YLE Colloquia Latina

Spartacus cum omnibus sodalibus tum praecipue Herimanno sal.

Tempore, amici, computatrum domesticum meum, nunc munere suo iterum fungerit!

Timeo, Herimanne, ut hanc pelliculam cinematographicam impulsu tui in civitate mea invenire possim. Sed operam dabo!


Vale!

M. Favonius sodalibus sal.

Igne Olympio Athenis restincto non alienum videtur de Vitruvii verbis cogitare, quae in prooemio noni de arcitectura libri reperiuntur:

„Nobilibus athletis, qui Olympia, Pythia, Isthmia, Nemea vicissent, Graecorum maiores ita magnos honores constituerunt, uti non modo in conventu stantes cum palma et corona ferant laudes, sed etiam, cum revertantur in suas civitates cum victoria, triumphantes quadrigis in moenia et in patrias invehantur e reque publica perpetua vita constitutis vectigalibus fruantur. Cum ergo id animadvertam, admiror, quid ita non scriptoribus eidem honores etiamque maiores sint tributi, qui infinitas utilitates aevo perpetuo omnibus gentibus praestant. Id enim magis erat institui dignum, quod athletae sua corpora exercitationibus efficiunt fortiora, scriptores non solum suos sensus, sed etiam omnium, cum libris ad discendum et animos exacuendos praeparant praecepta.
Quid enim Milo Crotoniates, quod fuit invictus, prodest hominibus aut ceteri, qui eo genere fuerunt victores, nisi quod, dum vixerunt ipsi, inter suos cives habuerunt nobilitatem. Pythagorae vero praecepta, Democriti, Platonis, Aristotelis ceterorumque sapientium cotidiana perpetuis industriis culta non solum suis civibus, sed etiam omnibus gentibus recentes et floridos edunt fructus. E quibus qui a teneris aetatibus doctrinarum abundantia satiantur, optimos habent sapientiae sensus, instituunt civitatibus humanitatis mores, aequa iura, leges, quibus absentibus nulla potest esse civitas incolumis.
Cum ergo tanta munera ab scriptorum prudentia privatim publiceque fuerint hominibus praeparata, non solum arbitror palmas et coronas his tribui oportere, sed etiam decerni triumphos et inter deorum sedes eos dedicando iudicari“ (1-3).
***
Quid Vitruvium, si multos athletas etiam illicitis medicamentis stimulatos vidisset, scripturum fuisse putatis?

Valete.

III Kal. Sept.

Herimannus Marco sal.

Quid tibi respondeam, Marce? Peiora hodie omnia videntur, non solum propter illicita medicamenta, sed etiam quia gloria et divitiae ad ineptos rei publicae rectores et falsos histriones affluunt, qui multo minus laborant quam athletae Olympici! Haec tempora, Marce, et haec obtorto collo toleranda!

Vale!

Novocomi, a. d. III Kal. Septembres

Iulia Marco Herimanno sal.

Assentio Ludi Olympici non esse, quod esse deberent. Non solum ut certi athleti longe nimium habeant gloriae ac divitium, dum nomina aliorum pro cuiusque disciplina solum quarto quoque anno in publico appareant, non solum ut adhibeant athletae medicamina illicita, ut gloriam assequentur: In hoc enim, etsi impossibile sit omnes peccatores multari, tamen operam dant, ut quam plurimos deprehendant.
Gravius censeo sententias pravas iudicum, quos constat saepius falsis favisse partibus, plerumque partibus Americanorum. Quomodo fieri potest, ut olympionikes quaeritur non in certamine ipso per artem suam athleticam, sed in iudicio? In Diurno Francofurti Generali (FAZ) legi a. d. XII Kal. Sep. commentarium, in quo enumerati erant plurimi casus talium sententiarum: Primum equites Germani, qui athletice optimi erant, sed ob parvulum mendulum ambas medaillas aureas perdiderunt - Francogalli, Anglici, Americani eo lucrum fecerunt. Deinde natator Americanus Aaron Peirsol, qui aeque optimus erat, aeque paululum mendavit, at non medaillam amisit. Tertium Paulus Hamm gymnasticus Americanus ob mendum "incorrigibilem" iudicii medaillam suam retinere potest, quamvis Tae Young Yang Coreanus Australis melior erat. Et non solum Coreani, et Russi putant Americanos meliores a iudicibus aestimatos esse. Addendus est Andreas Erm Germanicus, qui in certamine eundi sine causa aperta exclusus est, solum quia, ut ipse putat, celerior erat certis aliis athletibus et ita periculum erat victoriae illorum. (Victor erat Polonicus ante duos Russos.)
Talibus decisionisus profecto putandum est iniuria talia non posse afficere Americanos, neque cogitari potest anno bis millesimo octavo Sinis talia posse accidere. Non autem tolerandum est alias terras ita plus valere aliis!


Ceterum Ludis usa sum, ut viderem, quae verba Neograeca intellegere possem... Intellexi numeros unus usque decem!

Valete.

Gottingae, pr. Kal. Sep.

Herimannus Iuliae et sodalibus sal. d.

Praeter quae iam dicta sunt, haec sententia mihi subvenit dum fiunt Olympia, eandemque in nonnullis actis diurnis inveni: in Olympiis plurima certamina habentur et variae civitates diversis in disciplinis praevalent; sed ceteris temporibus perpauca genera certaminum coluntur et diffunduntur: pedifollium (football), celerrimum vehiculorum cursus, birotarum certamen .... Haec genera enim maximam vim pecuniae movent et largissime invadunt acta diurna et televisificos apparatus. Ut patrium exemplum afferam, Italia aurea decora in cursu Marathoni dicato et in arte sagittaria, illis temporibus quae apud colloquia Latina coluntur creatis, inter alia adepta est.
Valete omnes!

Novi Comi, postridie Kalendas Septembres.

Herimannus omnibus sal. dicit

Mihi memoriam facere oportunum videtur de horrenda caede in urbe Ossetiae Beslan vocata ab immanibus et saevis terroristis et - reputo - etiam a militibus Russis moderatoribus oboedientibus, qua dum scribo constant trecentos duos et viginti (CCCXXII) homines periisse, quorum dimidia pars pueros et puellas. Non censeo nos umquam certiores fore quid re vera cladi initium dederit et quid postea acciderit: sed me terrent saevitia terroristarum, quam arcere potest sola providentia rectorum, qui causas defectionis et odii avertant, et levitas rectorum et praesertim praesidis Putin, qui Ceceniae occupationi minime finem imponere in animo habet, tanto sanguinis pretio.
Atrox dies hic Europae toti!

Mihi hic nuntius per telephonicum mobilem apparatum hodie pervenit, candelam ad fenestram hoc vespere accendi posse, ut memorentur pueri et puellae enecti.
Parvum signum contra vires immanes.

Novi Comi, pridie Kalendas Septembres.

Mercurius omnibus s.

Et me terrent clades a territoribus patratae, quae in dies crebriores esse mihi videntur. In diurnalibus si ad res externas pergo, iam fere nihil invenio nisi explosiones, homines in captivitatem iactos, iugulationes ac alia horribilia ab istis perditis latronibus commissa. Sane preases Americanus Bush heri dixit Iraquo occupato mundum tutiorem factum esse... Valete.

Salave,

Ego Sum Chad! Quomodo te Habes omines?

*omnes

Mercurius Chado s. d.

Vidi photographiam sub nomine tuo, quodnam vero aedificium in ea videri possit, nescio. Dic mihi quaeso! Vale.

M. Favonius sodalibus sal.
Gubernatores rei publicae Turcicae quamquam Turciam Unioni Europaeae adiungendam esse censent, legem laturi esse dicuntur, qua caveatur, ut adulterium facinus sit poena dignum. Vos de ea re quid censetis?
Pr. Id. Sept.

Herimannus Marco Favonio et sodalibus sal. d.

Quamquam aberrare rectores Turciae mihi videntur, si talem legem re vera approbent, alia etiam affirmanda censeo de re publica Turca Unionem Europaeam ineuntem.
Nam, si historiam et humanitatem consideres, omnino dignam Turciam mihi videtur, quae pars Unionis Europaeae fiat: opinio illorum, qui civitatem illam Unionis sodalem fieri nequire censeant, quod muslimorum religio in illa hodie praevaleat, obliviscuntur "Graeciam classicam" late in Turciae terris sedem habuisse et ibi Paulum apostolum verbum Christi annuntiavisse priusquam alibi; obliviscuntur autem per terras illas Arabum humanitatem et scientiam transiisse, quas et hodie praesentes apud nos valde cognovimus (numquis Romanorum notis computare vult?).
Haec moderatores Europae a Turcis rectoribus postulanda sunt, si patriam suam in Unionem inire velint, dignitatis civium omnium et Curdorum (necnon adulterorum et adulterarum) ratio, libertas tribunalium, humanitas in carcere et alia huius generis: quae hodie mihi apud populum Turcorum hodie carere videntur.
Me ignosces et ignoscetis omnes, quia rarius ad colloquia Latina nuntios scribo: nam labor cotidianus et alia munera iterum coeperunt , et mentem et animum occupant.
Valete ergo omnes!

Novocomi, pridie Idus Septembres.

Mercurius Marco Herimannoque s. d.

Et ego maxima cum consternatione in diurnalibus legi huiusmodi legem esse propositam in Turcia, quae quamvis Islamica, tamen, ut ita dicam, "illuminata" ac democratica habetur. Quod autem ad rationes tuas attinet, mi Herimanne, etsi ea compensanda esse haud negaverim, tamen opinio mea a tua maxime abhorret. Licet enim Magna Graecia et ad Turciam hodiernam prorogata sit, ac S. Paulus et ibi verbum divinum sparserit, nos Hungari ac omnes nationes, qui in paeninsula Balcanica vivunt, oblivisci haud possumus Imperii Turcici, cuius sultani feritate incredibili regna Balcanica ac maiorem partem Hungariae occuparunt, devastarunt, diripuerunt, multitudinem hominum maximam in servitutem eduxerunt, reliquiasque populi tributis horribilibus cruciaverunt. Cui dominationi barbarae adscribi potest paupertas ac ruditas gentium Balcanicarum, bellaque plurima, quae in paeninsula adoriuntur. Certe non me fugit Unioni moderatoribus haud praeterita, sed praesentia esse consideranda, cum de Turcia Unioni admittenda consulunt. Sed cum nuncium tuum legissem, mi Herimanne, qui rationes ad culturam ac historiam pertinentes afferres, esse rationes historicas putavi alias, quae in hac quaestione multo plus valere mihi viderentur. Valete. Transaquinci, eadem die.

Iulia Marco Herimanno ac Mercurio sal.

Si Turci in Unionem intrare volunt, id non pendere potest e religione neque ex historia et humanitate. Nonne etiam in terris Unionis habenus libertatem religionum? Si totus populus Germanicus vel aliae terrae repente ad religionem Islamicam converteretur, id non posset esse causa eius terrae excluendae, dummodo libertas religionum servaretur. Et sola condicio si esset historia, recipienda esset ipsa Iraquia, cum omnis cultus ortus sit e Mesopotamia. Ceterum, ut Mercurius dixit, et Turci multa crudelia fecerunt Europaeis.
Fundamenta Unionis Europaea, ut rationes "libertatis, aequitatis, fraternitatis" et Iura Hominum - quae dicunt omnes homines esse aequos, nullum cultum, nullam religionem plus valere aliis - orta sunt ex historia et virtutibus Europae occidentalis. Si nunc idem Europaei dicunt Turciam non posse recipi ob religionem Islamicam, vulnerant illa ipsa fundamenta Unionis et omnis cultus Europaei. Si autem haec virtutes valent, oportet omnes terras geographice in Europa sitas recipi possent, si in iis fundamentis nituntur.
Hic in Germania politicus quidam magnas difficultates habuit, cum locutus est de cultu ducente Germanico, cui omnes peregrini deberent se accommodare. Puto esse aliquid simile, integrationi enim opus est communi cultu, qui cultus autem in Germania nonnisi Germanicus potest esse. Idem valet etiam in Unione Europaea: Si Turci recipi volunt, oportet se accommodent cultu Europaeo; semel accommodatis autem non est, cur reiciantur. Ceterum si Turcia et Russia possunt ludere in certaminibus pedifollicis Europaeis, quamvis partim modo pertineant ad Europam, si etiam Israeli possunt participere, qui certe non sunt pars Europae, oportet eos etiam posse in Unionem recipi. Non fieri potest eos in ludo pedifollico esse pars Europae, non autem in rebus politicis.

Legi nescio ubi Turciam prius aut serius esse recipiendam in Unionem Europaeam, altera facultas cum esset eam in regionem ac culturam Islamicam reicere, quod nullo pacto fieri deberet. Profecto in certis partibus Turcia similis est Americae - religio, quamvis sit alia, tamen multum valet, et habent damnationem capitis -, sed in illis rebus fortasse non Turci humaniores sunt, sed Americani inhumaniores. Itaque non puto Turciam iam maturam esse Unioni: In multis rebus enim caret fundamentis illis, et non est recipienda, priusquam illas virtutes efficiat. Cum primum autem explet eas postulationes, statim rcipienda est.

Valete.
Gottingae, pr. Id. Sep.

Gastón sodalibus sal.

Maximae crudelitates saevitiaeque in historia humana a europaiis exercitae sunt. Nunc crudelissimi sunt Americani, quia potentissimi sunt.

Valete!