LECTIO MAGNA

Colloquia de litteris Latinis

Moderators: Moderator, Redactio Interretialis

Emitteby Mercurius Hungaricus on Ven 20 Ian, 2006 12.53

Mercurius sodalibus s. d.

Longissimo tempore post ultimum duellum delcaratum exacto cras me eventum huius certamini vobis demonstrare decrevi. Si quis suam opinionem proponere velit de hoc certamine, in quo disputatur, utrum Cicero in rostris an Seneca in rebus philosophicis alio anteponendus sit; si quis, inquam, huic illove favere velit, hodie adhuc nuntium suum suffragatorium huc mittere potest! Valete. Ex castro Budensi, a. d. XIII. Kal. Febr.
Veritate duce, comite labore.
Mercurius Hungaricus
 
Nuntii: 806
Nomen dedit: Mart 16 Mart, 2004 10.24
Location: Pannonia Inferior

Emitteby Ericus Palmén on Sat 21 Ian, 2006 1.31

Ericus Palmén Mercurio Hungarico s.d.p.
Recentissimis septimanis quam maxima variorum munerum multitudine occupatus et hodie vespere e bidui itinere Helsinkiensi domum reversus ordinatrum aperire properavi ac nuntium tuum hodiernum inveni; quo adductus, velut si scripsisses: "Quo usque tandem abutere, Erice, patientia mea?", tandem aliquando quaedam de Cicerone et Seneca scribere decrevi.
Rursus inter se certant duo scriptores praestantissimi, quibus ambobus aureum nomisma porrigere velim. Id cum fieri non liceat, videamus primum, quidnam Quintilianus, vir doctissimus et litterarum Romanarum peritissimus, in libro decimo Institutionis oratoriae de iis disserat.

CICERO ei videtur "effinxisse vim Demosthenis, copiam Platonis, iucunditatem Isocratis" (X 1,108); in omnibus, quae dicat, tantam auctoritatem inesse, ut dissentire pudeat, neque advocati studium, sed testis aut iudicis fidem ab eo afferri; omnia haec, quae vix singula quisquam intentissima cura consequi possit, fluere inlaborata et illam, qua nihil pulchrius auditum sit, orationem prae se ferre tamen felicissimam facilitatem (cf. X 1,111). "Quare non immerito ab hominibus aetatis suae regnare in iudiciis dictus est, apud posteros vero id consecutus, ut Cicero iam non hominis nomen, sed eloquentiae habeatur. Hunc igitur spectemus, hoc propositum nobis sit exemplum; ille se profecisse sciat, cui Cicero valde placebit" (X 1,112).
SENECA a Quintiliano nequaquam tantis laudibus extollitur: "In philosophia parum diligens, egregius tamen vitiorum insectator fuit. Multae in eo claraeque sententiae, multa etiam morum gratia legenda, sed in eloquendo corrupta pleraque atque eo perniciosissima, quod abundant dulcibus vitiis. Velles eum suo ingenio dixisse, alieno iudicio; nam si obliqua contempsisset, si parum recta non concupisset, si omnia sua non amasset, si rerum pondera minutissimis sententiis non fregisset, consensu potius eruditorum quam puerorum amore comprobaretur" (X 1,129-130).

Manifestum est Ciceronem Senecae a Quintiliano plane anteponi. Equidem iudicio eius non protinus assentiar; nam vix negari potest Ciceronem quoque "omnia sua" nimis amasse (vide e.g. Or. in Vatinium 3,6-9), id est eodem vitio laborasse, quod Quintilianus soli Senecae tribuit, constatque eum non semper "in iudiciis regnare" potuisse; e.g. originalis eius pro Milone oratio tam male successit, ut ipse postea eam funditus retractaverit et Miloni Massiliae exsilium agenti retractatam miserit; ferturque Milo, cum hanc perlegisset, dixisse gaudere se, quod Cicero non tam bonam pro ipso orationem habuisset; alioquin sibi contingere non potuisse, ut Massiliae exsilii gaudiis perfrueretur. Quod ad Senecam attinet, nonne Quintilianus nimio rigore eum accusat, quod "in philosophia parum diligens" fuerit ac "rerum pondera minutissimis sententiis" frangendo iuventuti" perniciosissima" exempla "dulcibus vitiis" abundantia praebuerit? Equidem sententiis alatis Senecae, quibus opera eius abundant, valde delector magnique eas aestimo ut sapientissime ponderatas, fortasse ea ipsa de causa, quod "exercere" possunt "utrimque iudicium" (Quint.Inst.or. X 1,131).
Nunc vero audire mihi videor te, Mercuri, exclamantem: "O Erice, Erice, quae mira cupiditas tibi est rerum peritis semper adversandi? Profecto Senecam Ciceroni praeferre meditaris?" Accedit, quod ipsius Ciceronis manes tibi succurrunt me ita alloquentes: "Erice, tu sententias alatas Senecae laudas? Num oblique contendere vis opera Ciceroniana iis omnino carere? Iam in prima orationum in Catilinam habitarum, quae nunc "in arena" stant, nonnullas sententias celeberrimas reperis, e quibus unam ipse in initio huius nuntii mutatis mutandis citavisti: 'Quo usque tandem abutere, Catilina, patientia nostra?', 'O tempora, o mores!, 'Ubinam gentium sumus?', 'Perge, quo coepisti', 'Cum tacent, clamant' etc."
Utri igitur nomisma aureum dederim? Fateor me saepe ab aliorum communi opinione digredi velle, ut iis, qui e certamine inferiores discedere videntur, subsidium feram. Exceptio confirmat regulam: hoc in duello ego quoque victoriam Ciceroni deberi censeo. Qui nisi orationibus in Catilinam habitis de re publica Romana conservanda optime meritus esset, veri simile est posteriorem cursum historiae longe alium evasurum fuisse, atque evasit - omni civitate in summam perniciem et anarchiam redacta Senecae fortasse numquam occasionem futuram fuisse Epistulas morales ad Lucilium scribendi? Vale!
Ericus Palmén
Ericus Palmén
 
Nuntii: 273
Nomen dedit: Lun 01 Mart, 2004 14.32
Location: Media Finnia

Emitteby Mercurius Hungaricus on Sat 21 Ian, 2006 2.00

Mercurius Erico s. d.

O epistolam magnificam, haud minus eleganter quam sapienter compositam! O eloquentiam mirificam tuam, qui non solum me humillimum, sed etiam manes Ciceronis quasi te alloquentes produxisti! Utinam saepius, Erice, nos huiusmodi epistolis condonares! Rem tenes, verba sequuntur! Te legens semper maxime gaudeo, quod hoc forum a vobis Finnicis philologis fundatum, in quo tam egregiis nuntiis frui possumus! Quid plura? Gratias tibi ago pro tua epistola, quae si etiam nostris nuntiis certamen haberetur sine dubio numismate aureo condecoraretur! Vale quam optime. Budapestini, a. d. XII. Kal. Febr.
Veritate duce, comite labore.
Mercurius Hungaricus
 
Nuntii: 806
Nomen dedit: Mart 16 Mart, 2004 10.24
Location: Pannonia Inferior

Emitteby Marcus Favonius on Sat 21 Ian, 2006 15.23

M. Favonius sodalibus, imprimis Mercurio Hungarico praestantissimo certaminis magistro sal.
Ericus Palmén, patronus noster amplissimus et doctissimus, quid sentiret, tam ornate graviter scienter acommodateque ad persuadendum explicavit, ut nulla iam causa certaminis extrahendi relicta esse videatur. Litteris eius diligenter retractatis aliquid scrupuli in mente mihi quidem haerere confiteor, sed nihilo minus Senecae primas deferendas esse censeo, idque propter eas ipsas res, quae Epistulis Moralibus continentur. Quod vero ad dicendi genus attinet, sine ulla dubitatione confirmaverim in altissimo gradu positum esse Ciceronem. Quando renuntiabitur, quis ex hoc certamine singulari victor discesserit?
Valete. XII K. Feb.
:D
Marcus Favonius
 
Nuntii: 1125
Nomen dedit: Lun 15 Mart, 2004 12.05
Location: Germania Inferior

Emitteby Mercurius Hungaricus on Sol 22 Ian, 2006 15.16

Mercurius sodalibus s. d.

Quamquam in mense Decembri anni elapsi MMV. iam multis verbis Ciceronis orationes in Catilinam defendebam, tamen puncta connumerans animadverti me non clare proclamasse cui faverem. Certe CICERONI. :D Valete. Budapestini, d. XI. Kal. Febr.
Veritate duce, comite labore.
Mercurius Hungaricus
 
Nuntii: 806
Nomen dedit: Mart 16 Mart, 2004 10.24
Location: Pannonia Inferior

Emitteby Mercurius Hungaricus on Sol 22 Ian, 2006 15.37

EVENTUS DUELLI SEXTI

Mercurius sodalibus s. d.

Etiam ego summo cum studio recognovi nuntios in hoc duello a nobis missos, cum plane nesciebam, uter duorum scriptorum plus punctorum accepisset. Septem homines suffragati sunt: Elessar, Marcus, soter, Bernardus Flos, Herimannus, Ericus Palmén, et ego. Primus omnium Elessar - laconice quidem - Ciceroni palmam dedit; postea vero Senecae fautores - Marcus, soter ac Bernardus Flos - impetum fecerunt contra aciem Ciceronianam sane vehementissimum, ita ut qui oratorum principi faverent, summa iam desperatione premerentur. Quo in discrimine pugnae auxilia Tullii tandem advenerunt, ducibus Herimanno Ericoque, quibus quamvis sero et ego me adiunxi. E hoc ergo certamine non minimo quis victor evaserit, facile invenire potest, qui computare scit... :D Valete! Certamina semi-finalia sequuntur! Ibidem, eodem die.
Veritate duce, comite labore.
Mercurius Hungaricus
 
Nuntii: 806
Nomen dedit: Mart 16 Mart, 2004 10.24
Location: Pannonia Inferior

Emitteby Marcus Favonius on Sol 22 Ian, 2006 21.26

M. Favonius sodalibus, imprimis Mercurio Hungarico benevolo certaminis magistro s.d.p.
Equidem suffragia abs te, optime Mercuri, renuntiata sine mora ad calculos vocavi, idque computatro pugillari usus :lol: . Doleo quidem, quod Senecae nos fautores e gigantomachia illa inferiores discessimus; neque vero ignominia nos affectos esse puto; gloriari enim nobis licet victos nos esse ab amicis amplissimis humanissimis litteratissimisque. Valete. XI K. Feb.
Marcus Favonius
 
Nuntii: 1125
Nomen dedit: Lun 15 Mart, 2004 12.05
Location: Germania Inferior

Emitteby Mercurius Hungaricus on Ven 27 Ian, 2006 21.06

CERTAMINA PAENULTIMA

Mercurius sodalibus s. d.

Duellis iam finitis uter ex his paribus plus punctorum acceperit, colore rubro vobis designo:


I. Catulli carmina - Horatii carmina

II. Titi Livii ab urbe condita libri - Taciti Annales

III. Sallustii de Catilinae coniuratione liber - Taciti Germania

IV. Horatii carmen III. 9. - Vergilii ecloga I.

V. Vergilii Aeneis - Lucretii de rerum natura libri VI.

VI. Senecae epistulae morales - Ciceronis in Catilinam orationes

Nunc iam de eo cogitandum est, quomodo ex his sex operibus duas turmas e ternis operibus constantes creemus. Ego quidem scriptores a poetis esse discernendos censuerim:

Turma I.

Taciti Annales
Taciti Germania
Ciceronis in Catilinam orationes


Turma II.

Horatii carmina
Vergilii ecloga I.
Lucretii de rerum natura libri VI.


Quid vos censetis? Valete. Budapestini, d. VI. Kal. Febr.
Veritate duce, comite labore.
Mercurius Hungaricus
 
Nuntii: 806
Nomen dedit: Mart 16 Mart, 2004 10.24
Location: Pannonia Inferior

Emitteby Marcus Favonius on Ven 27 Ian, 2006 22.19

Marcus Mercurio suo s.d.p.

Equidem duas illas turmas optime effectas esse arbitror.

De suffragii ferendi ratione haec habeo, quae dicam, eaque pace tua, Mercuri optime, dici liceat:

Et quod ad turmam I et quod ad turmam II attinet, suum cuique suffragium ita ferendum esse censeo, ut quicumque principem turmae locum obtinere putatur, is tria puncta ferat, quicumque secundum, duo, quicumque tertium, unum. Quibus omnibus punctis ad calculos vocatis in certamine paenultimo celerrime facillimeque victores repertum iri puto.

Tu quid censes?

Optime vale. VI K. Feb. Crefeldiae.

:D
Marcus Favonius
 
Nuntii: 1125
Nomen dedit: Lun 15 Mart, 2004 12.05
Location: Germania Inferior

Emitteby Mercurius Hungaricus on Sat 28 Ian, 2006 1.29

Mercurius Marco suo sodalibusque s. d.

Ratio certaminum paenultimorum callide a te excogitata, amice! :D Ego prius putavi satis fore eum scriptorem poetamve designare, qui cuique maxime placeret: sed modum suffragandi a te propositum aequiorem esse libenter concedo, immo aptiorem ad animos excitandos. Quid vero facturi simus, si duo opera totidem punctorum acceperint? Eh, si hoc forsitan acciderit, aliquid certe faciemus :D.
Unum addiderim rationi illi punctorum ferendorum a te propositae: scilicet quod quamvis breviter causas cuique suas ostendendas existimaverim, cur unum opus alii tertioque anteposueruit. Vale! Ibidem, eodem die.
Veritate duce, comite labore.
Mercurius Hungaricus
 
Nuntii: 806
Nomen dedit: Mart 16 Mart, 2004 10.24
Location: Pannonia Inferior

Emitteby Marcus Favonius on Sat 28 Ian, 2006 10.50

Marcus Mercurio suo s.p.d.
Equidem gaudeo, quod modus suffragandi a me excogitatus etiam tibi, amplissime mi amice, probatur et argumenta nobis afferenda esse censes :D . Quod vero ad verba tua „Quid vero facturi simus, si duo opera totidem punctorum acceperint?“ attinet, periclitemur oportet certaminis fortunam :roll: . Nonne rem ad sortem quoque revocari licebit?
Optime vale. V K. Feb. Crefeldiae.
Marcus Favonius
 
Nuntii: 1125
Nomen dedit: Lun 15 Mart, 2004 12.05
Location: Germania Inferior

Emitteby Marcus Favonius on Sat 28 Ian, 2006 13.39

M. Favonius sodalibus, imprimis Mercurio Hungarico probatissimo certaminum magistro sal.

Ne res procrastinetur, sodales honoratissimi, aggrediar, si per vos licitum erit, ad suffragium ferendum. Utinam ne sit praeproperum!

Ad turmam I:

Taciti Annales:-------------------------puncta III
Ciceronis in Catilinam orationes:--puncta II
Taciti Germania: ----------------------punctum I

Cuius suffragii hanc affero rationem, idque quam brevissime:

Tacitus tria puncta fert propter singulare ingenii acumen et propter eas res, quae Annalibus continentur et persaepe ad patriam meam pertinent.
Cicero propter politissimam dicendi elegantiam mihi probatur.
Quod Germania tertium locum obtinet, Tacitus, quippe qui princeps iam electus sit, minime indignabitur.

Nunc ad turmam II:

Horatii carmina:----------------------puncta III
Lucretii de rerum natura libri VI:-puncta II
Vergilii ecloga I:---------------------punctum I

Ecce iterum argumenta breviter astricta:

Horatius dignus mihi videtur, qui tria ferat puncta; carmina enim eius tam concinna sunt et elegantia, ut quo saepius ea diligentiusque perpendam, eo plus ex eis percipiam laetitiae.
Duo puncta fert Lucretius: sine dubio decreta Epicuri tam elaboratis illustrat hexametris Latinis, ut nemo fere sit, quin carmine eius gravi atque severo vehementer commoveatur.
Vergilius, si Aeneis in aciem educta esset, tertium locum non obtineret.

Quod ad certaminis eventum attinet, in summam me exspectationem adductum esse confiteor :roll: .

Suffragia ferte et valete.

V Kal. Feb. Ex Rhenania pruina obrigescente.
Marcus Favonius
 
Nuntii: 1125
Nomen dedit: Lun 15 Mart, 2004 12.05
Location: Germania Inferior

Emitteby Mercurius Hungaricus on Sat 28 Ian, 2006 16.03

Mercurius sodalibus Marcoque suo s. d.

Festinantissimo calamo, amici:

hoc est, quod timui: suspicabar enim Marcum in utraque turma iudicium suum esse nobis declaraturum. Sed: esto! Sequamur ergo Marcum nostrum, et simul in duobus turmis suffragemur!! Ego quidem nunc haud vaco iudicando, sed cras omni modo nuntium huc mitto. Valete! Budapestini, a. d. V. Kal. Febr.
Last edited by Mercurius Hungaricus on Sol 29 Ian, 2006 16.03, edited 1 time in total.
Veritate duce, comite labore.
Mercurius Hungaricus
 
Nuntii: 806
Nomen dedit: Mart 16 Mart, 2004 10.24
Location: Pannonia Inferior

Emitteby Marcus Favonius on Sat 28 Ian, 2006 17.49

Marcus Mercurio suo s.d.p.
Et me vidisti timuisse, ne praepropere agerem. Quo in peccato ut coniveas, te oro atque obsecro; admiratione enim certaminis abs te instituti me prolapsum esse fateor :oops: paratusque sum ad iudicium meum rescindendum. Ex animo valere te iubeo.
Marcus Favonius
 
Nuntii: 1125
Nomen dedit: Lun 15 Mart, 2004 12.05
Location: Germania Inferior

Emitteby Phlebas on Sol 29 Ian, 2006 13.58

Phlebas sodalibus salutem

Praemitto: mea opinio suffragia ponderanda sunt; id est : si optimi doctissimique sodales integra puncta ferre possunt, ego – propter ignorantiam et exiguitatem lectionum – infinitesima (matematice : 1 / ∞) puncti fero.

Postquam haec praemisi, ad suffragium advenio.

Turma I.

Taciti Germania : infinitesima puncti III
Taciti Annales : infinitesima puncti II
Ciceronis in Catilinam orationes : infinitesimum puncti I

Germania

Tacitus non describit Germaniam sed investigat animum populi Germaniae : duo locos mihi maxime placent:

"Inesse quin etiam sanctum aliquid et providum putant, nec aut consilia earum aspernantur aut responsa neglegunt." ( 8 )

"Lamenta ac lacrimas cito, dolorem et tristitiam tarde ponunt. Feminis lugere honestum est, viris meminisse." ( 27 )

Annales

"Ne feminae quidem exsortes periculi qu<i>a occupandae rei publicae argui non poterant, ob lacrimas incusabantur; necataque est anus Vitia, Fufii Gemini mater, quod filii necem flevisset." (VI, 10.1)

Seneca noster dicit: "Sic Sallustio vigente anputatae sententiae et verba ante expectatum cadentia et obscura brevitas fuere pro cultu" (Epistulae Morales, 114) et similiter dicere potes de Tacito.

In Catilinam

Cicero perfectus est ; sed - mea culpa - perfectio Ciceronis animum meum non movet : multum malo Catilinam Sallusti nostri : "Catilina, ut erat paratus ad dissimulanda omnia, demisso vultu, voce supplici, postulare a Patribus, ne quid de se temere crederent …" (Bellum Catilinarium, XXXI)

Sententiae Ciceronis sunt sicut amplissimae pulcherrimaeque valles Tusciae, sed ego praefero asperitatem montium Senecae, Sallusti, Taciti, et verba ut necopinata praerupta.


Turma II.

Horatii carmina : infinitesima puncti III
Lucretii de rerum natura libri VI. : infinitesima puncti II
Vergilii ecloga I. : infinitesimum puncti I

Carmina

Humanitas Horati mihi placet et serenitas; non indagat sed plane describit, et illa descriptio animum commovet.

"Divesne prisco natus ab Inacho
Nil interest , an pauper, et infima
De gente sub dio moreris,
Victima nil miserantis Orci." (II, 3)

De rerum natura

Sicut Augustinus noster, Lucretius explicare vult absurditatem humanae condicionis : Augustinus Deum, Lucretius clinaminem ponit; fieri non potest ut fati vincula rumpant, sed quaestio humanissima pulcherrimaque est.

"Tantum religio potuit suadere malorum." (I, 101)

Ecloga I.

"Humani nil a me alienum puto" dicit Seneca noster. Deus scripsit eclogam illam perfectissimam, et ego puto divinam illam eclogam mihi alienam.


Valete quam optume
Nomino numeros; quibus numeramus; et adsunt in memoria mea non imagines eorum, sed ipsi.
Phlebas
 
Nuntii: 123
Nomen dedit: Iov 29 Dec, 2005 15.42

PreviousNext

Return to Litterae Latinae

Qui adsunt

Users browsing this forum: No registered users and 0 guests

cron