YLE Colloquia Latina

Soter Tullianam, novissimam amicam Polonam, amicissime salutat.


Magno cum gaudio te, Tulliana, hoc in Foro feliciter accipio: gratum tibi sit meum sincerum “Bene venias !â€

Soteri et aliis Sodalibus Tulliana salutem dicit.


Verba Tua Soter mihi pergrata sunt eaque maximo cum gaudio accepi.
Lodzia - urbs mea medium Poloniae est. Ibi vivo una cum familia atque amicis carissimis. Studia mea in primis ad litteras, artem poeticam et philosophiam attinent. Nonnumquam tempto carmina ex Polono in Latinum vertere. Nuper me antiqua ars epistolandi et species epistularum delectant. Amo theatrum visitare, mihi placet etiam flores in fasciculos componere. Si vultis de ceteris rebus me quaerere, scribite cito!


P. S Soteri pro nuntio amicissimo correctioneque erroris maximas gratias ago. Liceatne aliquid de Te cognoscere?

Tulliana amica vestra nova

Livius scripserat olim: ,, Periculum in mora"
<vide: Ab Urbe condita 38,25,13>


Quam ob rem cunctamini ? Sodales!!! Imo ex pectore vobiscum loqui vellim. Dicite, quod mihi faciendum sit, ut sermones Latine conferam?

Marcus Tullianae sodali Polonae s.d.p.

Me quoque gaudere scito, quod in Colloquia nostra venisti. Nudius quartus amici multa nobis narraverunt de pulcherrima urbe Cracovia. Et est nobis amica, quae Thoruni vivit, et filius maior natu, qui advocatus Gorlicii habitat, hoc anno linguam discit Polonicam. Oro te paullum nobis narres de Lodz patria tua, quod oppidum prorsus mihi ignotum esse doleo. Praeterea: Quod carmen Polonicum in Latinum convertisti?

Optime vale.

Idibus Novembribus. Ex Rhenania inferiore.

Salue.

Labos remuneratur tandem; pigritia statim.

Vale!

Soter Tullianae, amicae Lodzensi florum ornatus peritae, s.d.p.


Gratias tibi, “florealisâ€

Gratias, gratias maximas!

Nunc vobis respondere non possum, quod multa munera mihi sunt. Crastino tamen sine dubio scribam.
Valete et exspectate, nam ut
D.Vettius Saturninus scripsit:
,,Labos remuneratur tandem; pigritia statim"

M. Favonius Ursinus Soteri amico suo doctissimo Tullianaeque sodali honoratissimae sal.pl.d.

Quod ad Tullianae patriam attinet, hoc scriptum, nisi fallor, lego in oppidi sigillo, quod factum est anno Domini MDLXXVII:

SIGILIVM * OPIDI*LODZIA

Cf. http://de.wikipedia.org/wiki/Bild:Lodz1577.jpg

Equidem nos ea de re a Tulliana nostra certiores factum iri pro certo habeo.
----------------

Quod ad AICC pertinet, optime mi Soter, propediem responsum tibi reddam. Hoc iam loco maximas tibi ago gratias.

Optime valete, carissimi.

Id. Nov. Ex Cornicum Campo.

Recte dixisti Marce.

Urbs mea Latine ,, Lodzia" sive ,,Civitas Lodzensis" appellata est.
Conf:
http://la.wikipedia.org/wiki/Polonia
et Parvum Vocabularium Polonico - Latinum /ed. L. Winnniczuk, Varsovia 1998, p. 664/

Soter Giseldae, novae amicae Romanae, salutem dicit plurimam.


Bene venias ad has paginas Latinas, Giselda !

Nuper, confiteor, tuum parvum nuntium #6322, quasi in extrema pagina XVII superiore abditum, animadverti et, nescio qua re, verba illa tua, pauca et quasi timida, alte in meum pectus descenderunt !

Fac, quaeso, ut ego ipse et optimi Sodales amplius de te sciamus : loquere nobis de studiis tuis, de libris quos legere amas, de oblectamentis tuis !
Quam pridem linguam Latinam studes ?
Unde scribis ? Civis Romana an suburbana es ?

Hic - bono animo sis ! - permultos amicos totius terrarum orbis et multos populares tuos
( hac in Area colloquiali, enim, acies Italorum magna est), , quibuscum Latine colloqui poteris, invenies.

Agedum : nulla interposita mora, calamum sume !

Facias, amica Giselda, ut quam optime valeas !



Soter

Idibus Novembribus a. D. MMVI - Neapoli

Soter Marco Favonio,amico suo clarissimo carissimoque , et Tullianae, spectatissimae amicae Polonae, s.p.d.


Gratias vobis, Marce et Tulliana, maximas ago pro doctissimis responsis de recto nomine Latino urbis Lòdz.
Quod in « Lexico nominum locorum » legitur, de quo in superiore meo nuntio # 6333 scripseram, diligenter, nulla mora interposita, emendabo.
Faciatis, carissimi, ut quam optime valeatis.

Soter

A. d. XVIII Kalendas Decembres a. D. MMVI - Neapoli

Marcus Giseldae sodali Romanae Tullianaeque amicae Polonae s.p.d.

Me quoque, Giselda optima, excusare velim de neglegentia mea prorsusque me consentire scito cum Sotere amico nostro humanissimo. Equidem vehementer gaudeo, quod voce Romana Colloquia nostra amplificantur.

Ceterum invitare vos ausim ad LECTIONEM MAGNAM II MEDIAEVALEM, quae a Mercurio Hungarico amico nostro clarissimo ingeniosissime instituta est.

Optime valete.

XVIII K. Dec. Ex Rhenania inferiore.

Giseldae comiti atque civi plurimam salutem

O gaudium, ecce alia tandem, praeter me, Romanarum terrarum habitatrix foro inest!! Ego vero suburbii: Agrum enim Pomptinum incolo, Latinae (vel Littoriae) civitatis civis sum, secundae magnitudine provinciae Latii post Septimontium tuom.. sed non de me!!: TV potius quam facultatem frequentas? An in lycaeo versaris? Vbi Romae inhabitas? Vtrum es una civium mediae Vrbis, monumentis felicium sed heu chao metropolitano vexatorum an vivis in tranquillis confiniis vel in castellis? O pulcherrima castella romana! Tusculum domus Ciceronis! Tibur domus Herculis! Velitres, domus familiae meae (et Octaviani Augusti quidem, sed id minus refert! ). Ast attatae calamo arripior! Ipsa agedum scribe!
Nam nisi statim tibi responsum est, fuit, quia forte in partem paginae difficilem aspectu litterae tuae inciderunt: nunc, viden? Tres simul sodales magna voce te convocant!

Vale mihi

PS Huc aliquando alius quoque Romanus sodalis, Agricola nomine, venit in versificando alacerrimus necnon dexterrimus. Duas ante dies carmen ad eum aliosque versificatores invitandos composueram, sed nemo respondit... Nanciscor, Giselda optima nova amica, occasionem a te praebitam, quo appellationem meam adseverem: Poetae, ubi latetis? Quid est forum latinitatis sine numeris? Nam iam plures uno mi quo versiculos scribere conarentur hortanti publice privatimve se vereri responderunt, ut effecte quirent: sed quid? Num debes esse Catullus Horatiusve quo in numeris exercearis? Num illi fuere ilico et desubito magi numerorum?

Faciatis, poetae latebricosi ceterique sodales, ut quam optime valeatis
Facias, Giselda, ut quam optime valeas

Tulliana Giseldae, Marco Favonio, Decimo Vettio, Soteri et Aliis Sodalibus s.p.d.


Primum Tibi Giseldae dulce nomine salutem dico. Nuntium Tuum hoc in Foro invenire non possum, idcirco si tempus liberum habeas, paucis verbis narra, quaeso, de studiis et muneribus Tuis.

Deinde Marco Favonio responsum do:
Lodzia mea non tam pulchra ac famosa ut Cracovia aut Thorunium est, tamen mihi digna visitando videtur. Oppidum id ad industriam textilem olim pertinebat, hodie unum maiorum urbium in Polonia patria mea est. Hic praeclara aedificia (quae a fabricatoribus - exempli gratia Germano Carolo Scheibler!!) exstructa, visitari possunt. Via principalis Lodziae- ,,Piotrkowska" nobis vocata una longiorum omne in Europa est. Lodzia est etiam, ut verum dicam, ,,paradisus" hominibus, qui cinematographica arte imprimunt aut pelliculorum amatores sunt.
Modo converti in Latinum carmen poetae, cuius nomen est:
K. I. Galczynski. Ecce titulus carminis eius: ,, Sermo lyricus, sive de amore verbis exprimendo". Gratias Tibi Marce pro invitamento Tuo, dic mihi tamen - ubi conventus ille sit.

Porro Decimo Vettio gratias ago! Responsum Tuum, quamquam breve mihi perplacet et Tu mihi Splendidus Ioculator videris.

Denique Soteri Diligentissimo respondeo:
Nuntium Tuum elegantia venustateque me movit. His verbis lectis, puto Te doctissimum hominem et fidelissimum amicum latinitatis esse. Ego etiam similiter Tibi artem musicam amo, tamen ingenio musico praedita non sum. Urbem Tuam amoenam nondum visitavi. Si fortuna faveat, postero tempore vellim eam conspicere!

Valete Carissimi!

Marcus Tullianae amicae spectatissimae s.d.p.
Magnas tibi ago gratias pro epistula tua. Lodzia oppidum locuples florentissimumque videtur esse. Quod vero ad LECTIONEM illam MAGNAM II MEDIAEVALEM attinet, inspice quaeso „Litterae Latinae“ -> „Lectio magna II mediaevalis“ -> nunt. # 6154ss. (Oct 17, 2006). Quo facto regulas reperies ad LECTIONEM pertinentes. Peragitur enim conventus ille in Colloquiis nostris.
Ceterum carmina abs te Latine reddita etiam nobis propositum iri spero.
Feliciter!