YLE Colloquia Latina

Herimannus sodalibus sal. d.

Nolim, Maxe (?) et Mercuri, suffragia in terra Ucrainorum postremam pugnam inter Orientem et Occidentem reputari. Nam hoc maximi momenti evenisse censeo: suffragia libere postremo lata esse et illum candidatum, qui plura collegerat, vicisse. Sed hoc non accidit sine poena nec sine populi voluntate. Nam post priora suffragia, quae impudenter falsificata erant, populus nullam vim exercuit contra partem victoris, sed fora et vias firme occupavit tam diu, ut mundus et auctoritates ipsae ad nova suffragia compulsa sint, quod indicium est novi temporis et illi infelici civitati. Si autem re vera veneno perniciosissimo contaminatus novus praeses Yutchenko vitam amiserit, donum tamen libertatis, vel spei libertatis, perpetuo manebit.
Finem litteris meis imponens, spero novos moderatores fossorum et agricolarum Orientalis Ucrainae non oblituros esse, quamquam fautores Janukovic prisci rectoris: nam miseria eorum et reverentia nimia erga Russorum rem publicam ampliore democratia et melioribus vitae condicionibus tantum commutari possunt.
Valete, et incertae lectioni Slavorum nominum ignoscite.

Novocomi, a. d. III Idus Ianuarias.

Pistos Mercurio, Maxo, Iuliae, Marco, Herimanno ceterisque sodalibus sal.

Gratias tibi, Mercuri, agendum nobis, qui in Germania vivunt, cum nostram terram laudibus affecisti!

Comitiis renovatis melius actum esse puto in Ucraina et iri. Ita dubito, quod iis in terris, quae Ucrainam cingunt, timetur, an non Ucraina frangatur eoque modo translatio olei. Quod enim vendi Russiae interest.

Valete!

Bennopoli, a.d.tert.Id.Ian.

Mercurius sodalibus s.

Recte quidem, Herimanne, dixisti maximi momenti esse, quod fautores Iuschenkonis non vi, sed constantia ac pertinacia admirabili magistratus ad comitia instauranda coegerunt. Quod est initium democratiae, in illa regione diu desideratae. Non mimime vero me terret venenatio Iuschenkonis, quod facinus mehercle aevum medium mihi in mentem revocat! Num rector Ukrainae tamquam novus Mithridates esse debeat, qui olim corpore suo venenis variis assuefacto se ad imperandum comparavisse fertur? Valete. Transaquinci, d. III. Id. Ian.

Pistos Mercurio ceterisque sodalibus sal.

Melius eum, Mercuri, noli vocare Mithridatem, quippe qui civium octoginta milia interfecisset, a quo scelere ille vir excelsus, Yushtchenko, abhorreat.

Valete!

Bennopoli, a.d.tert..Id.Ian.

M. Favonius sodalibus sal.
Potestampi, in capite Brandenburgi, his diebus res accidit, quae metum nobis iniceret:
In programmate Brandeburgiensi, quod ad discipulos rebus gestis instituendos pertinet, memoria deleta est Armeniorum genocidii, quo Turci bello mundano primo se obstrinxerant, idque auctore legato rei publicae Turcicae, quae Unioni Europaeae adiungere se parat. Ceterum Turci de genocidio Armeniorum disputare adhuc poena proposita vetantur. Num genocidium, ubicumque terrarum factum, silentio praetereundum est? O rem detestabilem! Quae bilem non solum Armeniis commovet... Vos quid censetis?
Valete. VII K. Feb. Crefeldiæ.

Mercurius Marco suo s. d.

Res, de qua nos certiores fecisti, et mihi maximum dolorem indignationemque attulit. Certe, si quis historiarum rerumque publicarum hodiernarum aliquantulum peritus est, quibus de rebus hoc factum sit, facile intellegere poterit. Nonne magna multitudo Turcorum in Germania morantur? Nonne moderatorum Unionis maxime interest, ne haec insecutio Armeniorum foedissima civibus Unionis innotescat, cum iam de asciscenda in Unionem Turcia agatur? periculum enim est, ne illo facinore latius divulgato ira contra Turcos adoriatur. Nonne denique animi Germanorum etiamnunc conscientia suorum facinorum in Iudaeos commissorum quasi constricti sunt? Qui timent, ne ut hypocritae cum festucam in oculis aliorum reprehendant, trabem in oculo suo negligere videantur... Vale. Transaquinci, d. VI. Kal. Febr.

Mercurius Hungaricus sodalibus s. d.

Mane sub prandio radionem auscultans edoctus sum Johannem Paulum II. papam novo morbo esse affectum, ac iam unctionem extremam ei datam. Quid de hoc censetis, sodales? Quaenam vobis opinio de papa illo? Quid, si ille mortuus sit? Valete. Posonii, Kal. Apr.

Africanus Mercurio s.d.

Iohannes Paulus II vir amplissimus est - et quamquam non christianus sum tristitiam magnam habeo ob nuntios de papae morbis. Eius aetas certamen erat - in tyrannidem, pro vita propugnationeque debilium. Is lugebitur et non facile reponebitur.

Vale!

Mercurius sodalibus s. d.

Silentio praeterire haud possum explosiones hodie a territoribus, qui membris societatis illius Al-Kaida adnumerari feruntur, crudeliter Londinii commissas; praecipue quod illa loca, ubi ista facinora sordidissima patrata sunt, et mihi satis nota. Spero illos homines, si hoc de talis bestiis dici potest, brevi apprehensum iri. Valete. Budapestini, Nonis Iuliis.

Hoc nos solacio consolemur:

Mea est ultio et ego retribuam in tempore ut labatur pes eorum / iuxta est dies perditionis et adesse festinant tempora

(Dt 32, 35).

Tiberis omnibus sodalibus, imprimis autem Marco et Mercurio s.d.
quo quo scelesti ruitis? mens mea ab isto foedissimo scelere abhorret. hominibus innocentibus per insidias trucidatis cunctis, qui iure atque humanitate obstringuntur, acerrime est repugnandum. sed equidem- heu - timeo, ne gubernatores nostri et in tanto rerum discrimine non intellegant terrorismum vi armisque non vinci posse.
immo status rerum Iraquianarum mentes atque animos eorum magis magisque in dies excitare videtur ad bellum sanctum,ut ipsi appellant, civitatibus occidentalibus inferendum. praeterea timeo, ne multo plures prius pereant, quam moderatores civitatum nostrarum (utinam in ea re moderatione tenerentur!) intellegant causas terrorismi inquirendas esse, quibus neglectis victores ex eo bello non discedant.
valete.
VIII.Id.Iul.

Herimannus amicis sal.

Et ego territus maereo , tot insontium vitas amissas conspiciens; solacium est praesidem Anglorum Blair statim palam dixisse se islamicos, qui Britanniam incolunt, nullo modo fautores terroristarum censere: si caedes in civitate Britannorum et in omnibus Occidentalibus populis discordiam et odium mutuum diffuserit, homicidae consilium suum scelestum partim consequentur.
Me tamen non latet post Civitates Americae Unitas, Hispaniam et Regnum Coniunctum Italiam meam primum locum inter auctores belli Iraquici occupare: nos ex ordine proximi .....
Valete!

Novocomi, a.d. VIII Idus Iulias.

Gastón sodalibus in terris septemtrionalibus habitantibus s.p.d.

Creditisne vostris moderatoribus terrorismum vincere maximi momenti esse?

Valete!

Herimannus Gastoni sal.

Ita, Gaston Australis, sine dubio moderatores Europaei et Occidentales terrorismum profligare cupiunt, sed non quantocumque pretio: si ex iis petas, ut miseriae pauperum, oppressioni gentium multarum, rapinae divitiarum sub terra iacentum, praesertim petrolei, finem imponant, denegabunt: "de nostro modo vivendi non agitur" dixerunt Bush et Blair.
Quam ob rem mihi caedes terroristarum eheu! crebriores et saeviores in annos fore videntur.
Quo ruimus?
Vale!

Novocomi, a. d. III Idus Iulias.

M. Favonius sodalibus s.

Qua de causa – pro deum atque hominum fidem! – Israelitae, antequam regionem Gazensem relinquerent, his diebus omnia aedificia diruerunt? Etiam arbores infractae esse dicuntur. Iterum quaero, cur... Nonne in mentem nobis venit etiam ab exercitu Germanorum, cum bello mundano secundo ex Russia se recipere coactus esset, omnia deleta combusta solo aequata esse?

Valete. Pr. Id. Sept.