YLE Colloquia Latina

Ericus Palmén omnes sodales Latinitatis studiosos salutat.

Appetentibus ultimis diebus
anni, qui tenebras ferunt profundas,
attamen comitante luce dulci
festi, quod celebrare fas quotannis
est nobis, liceat mihi, sodales,
votis omnia prospera ominari,
gaudio quae animos replere possint:
Haec sollemnia pacis otiique
plena sint! Pariter futurus annus
faustas afferat et vices secundas!

Donaque vinaque iam multumque petita voluptas
ornant plura focos abiete plasticea:
sed si plasticeast abies, cumque hac sua dona,
ne sint vina tamen, voster et iste animus.
Sol renovaturust sua lumina: numina nobis
lumina Solis habent: numquam ea plasticea.

Et versibus sat aptis vobis augurabor:
Sint laetae multum vobis hae dies Saturni!

Valete

Salvete, sodales!

Ecce Natali redeunte festo
omnibus scribentibus hic Latine
rursus exoptare volo Latine
omnia fausta.

Amicis suis sal.

Arva canis sunt nivibus repleta
Cuncta, concreta glacie laborant
Tramites. Terret Boreas nivalis
Corpora nostra.

Sed salutaris calor intus ardens
Corda permulcet glaciata nostra:
Namque nascentis celebratur hora
Mystica Christi.

Solis Invicti celebranda venit
lux Quiritibus: data redde, Roma,
Numini danti radiis calorem
danti et amorem.

Elluamini. Moderate cili
(fas loquor: licet) moderationes
atque comissamini et este: mos sit
nunc sine more.

Iane, da nobis, sator alme mundi,
Mensium bis sex spatium serenum
Et vias anni varias recentis
Dirige ductor.

Nuntio huic distinctionem eripui. Quaeso ne scribas litteris rubris (#FF0000), quem colorem ad usum meum reservare velim (ut vides). Andreas Moderator.

Erratum. Scribi oportebat:

Heu! Frons obducta est tenui mea laeta rubore:
Sed fateor: Rutilans est color ille tuus.



Delevi nuntium superiorem rogatu M. Favonii Ursini. - Tibi gratias ago quam maximas pro fidelitate tua. Andreas Moderator.