Omnibu ridentibus spd Rhumak.
Hanc facetam narratiunculam quidam sodalis meus in itinere feriarum mi narravit, quam, cum in cachinnos plurimos me iniecerit, hic describendo indignam non aestimem, sed cum eruditione careat (nam simplex et mera narratiuncula sine ullo cum operibus claris clarorum auctorum nexu est, vestras econtra iam vidi Senecae aliorumque doctorum e scriptis excerptas vel innuentis...), spero utcumque vos benigne accepturos.
Tuebatur olim officinas Ioannis Agnelli domini FIAT autocinetificii italici operarius quidam, cui nomen Perciballes erat.
Cum Agnelli quosdam terrai olei effossores Arabas venientes exspectaret, officinasque suas eos speraret laudaturos, Perciballem haec iussurus adiit: "Audi, Perciballes, mox hospites potissimi nos visent, si Di patiuntur, aliquid empturi: cras mani hic aderunt: cura igitur, ut ante crastinam lucem hic omnia bene composita et expolita sint".
Postero mani, iussis perfectis, hospites veniunt Agnellique duce officinam visitum ineunt: qui cum Perciballem vident, Agnelli relicto, ad illum operarium salutatum urbanasque voces communicatum concurrunt. Postquam abierunt, Agnelli stupefactus Perciballem advocat et "Quandonam" quaerit "illos nosti?!", cui Perciballes: "Di magni, pueri colludebamus simulque studebamus!".
Mense insequenti iterum ab Agnelli operarius noster vocatur: "Perciballes" dominus inquit "Cras mani Americani quidam, qui mei similes autocinetificia possident, visitum venient: utinam me mirentur, quo cum illis aliquid mercati mi sint! Quaeso, omnia componas ordinesque!". Iussa facit, crastina lux venit et simul hacce hospites novi: qui cum officinam ingrediuntur Perciballi viso salutatum comiterque ludificatum occurrunt. Quis discessis, rursus Agnelli operarium suom advocat eadem rogaturus: eius quaestionibus ille: "Di magni" respondit "pueri colludebamus simulque studia perfecimus!".
Paucos post menses factum est, ut amicitiae firmandae colloquiique causa Ioanni Agnelli ipse Pontifex adeundus esset: dominus Perciballi vocato haec ait: "Audi, amice, Romam iturus sum: nam cum Pontifice rem habeo: quaeso ergo me comiteris, quandoquidem - leniter ludificans addit - quiscumque tibi notus esse videtur!". Itaque Perciballes dominum Romam sequitur.
In foro S. Petri una cum plebe concursa Agnelli et Perciballes stant: Pontifex nondum exiit. Subito Perciballes ad dominum haec: "Quaeso - inquit - me dimittas: nam negotium quoddam perficiendum est". Dimittit, solusque in multitudine manet. Sed ex improviso ecce Perciballes iuxta Pontificem multitudinem consalutans!
Perciballes, postquam cum Pontifice amabiliter in palacio privatim collocutus est, rursus in multitudinem descendit, in qua cum dominum suom humi stratum perspicit, sublaturus et quid acciderit rogaturus adit: cui Agnelli respondit: "Audi, Perciballes: nam omnia pati queo: te defossoribus Arabibu nosci, te et defossoribus quidem Americanis: sed hoc vix aequo animo fero, quod Ser quidam ad me venerit rogaturus, quisnam ille candidatus iuxta Perciballem salutantem esset!!"
Valete quam plurimum!