YLE Colloquia Latina

Distorta iura spernere saepe iam
nostros labores vidimus, at semel
salvari nos decepto ocello
ludibrio gravi in arbitrando:

tentis toris iam defluere umidum
sudorem vis non desinit aspera:
nec desinas, Fortuna, nos nec
asperis aspera sis honestis.

Honesta non tu, complice barbaro
athetae abacti se merito, arbitro,
ne honesta adhuc reddis bonum no-
bisque per immeritum "rigorem"?

Pergas liceto! dummodo quae rapis
iustisque iniqua, et reddas iniqua item
est aequitas summa haec: honeste
esto inhonesta laboriosis!

Forza Italia!

............... ET FVIT.

VIVAVUVE

Mucius omnibus suis carissimis sodalibus
Heu amici, uideatis quas lepidas facetasque nugas repperi!

De Unitis Statibus Americae
America ciuem suum in Vnionem Souieticam speculatum mittere constituit. Qui speculator, ne a Souietis illico capiatur, tanto ciuibus ordinariis similis esse debet, qui pro certo habeant illum genuinum Souietum esse. Id est, ei fluenter Russice loquendum, "kozaczok" saltandum et uodkam multam bibendum est.
CIA centum candidatos creauit eosque speculatores expertissimi instituere. Pro dolor, solum quinquaginta Russice loqui ualuerunt, quorum solum decem saltationes Russicas edidicerunt. Quibus probatis, an bibere possent, quantam uodkam ciues ordinarii Unionis Sovieticae biberent, solum unus remansit. Quem speculatorem optimum, qui et fluenter Russice loqui et Russice saltare et multum bibere ualuit, Americani in Vnionem Souieticam speculatum miserunt.

Ille mox in Vnione Souietica est, in uicum quendam uenit, ubi primum incolam vidit, quem urbane lingua Russica salutat. At ille:

- Quasi noster loqueris, aliqua tamen noster non uideris.
- Quid dicis, mi comes! - speculator indignatur - Age, saltemus.

Saltauerunt, at incola ille:

- Quasi noster loqueris, quasi noster saltas, aliqua tamen noster non uideris.
- Quid dicis, mi comes! - speculator respondit - Age, bibamus.

Multam uodkam celeriter biberunt, at incola ille:

- Quasi noster loqueris, quasi noster saltas, quasi noster bibis, aliqua tamen noster non uideris: apud nos nigri desunt!!

Et ecce alias nugas...

I-Q: Quid est: dentes centum, testiculi duo?
R: Crocodillus!
Q: Quid contra: testiculi centum, dentes duo?
R: Conuenticulus ueteranorum!

II-Miles quidam a decurione probatur, an cuiuscumque de armis meminerit:

- Miles, dic mihi nunciam, qua ex materie fistula sclopeti facta est?
- Fistula sclopeti, domine, ex chalybe facta est.
- Optime, miles, respondisti. Nunc, qua ex materie claustrum sclopeti factum est?
- Item ex chalybe, domine.
- Minime, miles, pessime respondisti. In hoc libro scribitur enim: "ex eadem materie".

III-Vir quidam per Siberiam tramine transsiberiano iter faciebat. Cum Russia est terra maxima, iter illud adeo longum erat, ut hero noster iam diutius se concubitu abstinere non potuerit. Itaque conductorem traminis cum aduocasset, secreto interrogauit:
- Audi me, sicut uir uirum: mulierem ualde cupio. Potesne aliquam commodare?
- Ignosce - respondit ille - mulieres hic desunt. Exstat tamen Sinensis quidam, quocum hoc fieri potest.

Quod uiro interroganti non placuit itaque propositum renuit. Post aliquot tamen dies, desiderio carnali compulsus, conductorem denuo aduocauit et inquit:

- Sit, ut mihi suades, Sinensem illum adduc. Solum rogo obsecroque, ut nemo alius, praeter nos, de hac re quicquid nouerit.
- Libenter tibi prodero - respondit conductor - scito tamen non pauciores, quam septem, hoc cognoscituros esse.
- Qui septem?! - rogauit ille.
- Et tu et ego - conductor enumerauit - et ille Sinensis, et praeterea quattuor uiri, qui eum tenent, quia hoc ei semper turpissime displicet!

Valete quam maxime

Etruscus Quiritibus et non spd

Ahahahah! Euge, amice, quod vero est quo fruniamur in his historiolis tuis! Et attatae pergas, si alias reperis

Nunc vobis a quodam salaputtio pagulorum meorum mihi quondam obiectum aenigmation prolaturus sum, nempe non tam dilicatum quam illud meum Platonis superius excerptum, sed satis ut puto delectaturum:

OLIM tres amici potatum domum unius sui convenerunt: post potionem dominus valde ebrius ceteris certamen arcubus suasit. Cum illi vementer adsensissent, posita pro scopo lance supra palum in medio atrio, ipse dominus iacere voluit: cum se gloriosus illos bene iacere docturum iactasset, adhuc inter fumos ebrietatis tremulis cruribus, titubante corpore toto, sagittas arcumque corripuit ad scopum diu miratus. Sed sagitta proiecta scopo intacto fenestra exiit. Mille inter querellas arcua telaque proximo tradit sodali. Qui multo plus potus mille post ludibria itemque se, quam prius ille, iactatus arcum arripuit diuque ad scopum miratus telum proiecit: quod quoque scopo ne delibato quidem eandem per fenestram eiectum est. Ruentes inter cachinnos tertius sodalis, maxime omnium potus, corpus tremulus, titubantior utraque crura, sagittam suam emisit, quae recta lancem pro scopo adpositam trafixit.

Quomodo potuit?
(solutio, statim dico, valde simplexst, ne cerebra vexetis!

Valete

Famaque et pietate virum super aethera notum
Disiectasque canit naves crudele per aequor
Praecipueque ducis casus regina requirit:
Tandem conticuere omnes patriaeque ruinam
Deflevit pater Aeneas et funera Troiae
Hinc Polydore tuos tumulos vastumque Cyclopa
Priamidenque Helenum dolet amissumque parentem.

Etruscus Quiritibus et non spd

OLIM tres amici potatum domum unius sui convenerunt: post potionem dominus valde ebrius ceteris certamen arcubus suasit. Cum illi vementer adsensissent, posita pro scopo lance supra palum in medio atrio, ipse dominus iacere voluit: cum se gloriosus illos bene iacere docturum iactasset, adhuc inter fumos ebrietatis tremulis cruribus, titubante corpore toto, sagittas arcumque corripuit ad scopum diu miratus. Sed sagitta proiecta scopo intacto fenestra exiit. Mille inter querellas arcua telaque proximo tradit sodali. Qui multo plus potus mille post ludibria itemque se, quam prius ille, iactatus arcum arripuit diuque ad scopum miratus telum proiecit: quod quoque scopo ne delibato quidem eandem per fenestram eiectum est. Ruentes inter cachinnos tertius sodalis, maxime omnium potus, corpus tremulus, titubantior utraque crura, sagittam suam emisit, quae recta lancem pro scopo adpositam trafixit.

Quomodo potuit?

Aenigma defossorum est, fateor, sed non ideo conatibus vestris indignum!

Valete

Marcus amicis suis sal.
Alio iam loco his versibus obscuris amicos cruciavi neque dubito, quin et vos rem feliciter sitis enodaturi:
Haec herba, vobis quam fero, condit cibos
Maiore vi quam ceterae;
Comesa fauces concremat mordacius
Quam flamma torrens Herculen.
Poeta salse versibus culpans suis
Bulbos amaros iambicis
Est ante fructus luce, quam nobis medens
Servator unctus prodiit.
Valete.

Marco redito salutem et felicitatem

Vtrum ipse composuisti, sodalis, an ab alio sumpsisti? Stylus mihi te indicat, ergo, ut dicere solemus itali, ista est farina de sacco tuo, an fallor? Non loquor de versu tantum, sed et de re: an rei solutio, quamvis versus tui sint, in altero quodam poeta recumbit?

Hoc saltem auxilium nolis mentibus negare nostris

Heu Rhumak, libros sciscitari ut quaestionem expedias non aequom esse!!!

... nisi forte nonnisi quodam auctore compulsato elementa solvendi praesto sint.
e.g. si rogatur "quae sunt animalia quae habitus honestate volucribus omnibus praestant, nisi forte vescantur?", hoc roganti respondere nemo quit nisi Dantem legerit... Ego autem non quis auctor, sed num quis auctor legendus esset quaesivi. Vale!

Vtcumque:

Sponsa mea satis de culinario ministerio scit, ut videat allium habere bulbos. Scio ego Christum a sequacibus suis vocari servatorem seu "salvatorem" et hunc salvatorem esse christòn sive unctum (recognovi sponsa iuvante, cui familia, quamvis non ipsa, christiana est, esse eum, quia mens mea longe abhorret a cognoscendo hunc hominem servatorem medicumque suum ), ergo ultimi versus significant hunc poeta ante Christum natum vixisse. Quis ergo poeta iambos in allium vibravit ante Nazarenum illum? Hi iambi cur dubitem quin eodem sint numero compositi atque isti quos nobis Marce prompsisti? Ergo loquimur de Horatio qui eodem metro carminis huius tui iussit parricidas allium comesse. Ceterum non dixerim allium merum si comedatur torrere fauces: dixerim potius molestum et fastidiosum quam torridum! :s

Soluitne sponsa mea aenigma tuum?

Agedum Marce noster! Scire cupimus rectene soluerit quaestionem amicus noster Rhumak puellae auxilio! Ipse autem non ausim quaestioni responsum dare conari, nam minime rerum culinarium peritus sum!!!

Marcus Alexandro et Rhumaki amicis s. d. p.
Euge, eugepae!
Lutetia Parisiorum relicta heri domum feliciter reversus summo cum gaudio epistolia legi vestra. Ita est ut scribit Rhumak. Horatius mihi ante oculos obversabatur, cum illos ipse componerem versus iambicos (cf. epod. 3). Quod vero ad Herculem flamma tostum attinet, oro vos ignoscatis superlationi.
Valete. VII K. Nov.

Gloria cuncta sponsae meae it, quae et historicum terminum et poetam et praesertim... terribile condimentum cognovit.

Gratias!