YLE Colloquia Latina

..

Mercurius novicio s. d.

Laetissimo animo te in foro salutamus! Spero quam frequentissime forum nostrum a te visitatum iri. Certe, non est "harena" hic, nisi in colloquio "Lectio magna", ubi auctores antiqui tamquam gladiatores inter se certant. Ceterum, sit venia verbo, haud scio an sine causa novum forum institueris, amice: adire enim potuisses colloquium "novus es in foro? huc accede!", ubi a pluribus tuus nuntius lectus esset. Sed hoc nihil est: gaudemus quidem non minime te foro nomen dedisse! Ubi habitas? Ubi et quando linguam Latinam didicis? Vale! Budapestini, pridie Iduum Ianuariarum.

..

M. Favonius Norico sodali novissimo salutem.

Binis tuis litteris, amice, me quoque delectatum esse scito; nam Latine scribere tam fortiter audes, ut nemini liceat dubitare, quin in sodalium numero referendus sis.

Quod vero vectorem te esse scribis per totum Europae venustissimum orbem peregrinabundum, mihi plura ea de re audiendi iniecisti cupiditatem.

Ceterum itinera te facientem votis omnibus prosequor.

Vale. Idibus Ianuariis. Ex Rhenania inferiore.

..

Mercurius Norico s. d.

Ne te pigeat, amice, hoc colloquium instituisse! Tuo nuntio primo celeriter perlecto putavi etiam hoc colloquium ab aliquo homine novo ideo esse factum, ut hoc modo ceteris introduceretur. Multa enim huiusmodi colloquia prius facta sunt - inter themata "alia themata" plurima colloquia "salvete!" "salve!" praetitulata invenies - quae certe supervacanea sunt, cum solummodo de uno homine in illis agitur... Quanto opportunius erat unum colloquium ad hunc finem facere!... Sed postquam tuam epistolam primam iterum percurri, intellegi te non (solum) ut ceteri te animadverterent hoc colloquium creavisse, sed etiam ut forum nostrum - utrum merito an non? nescio - laudibus extolleres. Vale iam amice, ac in forum nostrum quotidie redi!! Ibidem, a. d. XIX. Kalendas Februarias.

PS: Scripsisti te in Germania exulem (??) esse. Quae tibi causa fuit ex Austria discedendi?

..

Mercurius Norico s. d.

Placuit mihi dialogus, quamvis etiam de nobis fabula narretur... Intellegi te offensum esse, quod saepe litteris tuis nullum responsum datur; quod propter stylum tuum "incultum" (verbo tuo utor) ita fieri putas. Minime. Tu enim facile Latine scribis, alii vero non: et ego scrupulosus ac tardus sum in Latine scribendo: qua re fit, ut tardius vobis respondeamus. Stylum vero tuum incultum esse nego, immo facetus ille est viridisque: rogaverim autem te, ut sententias cum litteris maiusculis incipias, spatiumque semper inter vocabula ponas; ita enim facilius esset epistulas tuas legere. Utinam meum admonitum aequo animo feras!.... Vale. Budapestini, a. d. VII. Id. Febr.

..

Marcus Norico amico cognitionis et scientiae cupidissimo s.d.p.
Equidem te quam primum in colloquia rediturum esse spero. In epistulis enim tuis hominis sane litterati scriptorisque festivi mentem spirare intelleximus. Peregrinantem te votis ominibusque prosequor. Toto pectore exopto, ne qua res aspera gravis necopinata tibi accidat. Vale et salve. VI Id. Febr. Ex Rhenania inferiore.

..

..

..

Marcus Norico s.d.p.

Quid tibi animi est, optime mi amice?

Forsitan haec tibi solacio sint verba, quae transcripsi ex Epicteti philosophi Enchiridio (qui libellus Enchiridion inscribitur, quod pugionem significat: ut pugio militibus, ita hic libellus iis, qui recte vivere student, perpetuo „ad manum“ sit oportet):

„Homines perturbantur non rebus, sed iis, quas de rebus habent, opinionibus. Verbi causa: Mors non est malum - alioqui enim et Socrati ita visum esset -, sed opinio de morte, quae malam eam facit. Cum igitur impedimur aut distrahimur, non alios culpemus, sed nosmet ipsos, hoc est nostras opiniones. ... “ (c. 5).

„Invictus esse potes, si in nullum certamen descendas, quod vincere tui arbitrii non est. Si quem eximiis honoribus affectum aut ampla potestate praeditum aut alioqui florentem videris, vide, ne quando beatum illum praedices visorum impetum secutus. Nam si in rebus nostrae potestati subiectis vis tranquillitatis constiterit, nec invidia nec aemulatio locum habebit tuque ipse non imperator, non senator, non consul esse voles, sed liber. Ad eam autem rem via unica est: eorum, quae in potestate nostra non sunt, contemptio“ (c. 19).

Equidem sollicitudine quam primum te levatum iri spero.

Optime vale.

IV Id. Mart. Crefeldiæ.

..