YLE Colloquia Latina

Rhumak omnibus sal

hoc aenigma vobis propono numero simili trimetriorum iambicorum (etsi nonnulla eorum nimis catalectica videntur... aut trimetra iambica prorsus non sunt? ) graece cogitatum nescio vel non memini a quo, cuius mentionem in "Re publica" Platonis, nescio vel non memini in qua parte, reperire vobis est. Ut versionem latinam meam intellegatis et si oportet corrigatis aut numerum veracem, si iambicum non esse compereritis, doceatis, versus rettuli graeca lingua compositos

Aìnòs tis hos anèr-te kouk anèr
ornìtha kouk ornìtha idòn-te kouk idòn
epì xylou-te kou xylou kathem

αἶνός τίς ἐστιν ὡς ἀνήρ τε κοὐκ ἀνήρ
ὄρνιθα κοὐκ ὄρνιθ' ἰδών τε κοὐκ ἰδών
ἐπὶ ξύλου τε κοὐ ξύλου καθημ[ένην]

Litteris Graecis in UTF-8 legendis versus suprapositos tertio completo obtuli. Andreas Moderator.

Ut verum dicam, mi melius inspicienti primus versus tantum duabus syllabis carere videtur, ceteri plane confecti patent... Ignoscatis... Et exspecto responsa.

Agricola Rhumaki spd

Quid tua narravit iamdudum nosse laboro
Pagina: Platonis suntne ea verba sophi?

Vale!

Rhumak Agricolae spd

Non Platonis, amice, verba, sed de quibus Plato in "Re publica" seu "Iustitia" mentionem facit. Ut dixi, auctoris horum versuom in illo libro nomen tacetur. Non est autem dubium, optime, quin auctor philosophus quidam sit, forsan anonymus, ut ille, qui paradoxum Cretensium fecit. Philosophi enim praesertim sophistae, quod Plato vementer queritur, maxime in his ludis logicis delectabantur, in quibus uno plura confluere faciebant, et ita rigorem rationis adversarii sui experiebant.

indicium praebeo

vir qui itidem vir non est; avis qui eodem avis tempore non est; ramus non ramus, lapis non lapis, iacere sine iaciendo:
quoddam ad philosophiam idearum attinens adhibet revera quaestio:
ecce ergo indicium: secundum rationem eius qui hoc excogitavit, quaeque res et omne animal quamquam faciem habet alicuius alius persimilem, elemento propri'et suopte praedita/um est, quo perspecto naturam illius rei animalisve perspicis, illius et non alius: elementum, quod differentiam patefacit. Idest, vir non vir est vir facie sed elemento discreto privus, avis non avis facie avis, sive quod aves faciunt maxime perspicuom facit sed non ad speciem avium pertinet; ramus non ramus faciem rami habet, cum lignum subtile sit, sed positio eius non propria fruticum est, itaque cetera.
Quod ad actum (verbum agendi, iacere), omnis actus qui finem suom non assequitur non actus esse videtur. Qui aliquid fecerit, ut aliquid alid illo facto necessario fieret, si hoc itidem factum non sit, seu si illa prima actio finem suom non consecuta sit, quasi nil omnino acta videatur.

... et exspecto responsum!

Vale et valete

Marcus Rhumaki sodali honoratissimo s.d.p.
In solvendo aenigmate abs te proposito parum me adhuc – pro dolor –profecisse fateor. Quod vero ad vocabulum poeticum „ο αι̃νος / ho aînos“ attinet, hoc addere mihi liceat: idem quoque valet atque aenigma: cf. Carmina Popularia, c. 34 (ed. T. Bergk, PLG = Poetae Lyrici Graeci, Lipsiae 1882/1914-1915, vol. III p. 654; Liddell-Scott p. 40). Vehementer doleo, quod carmen illud his diebus inspicere prohibeor. Ceterum nonne versus Graecos etiam litteris Graecis describi oportebat? De versuum metro atque sententia alias. Quam iucundissimum tibi exopto diem Solis.
Vale.
VII K. Iul. Ex Cornicum Campo.

-------------------------------------------
Macte virtute, Cohors Caerulea! Certamen finale: Germania – Italia?

Ignosce Rumak, mendum feci


Quid tua narravit iamdudum nosse laboro
pagina: verba sophi suntne Platonis ea?

Vale!

Marcus Rhumaki sodali eruditissimo s.d.p.

Aenigma illud Glauconi ante oculos obversatur: cf. Plat. rep. 479c („τωι των παιδων αινιγματι“: puerorum ergo est aenigma).

Vir / non vir: homo castratus sive eunuchus;
avis / non avis: vespertilio;
ramus / non ramus: narthex sive ferula (cf. Plin. n.h. 13, 122);
vidit / non vidit: avem esse falso suspicatus est;
lapis / non lapis: pumex;
iecit / non iecit: pumice coniecto vespertilionem non contigit.

De reliquis alias. Tempus hodie mihi deesse doleo.

Optime vale. VII K.Iul.

Rhumak Marco Agricolaeq sal

Quod ad aenigma, Marce, non eruditus es, sed pater eruditionis!

Quod ad metrum, quid?

Quod ad litteras graecas, nequeo eis computatro meo utier

Di te servent

Rhumak omnib Marco praesertim sal

PS
Marce,
tune comperisti quis auctor esset?

PPS

Utinam ambobus (Italiae et Germaniae) finem certaminis pervenire liceat, sed quod ad Italiam attinet, verum a Brasile metuo eiusque pede, infestus pilis bonis malisque
Valde Vale

Marcus Rhumaki sal.pl.d.
His diebus cum Coloniae Agrippinae in novo filii natu minoris domicilio instituendo vehementer occupatus sim, parum mihi temporis esse doleo ad epistulas diligenter conscribendas. Quod oro te mihi ignoscas.
Quod autem ad aenigma attinet, exstat commentariolum Germanice scriptum, quod composuit Petrus Stemmer, qui Constantiae philosophiam profitetur: „Das Kinderr

Rhumak Marco pergrato spd

Non bene intellegi illud "in novo natu filii minoris": qui interpreter illud "novo"? Utrum novum filium habes an ultimus natu filiorum tuorum alium nepotem tibi dedit (cum iam alios dedisset)? Utcumque dulcissimus est casus, tibiq maxime grator... sed mehercle te iuniorem figurabar
Quod ad libros quos suasisti, tibi grates ago, sed quam difficile in isto pagulo meo opera germanice conscripta reperire: tamen Romae in Facultatis Litterarum bibliotheca iis inveniendis non puto me laboraturum, quod, scito amice, sed puto te iam scire, maxima aestimatione, nec immerito, philologi tui Germani ab Italis habentur, praesertim in materie graeca: ipse in mercato vocabularium graecae germano Friedrich Schienkl italice versum repperi primorum annorum secli XX.
Ceterum illud aenigma in ipsa Re publica legi, commentario curatoris operis edendi explicatum, sed in libro V esse non memineram.

Vale quam maxime et qui pote vincas Caniculam

ex Hesperia calore et pedifollio fere exanimata.

(Fortuna sustulit, Fortuna reddidit, amice: illa expulsio plane impositura fuerat. Ita, impositura ab impositura solutast.....
ET AVSTRALIA PROVINCIA ROMANA!

Agricola Rhumak spd

Ecquid Romae devertes, et in ea facultate?

Et quisquam immiti non gaudet morte tyranni
aut non laetatur tot periisse mala?

melius:

Et quisquam immitis non gaudet morte tyranni
aut non laetatur tot periisse mala?


Valete!

Rhumak Agricolae sodali sdp

Non Romae habito, sed Romam saepius studiorum causa venio (miser "pendularis" et ego ) (Marco explico: pendularem Itali illum vocant, qui causa studii vel operae dandae extra civitatem qua incolit cotidie ferreas per vias usque ad situm quo studet vel operam dat vehatur rursumque suam in civitatem dormitum, munere perfecto, referatur).
Nec tamen in ea facultate versor, quod Architecturae, non Litteris studeo. Tun econtra ibi, mi Agricola, discis? En tu quoque provincialis an civis Romanus?