vela solvimus, Caprariam petentes.

Sinum Lunae linquimus et retro insulam Tino italice appellatam, pharum et Turrem Scholam videre possumus prima sub luce.

Sol oritur ex scopulo albo. Ventus secundus nos trahit, deinde quies (pulso mechanico utendum est) usque ad Urgonem, ubi accessus prohibitus est propter carcerem. Ex alto viridia latera, lucos et vineas inspicere potes, et parvulum pagum. Arx insulam dominat.

Ex longe videmus Caprariam (viginta milia distat) et excellentes montes Cyrni. Medio cursu innumeri delphini carinam praecurrunt et cum prora ludunt: iucundissimum spectaculum.

Portum Caprariae attigimus, sub alta parietem lapideam positum, parvum vicum invenimus valde ferventem propter ferias aestivales.

Primum caupona, deinde quieta nox somniumque nos recipiunt.

Sol inluminat pagum Caprariae, quietas naves portumque linquimus. Praenavigamus litus Caprariae usque ad extremitatem meridionalem insulae, ubi spectaculum naturale mirabile invenimus: promunturium candidum in parietem rubram repente se vertit, mirabili cum intermissione; sub promunturium sinus quietus et aptus ad stationem.

Capraria relicta, cursum occidentalem dirigimus ad scopulum ( Giraglia italice appellatum est ) prospicientem extremitem septentrionalem digiti Cyrni.

Scopulus ille meta est certaminis Giraglia appellati et medium cursum defatigatis nautis indicat. Pharus candidus scopulum dominat.

Circa nos inspicere possumus, praeter scopulum Giraglia et litora Cyrni, Caprariam, Urgonem, Ilvam, solum nebula aut humilitas nos celant Planusiam.

In sinu sub promonturio Agni, Giraglia prospiciente, ancoram ponimus,: vetusta turris sinum despectat. Aqua vitrea, arena candida innumeros pisces ostendunt; cum crustulas panis in aquam iacis famelici, celerrimi accurrunt.

Statione relicta, vela damus ad Eburobriea, in amplissimo sino posita, ubi, post meridiem, ancoram ponimus in statione occidentali, sub turre diruta, ubi antiquae naves refugium habebant.

Valete quam optume
Nomino numeros; quibus numeramus; et adsunt in memoria mea non imagines eorum, sed ipsi.
Phlebas
 
Nuntii: 123
Nomen dedit: Iov 29 Dec, 2005 15.42

Luxuria moresque depravati

Emitteby Iulia on Sol 16 Mart, 2008 16.34

Iulia amicis suis s.p.d.

Heri cum amica Bremam petivi, ut ibi in museo expositionem viderem inscriptam "Luxuria moresque depravati. Vita Romana in sinu Neapolitano". Forsan tu, Marce, iam eam vidisti, nam autumno praeterito in tuis partibus versabatur. Exponata sunt nonnullae picturae parietinae, inter quas trium Gratiarum et nonnullae, in quibus villae luxuriosae hortique vel symposiadepictae sunt, omnes quidem pulcherrimae, ceterum parvum balneum, quod solum cum siphonibus repertum est, statuae quaedam, Noni Balbi Herculanensis filiaeque eius necnon divi nonnulli, etiam cervus e Domo citharoedi, galea gladiatoris cum ocreis et pars statuae pugilis, e qua apparet, quomodo manus muniri solebant, praeterea vasa vitrea, suppellex argentea, etiam tabularum cerearum una et inscriptio illa parietina Sodomae Gomorrhaeque, omnia illustrata cictationibus auctorum antiquorum. Quaedam intererant, quae credebam me iam aud Decembri mense aut iam Iulio Neapoli vidisse, quod mense Decembri quidem fieri non potuit, oportet ergo alia his similia ibi mansisse. Pulchra fuerunt etiam reconstructiones cinematographicae Villae Iovis Capreae, Villae Sancti Marci Stabiarum, Villae Claudii Bais, quae hodie sub aqua est - pro dolor non interfuit Villa Papyrorum. Animadverti autem me, etsi quaedam anno proxime praeterito de iis rebus didicerim, pleraque a Sotere nostro, qui nihil nescit et benigne quaerenti mihi narrat, tamen me nimis imperitam esse et multis de rebus vix quicquam scire.

Postea breviter Bremam perlustravimus, ut municipium imprimis statuamque symphoniacorum Bremensium ecclesiamque videremus.In municipio inscriptum est SPQB AEDIFIC A D nescioquo, at mirabile mihi videtur, quam sibi confidenter scribunt SPQB, id est Senatus PopulusQue Bremensis!

Valete quam optime!
Quaecumque a proavis tibi sunt commissa benignis,
compara ut illa tibi propria possideas!

- mathesis localiter trivialis -
Iulia
 
Nuntii: 569
Nomen dedit: Lun 15 Mart, 2004 18.08
Location: Saxonia Inferior

navigatio

Emitteby Phlebas on Iov 20 Mart, 2008 8.34

Phlebas Iuliae, Marco omnibusque sodalibus salutem.

Post hiemem in Sardinia actam, navem movere ad litora Tusciae oportet.

Hiems in sinu Caralis felicissima fuit, in certamina navalia octiens descendimus, sinum illum ventosum percurrimus et varietatem tempestatium hiemalium exploravimus. Sub nubibus et sub luce solis, in perfrigidis tempestatibus et Favonii vecti, montes circumspicientes spectantes candidos propter nivem et viridissimos propter inceptum veris, sub pluvia et gelu, candidis fluctibus quassati, placido aequore et procelloso, vela dedimus.

Sed altus rursus nos vocat.

Tertia vigilia portum linquimus, pharum insulae Cavoli (Brassicae) italice dictae petentes. Insula illa sicut limen inter Sardiniam meridionalem et litora orientales Sardiniae posita est. Portu licto, aequor quietus nos recepit, sidera inluminant coelum sine nubibus.

Insula Brassicarum superata, proram ad septemptrionem vertimur; ex longe nubes atrae, debiles ventos vectae, meridionem petunt. Prima lux solis varcum invenit sub nubes et inluminat scopula insulae Serpentara (id est insula Aspidum). Lux rosea scopula facit, innumerae aves candidae se levant ad volatum, albam navem piscatoriam insequentes.

Nubes se dissolvunt et lux pulcherrima litora Sardiniae orientalis nos ostendit, viridissimis nemoribus ornata. Navigatio lente procedit, usque ad sinum Orosei vocatum, quem altissimi montes circumdant et asperrimos scopulos, ubi vesper nos salutat et iucundissimo grex delphinorum, qui navem lente praecedunt, quasi cum proram ludentes.

Longa et insomnis post nox et plus quam centum milia navigationis, opus est portum petere. Tenebris inceptis, portum Cala Gonone vocatum intramus, ubi paucissima naves invenimus. Frugaliter sed iucundissime cenamus, de peracta et futura navigatione discurrens, deinde brevis somnus et, prius quam illuceat, portum rursus linquimus.

Sol nos aperit visionem felicissimam: cum meridionem respicies albos scopulos sini Orosei videre potes lente evanescentes in nebulis. Cum oculos circumfers ad occidentem, viridissima nemora invenies in litoribus rubris ex glauco pelago. Cum suspicis, candidas nives inspiciere potes quae excellentes montes Sardiniae interioris tegunt. Ad septentrionem insula Tavolara apparet, qui claudit sinum Olbiae profundissimum, olim portum Phoenicum.

Sino Olbiae relicto, sine mora, cursum nostrum ad Portocervo (Portus Cervi) nos ducit, ubi necesse est navem linquere: munera nos vocant et autocineta et aeronaves et infestos clientes.

Unam post hebdomadam, circiter meridiem, rursus solvimus, litora Tusciae petentes; CXX milia nos separant ab insula dello Sparviero (insula Accpitris) italice dicta, et ab promunturio Punta Ala nominato.

Favonius, ut, incepta navigatione, tibi scripsi, Marce mi, nos vehit in alto, vela plena. Inopinate, quinqe milia ab litora, passer volitat circum navem, defatigatus se ponit in ponte navis et secludit sub velum: bene veniat quintus nauta nobiscum.

Ultima lux delphini lente natantes cursus nostrum intersecant: septentrionem petunt.

Nox luna inter nubes pelagus inluminat, ventus, quamvis meridionalis, frigidus et vementior se facit, velis partim contractis, celeriter cursum prosequimus. Mane sol inter nubes, fluctus ventisque adhuc meridionales nos vehunt ad metam.

Lux incepta passerem nostrum, forsitan propter frigorem noctis, mortuum invenimus.

Radii solis ex nubibus scopulos prospicientes prumunturium Punta Ala inluminant et insulam dello Sparviero. Inter scopulos et insulam cursum dirigimus, ubi albas spumas aquam viridissimam maculant, deinde aquam quietam porti attigimus. In caupona mare spectans prandium habemus, ne lux, ventus et sonus fluctorum nos careant.

Valete

A.d. Idus Mar., Mediolani, post longam navigationem

P.s. Praeterito mane librum pulcherrimum inveni, emi et rapidissime legi: "Vol de nuit", a Antoine de Saint Exup
Nomino numeros; quibus numeramus; et adsunt in memoria mea non imagines eorum, sed ipsi.
Phlebas
 
Nuntii: 123
Nomen dedit: Iov 29 Dec, 2005 15.42

Emitteby Iulia on Iov 20 Mart, 2008 23.26

Iulia Phlebae maximo nautae ceterisque amicis s.p.d.

Phleba, relationes tuas de navigationibus haud mediocri cum voluptate legere soleo, et non raro mihi accidit, ut somniam, utinam tecum ire mihi liceat. :)

In animo habebam hodie et aenigma novum ponere et Horati aliud carmen praebere et sub "libros lege" aliuid scribere, at hospites habuimus, quo prohibita sum. Propediem autem, quae modo dixi, perfaciam, interdum valete quam optime.
Quaecumque a proavis tibi sunt commissa benignis,
compara ut illa tibi propria possideas!

- mathesis localiter trivialis -
Iulia
 
Nuntii: 569
Nomen dedit: Lun 15 Mart, 2004 18.08
Location: Saxonia Inferior

PreviousNext

Return to Alia themata

Qui adsunt

Users browsing this forum: No registered users and 0 guests

cron